Thursday, 24th April 2014

एकलौटी रुपमा शान्ति प्रक्रियालाई टुङ्ग्याउन खोजिए, अर्काे क्रान्ति– बैद्य


उपेश महर्जन,
काठमाडौँ, वैशाख ११ गते । नेकपा–माओवादीका अध्यक्ष मोहन वैद्य ‘किरण’ले संविधानसभाको निर्वाचनपछि एकलौटी रुपमा शान्ति प्रक्रियालाई टुङ्ग्याउन खोजिए, अर्काे क्रान्तिको थालनी हुने बताउनुभयो ।
कीर्तिपुरस्थित स्मृतिभवनमा बिहीबार माओवादी काठमाडांै जिल्लाको १० आंै सम्मेलन उद्घाटन गर्नुहुँदै उहाँले जनयुद्धको मुख्य हिस्सालाई बाइपास गरेर र अर्काेलाई संविधानसभामा भूमिकाविहीन बनाएर शान्ति प्रक्रिया टुङ्गिन नसक्ने बताउनुभएको हो ।
उहाँले जनताको अधिकार सुनिश्चित भएको संविधान नआउने भएकाले एकपटक पुनः आन्दोलनमा होम्न वामपन्थी, देशभक्त, संघीयता पक्षधरहरुको मोर्चाबन्दीको आवश्यकतामा जोड दिनुभयो ।
विस्तृत शान्ति सम्झौता र अन्तरिम संविधान विपरित पुनः जनयुद्धकालीन मुद्दा ब्यँुताउन खोजिएको आरोप लगाउँदै उहाँले भन्नुभयो,  ‘‘फेरि पनि विभिन्न बहानमा जनयुद्धमा लागेका माओवादी कार्यकर्ताहरुलाई जेलमा हालियो भने हामी पनि जनअदालत र जनसत्ता पुर्नगठन गर्नेछांै ।’’
उहाँले अहिलेको सबै समस्या समाधान गर्न सर्वपक्षीय राजनीतिक सम्मेलन आवश्यक भएको बताउनुभयो ।
अर्काे फरक प्रसङ्गमा उहाँले २०४७ सालमा एमाले संसदीय राजनीतिमा अल्झेको जस्तै एमाओवादी पनि अहिले उक्त दिशामा रहेको बताउँदै भन्नुभयो, ‘‘नयाँ जनवादी राज्यसत्ताको लागि अगाडि बढ्ने हो भने हेटौंडा महाधिवेसनको कार्यदिशा छोड्नुपर्छ ।’’
सम्मेलनमा माओवादीका उपाध्यक्ष सी पी गजुरेलले पार्टीको कार्यदिशा ‘जनयुद्धको जगमा जनविद्रोह’ लागू गर्ने चरणमा पुगेको बताउनुभयो ।
पार्टीले नयाँ क्रान्तिको सिर्जना गर्न उक्त कार्यदिशा लागू गर्न विभिन्न पक्षमा आवश्यक मात्रामा तयारी भइरहेको खुलासा गर्नुभयो ।
त्यसैगरी, माओवादी सचिव नेत्रविक्रम चन्दले तत्कालनी नेकपा (माओवादी) जनयुद्धबाट काठमाडांै बदल्न आए पनि उल्टै आफंै बदलिएको बताउनुभयो ।
सम्मेलनलाई शुभकामना दिनुहुँदै एकीकृत नेकपा (माओवादी)का केन्द्रीय सदस्य हिसिला यमिले हेटांैडा महाधिवेसनले पारित गरेको उत्पादन क्रान्तिमा लागेको बताउँदै चाँडै नेकपा–माओवादीसँग पार्टी एकता हुनसक्ने सम्भावना बढेको दाबी गर्नुभयो ।

 


हाम्रा प्रकाशनहरु:

गोरखापत्र दैनिकThe Rising Nepal Newspaperमधुपर्कयुबामंचमुना