पारालिगलमा एकसय ४६ मुद्दा

Share this post

         

सन्तोष राउत, सोलुखुम्बु, फागुन २३ गते । पछिल्लो समयमा पारालिगल कमिटी सोलुखम्बुमा उजुरी पर्ने क्रम बढेको छ ।

नेपाल सरकार तथा युनिसेफको संयुक्त पहलमा गठित पारालिगल कमिटी सल्लेरीले हालसम्म एक सय ४६ वटा मुद्दा हेरेको छ । प्रत्येक गाविसमा महिला हिंसाकाबारेमा जनचेतनामूलक कार्यक्रहरु संचालन हुन थालेपछि उजुरी गर्नेको संख्यामा वृद्धि भएको हुन सक्ने विभिन्न गाविसमा प्रशिक्षण दिनु भएका अधिबक्ता विदुरकुमार लामिछानेले बताउनुभयो ।

विशेष गरी घरेलु हिंसाका मुद्दा हेर्ने पारालिगल कमिटिले यस वर्षभित्र मात्र ६७ वटा मुद्दा मिलापत्र गराउन सफल भएको छ । जसमा बढी जसो महिला हिंसा भए पनि केही पुरुष हिंसाका मुद्दा समेत आएका छन् । पुरुष हिंसाका घटना हुने गरेपनि इज्जत जाने डरले उजुरी नआएको कमिटिले जनाएको छ ।

कमिटिले सदरमुकाम सल्लेरीमा आयोजना गरेको बार्षिक समिक्षा कार्याक्रममा ६४ वटा मुद्दा अन्य कार्यालयमा पठाइएको, नौ वटा जिल्ला स्रोत समुहमा र ५५ वटा मुद्दा जिल्ला प्रहरी कार्यालयमा पठाएको जानकारी दिएको छ । कमिटीमा सबैभन्दा कुटपीटको बढी संख्यामा मुद्दा परेकाछन् । कुटपीटमा ४० वटा, गाली बेईज्जतमा २८ वटा, बहु विबाहमा १५ र यौन हिंसामा आठ वटा, अनावश्यक लान्छानामा तीन वटा मुद्दा परेका हुन् ।

समिक्षा कार्यक्रममा मुद्दा हेर्ने क्रममा अनावश्यक धम्कि आउनुका साथै पिडीतहरुका लागि सहयोग गर्नका लागि आर्थिक अभाव नै मुख्य चुनौति रहेको पारालिगल कमिटि सल्लेरीका अध्यक्ष एकाकुमारी बस्नेतले बताउनुभयो ।