Saturday, 19th April 2014

विद्यालयलाई छुवाछूतमुक्त क्षेत्र घोषणा गर्न माग

काठमाडौँ, वैशाख ६ गते  । विद्यालयलाई छुवाछूतमुक्त क्षेत्र घोषणा गर्नुपर्ने माग गरिएको छ ।
    
    समता फाउन्डेसनद्वारा आज विद्यालयमा विद्यार्थीमाथि हुने जातीय भेदभाव तथा छुवाछूतबारे गरिएको कार्यशालामा विद्यालयभित्र शिक्षक, व्यवस्थापन समितिका पदाधिकारी र अभिभावकका लागि  बाध्यात्मक आचारसंहिता बनाएर कार्यान्वयन गराउनुपर्नेमा जोड दिइयो ।
    कार्यक्रममा दलित अधिकारका क्षेत्रमा कार्यरत विभिन्न सङ्घसंस्थाका प्रतिनिधिहरुले राष्ट्रिय दलित आयोगले विद्यालयमा हुने गरेको छुवाछूत तथा विभेदजस्ता विषयमा अनुगमन गर्नुपर्ने आवश्यकता औँल्याए ।
    शिक्षा मन्त्रालयका उपसचिव डा. लेखनाथ पौडेलले कार्यपत्र प्रस्तुत गर्दै दलित तथा पछाडि पारिएका बालबालिकाका लागि निःशुल्क शिक्षा, सामुदायिक विद्यालयमा गुणस्तरीय शिक्षा, दलित विद्यार्थीमैत्री विद्यालय, कक्षाकोठाको व्यवस्थाजस्ता विषयमा ध्यान दिन जरुरी रहेको बताउनुभयो ।
    शिक्षाका लागि राष्ट्रिय अभियान नेपालका सचिव लवराज ओलीले नेपालले हस्ताक्षर गरेका बालबालिकाको शिक्षासम्बन्धी विभिन्न महासन्धि तथा राष्ट्रिय तथा अन्तर्राष्ट्रिय प्रावधानबारे जानकारी दिँदै अभिभावकमाझ शिक्षाको महत्वबारे जनचेतना जगाउन सके बीचमै पढाइ छाड्ने विद्यार्थी घट्ने दाबी गर्नुभयो ।
    मार्टिन चौतारीका अनुसन्धानकर्ता प्रमोद भट्टले सामुदायिक र निजी विद्यालयको शैक्षिक प्रणालीमा अझै धेरै भिन्नता रहेको बताउँदै ३७ प्रतिशत महिला शिक्षकमध्ये पनि दलित महिला शिक्षकको सङ्ख्या चार प्रतिशतमात्र रहेको उल्लेख गर्नुभयो ।
    अभिवक्ता तथा सामाजिक समावेशीकरण विज्ञ डा. यामबहादुर किसानले कार्यपत्र प्रस्तुत गर्दै विद्यालयमा अझै कायम रहेको जातीय विभेद तथा छुवाछूतका कारण दलित विद्यार्थी विद्यालय जान मन नगर्ने, बीचमै छाड्नेजस्ता समस्या रहेको बताउनुभयो ।
    फाउन्डेसनका अध्यक्ष पदम सुन्दासले दलित र गैरदलितबीच मात्र हैन दलित र दलितबीच नै विभेद कायम रहेकाले त्यसलाई पहिला चिर्नुपर्छ भन्नुभयो ।
    शिक्षा विभागको तथ्याङ्कअनुसार सन् २०१२ मा विद्यालय जाने उमेरका बालबालिकामध्ये प्राथमिक तहमा २०.३ प्रतिशत भर्ना भएका छन् । हाल कुल भर्नादर ९५.३ प्रतिशत रहेको छ । शिक्षा मन्त्रालयको तथ्याङ्कअनुसार पाँचदेखि नौ वर्ष उमेर समूहका ४.७ प्रतिशत बालबालिका अझै पनि विद्यालय बाहिर रहेका छन् । रासस

हाम्रा प्रकाशनहरु:

गोरखापत्र दैनिकThe Rising Nepal Newspaperमधुपर्कयुबामंचमुना