Tuesday, 22nd July 2014

उपचारका लागि ओली सिङ्गापुर जाँदै

काठमाडौँ, साउन ६ गते ।  नेकपा (एमाले) का अध्यक्ष केपी शर्मा ओली स्वास्थ्य उपचारका लागि मङ्गलबार सिङ्गापुर जाने हुनुभएको छ ।  दाहिने हात सुन्निने समस्या समाधान नभएपछि चिकित्सकसँग थप परामर्शका लागि उहाँ सिङ्गापुर जान लाग्नुभएको उहाँको निजी सचिवालयले जनाएकोे छ ।  
 चिकित्सकहरूको परामर्शअनुसार नै उहाँ थप उपचारका लागि सिङ्गापुरको नेसनल युनिभर्सिटी अस्पतालमा जानलाग्नुभएको अध्यक्ष ओलीका निजीसचिव रमेश आचार्यले जानकारी दिनुभयो ।  पार्टीको केन्द्रीय कमिटीको दोस्रो बैठक साउन २५ गते तोकिइसकेकाले त्यसअघि नै उपचार गरेर फर्कने आचार्यले जानकारी दिनुभयो ।  
महाधिवेशनका लागि बैङ्ककमा उपचार गराउँदा गराउँदै स्वदेश फर्कनुुभएका अध्यक्ष ओलीलाई महाधिवेशनको दौडधुपले आरामको समय नमिलेका कारण सुन्निने समस्या सङ्क्रमित भएको निजी सचिवालयको भनाइ छ ।  
यसैबीच, अध्यक्ष ओलीसँग सोमबार नेपालका लागि भारतीय राजदूत रञ्जित रेले भेटवार्ता गर्नुभएको छ ।  भेटका क्रममा राजदूत रेले ओलीलाई बधाई तथा कार्यकाल सफलताको शुभकामना व्यक्त गर्नुभएको थियो ।  ओली निवास बालकोटमा भएको भेटमा राजदूत रेले अध्यक्ष अ‍ोलीको कार्यकालमा नेपाल र भारतको सम्बन्ध थप प्रगाढ हुने विश्वास व्यक्त गर्नुभयो ।  दुई देशबीच मैत्रीपूर्ण सम्बन्ध रहने र विकास निर्माणका केही क्षेत्रमा भारतले नेपालसँग सहकार्य गर्ने विश्वास राजदूत रेले व्यक्त गर्नुभएको ओलीका निजी सचिव आचार्यले बताउनुभयो ।  
कार्यबाहक कसलाई दिनेबारे सोमबारसम्म कुनै निर्णय नभएको अध्यक्ष ओलीको सचिवालयले जानकारी दिएको छ ।  मङ्गलबार बिहान त्यसको टुङ्गो लाग्ने अध्यक्ष ओलीका स्वकीय सचिव आचार्यले स्पष्ट पार्नुभयो ।  कार्यबाहकको विषयमा पार्टीभित्र चर्चा चलिरहँदा अर्का उपाध्यक्ष युवराज ज्ञवालीले नेताहरूबीच बैठक बसी टुङ्गो लाग्ने बताउनुभयो ।  

हाम्रा प्रकाशनहरु:

गोरखापत्र दैनिकThe Rising Nepal Newspaperमधुपर्कयुबामंचमुना