Saturday, 1st November 2014

झोलुङ्गे पुलमा जनताको आकर्षण बढ्दो

भद्रपुर, कातिक १५ गते  । झापामा गत आवमा सञ्चालित छ वटा झोलुङ्गे पुलमा पाँचवटा निर्माण सम्पन्न भई सञ्चालनमा आइसकेको छ भने एउटा निर्माणाधीन अवस्थामा रहेको छ ।

 जिल्ला विकास समिति झापाका अनुसार कुल रु ९१ लाख ३४ हजार ९७५ लागतमा ती झोलुङ्गे पुल सम्पन्न भएको हो ।

    बाँसावरी धाइजन, धरधरे गरामनी, सतानुवारी विर्तामोड, फोक्लैण्ड चकचकी र फेरेगौडा शान्तिनगरमा झोलुङ्गे पुलको निर्माण सम्पन्न भई सञ्चालनमा आइसकेको जिल्ला विकास समिति झापाका योजना प्रमुख डिल्ली नेपालले जानकारी दिनुभयो ।

    सम्पन्न हुन बाँकी मसानघाट गरामनीको योजना क्रमागत रहेकाले यस वर्ष सम्पन्न हुने बताइएको छ ।

    यसैगरी, चालु आवमा कुल रु दुई करोड १५ लाख तीन हजार ५२७ लागतमा झापामा सातवटा झोलुङ्गे पुल निर्माण भइरहेको बताइएको छ ।

    जसमा दामाटार झोलुङ्गेपुल बुधवारे–१, मैनाचरी झोलुङ्गे पुल, सत्तासीधाम–९ मा, चौकीविरान झोलुङ्गे पुल, जलथल ३ र ५ मा, सिमलचौक झोलुङ्गेपुल डाँगीवारी–५ मा, आदर्शटोल झोलुङ्गे पुल केचना÷पथरियामा, ढयाङ्ग्री खोला झोलुङ्गे पुल, तोपगाछी २÷९ मा र धङ्गेरे भाङगोला झोलुङ्गे पुल ज्यामिरगढी÷दुवागढीमा  झोलुङ्गे पुल निर्माण भइरहेको समितिले जनाएको छ ।

    निर्माणाधीन योजना चालु आवको अन्तिमसम्ममा सम्पन्न गर्ने निर्माण व्यवसायीसँग जिविसको सम्झौता भएको बताइएको छ ।

    झोलुङ्गे पुल निर्माण गर्दा समय र लागत दुवैको बचत भई जनताले प्रत्यक्ष लाभ पाउने भएकाले झोलुङ्गेपुलको जनताको मागलाई स्वीकार गरी बजेट विनियोजन भएको स्थानीय विकास अधिकारी फणीन्द्र दाहालले बताउनुभयो । रासस

हाम्रा प्रकाशनहरु:

गोरखापत्र दैनिकThe Rising Nepal Newspaperमधुपर्कयुबामंचमुना