Monday, 22nd September 2014

बालबालिकाको उदाहरणीय कार्य

चौतारा,  असोज ५ गते  । सिन्धुपाल्चोकको राम्चे–५ जुरे का पहिरोपीडित परिवारको राहतका लागि यहाँका बालबालिकाले एक दिनको खाजा खर्च जोगाएर रु पाँच हजार आर्थिक सहयोग प्रदान गरेका छन् ।

    जिल्ला दैवी प्रकोप उद्धार समितिको कोषमा जम्मा हुने गरी चौतारा नगरपालिकाअन्तर्गत वनदेवी माविका बालबालिकाले प्रमुख जिल्ला अधिकारी गोपालप्रसाद पराजुलीलाई सो रकम हस्तान्तरण गरेका हुन् ।

एक नेपालीको पीडामा अर्काे नेपाली चुप लागेर बस्नु उचित नहुने देखेर थोरै भए पनि पीडितका लागि सहयोग हुन सकोस् भन्ने उद्देश्यले एक दिनको खाजाबापतको खर्च जोगाएर प्रदान गरेको विद्यालयमा गठित राइजिङ बाल क्लबका उपाध्यक्ष सुप्रिन्स कसजुले बताउनुभयो ।

बालबालिकाले खाजा खर्च कटाएर जम्मा गरेको रकम पीडित परिवारलाई दिने भन्ने प्रस्ताव ल्याएपछि हुन्न भन्न नसकी आफूहरु प्रभावित भएको विद्यालयमा गठित बाल क्लबकी संरक्षक शिक्षिका सीता श्रेष्ठ कसजुले बताउनुभयो ।

साउन १७ गते जुरेमा गएको विनासकारी पहिरोले १५६ जनाको ज्यान गएको थियो । पहिरोबाट १२६ घर पूर्ण रुपमा क्षति र ४०४ घर उच्च जोखिममा रहेका छन् ।

विस्थापित परिवारलाई पुनःस्थापनाका लागि हालसम्म कोषमा रु एक करोड ८६ लाख ५७ हजार ९०८ राहतस्वरुप सङ्कलन भइसकेको जिल्ला दैवी प्रकोप उद्धार समितिले जनाएको छ । रासस

हाम्रा प्रकाशनहरु:

गोरखापत्र दैनिकThe Rising Nepal Newspaperमधुपर्कयुबामंचमुना