राज्यद्वारा बेपत्ता पारिएका नागरिकको खोजबिनका लागि एमाओवादी प्रतिबद्ध–अध्यक्ष दाहाल

काठमाडौँ, जेठ ७ गते । एकीकृत नेकपा (माओवादी) का अध्यक्ष पुष्पकमल दाहालले सशस्त्र द्वन्द्वकालमा राज्यका तर्फबाट बेपत्ता पारिएका नागरिकको खोजबिनका लागि एमाओवादी प्रतिबद्ध रहेको बताउनुभएको छ ।

एमाओवादीको केन्द्रीय कार्यालय पेरिसडाँडामा ‘बेपत्ता योद्धा स्मृति दिवस’को अवसरमा आज आयोजित ‘सहिद तथा बेपत्ता योद्धा स्तम्भ’को शिलान्यास गर्दै उहाँले प्रमुख राजनीतिक दलको सहमतिमा सत्य निरुपण तथा बेपत्ता नागरिक खोजबिनसम्बन्धी अध्यादेश पारित गरिएको र सो अध्यादेशलाई राष्ट्रपतिले जारी गरिसक्नुभएको अवस्थामा बेपत्ता नागरिकको खोजबिनको काम अगाडि बढ्ने विश्वास व्यक्त गर्नुभयो ।

सशस्त्र द्वन्द्वकालमा राज्यका तर्फबाट करिब एक हजार १०० भन्दा बढी नागरिक बेपत्ता पारिएको स्मरण गर्दै उहाँले सहिदले देखाएको बाटो समाउँदै बेपत्ताहरुको अवस्था सार्वजनिक गर्न आफूहरु कहिल्यै पछि नहट्ने स्पष्ट पार्नुभयो ।

एमाओवादी केन्द्रीय कार्यालय पेरिसडाँडामा उहाँले  सहिद तथा बेपत्ताहरुको स्मारक शिलान्यास गर्नुभएको थियो  । सो स्तम्भमा राज्यपक्षद्वारा बेपत्ता पारिएका र सहिद भएकाहरुको नामावली राख्ने योजना रहेको छ ।

विसं २०५५ जेठ ७ गते तत्कालीन सरकारले काठमाडौँको सुन्धारा टेबहालबाट तत्कालीन माओवादी केन्द्रीय सदस्य दण्डपाणि न्यौपाने र मिलन नेपालीसहित चार जनालाई गिरफ्तार गरी बेपत्ता पारिएको स्मरणमा एमाओवादीले गत सालदेखि बेपत्ता नागरिक स्मृति दिवस मनाउन थालेको हो ।

सो अवसरमा अध्यक्ष दाहालले सरकारले संविधानसभाको निर्वाचनको मिति छिट्टै घोषणा गर्ने विश्वास पनि व्यक्त गर्नुभयो ।

उहाँले भन्नुभयो, “अन्तरिम चुनावी परिषद्का अध्यक्षसँग भएको छलफलमा उहाँले केही दिनभित्रै निर्वाचनको मिति घोषणा गर्ने वचन दिनुभएको छ, आशा गरौं निर्वाचनको मिति घोषणा हुन्छ ।”

सरकारले निर्वाचनका लागि आवश्यक तयारी गरिरहेको जानकारी दिँदै अध्यक्ष दाहालले तोकिएकै समयमा संविधानसभाको निर्वाचन गरेर मुलुकलाई सही राजनीतिक दिशामा लैजान सरकार प्रतिबद्ध रहेको आफूले पाएको बताउनुभयो ।

सोही कार्यक्रममा आज मात्रै एमाओवादी प्रवेश गर्नुभएका डा वाइबी थापालाई अध्यक्ष दाहालले टीका र माला लगाएर स्वागत गर्नुभएको थियो । रासस
–––––––