Friday, 31st October 2014

लुम्बिनीमा अन्तर्राष्ट्रिय बौद्ध सम्मेलन आयोजना हुने


काठमाडौं, कात्तिक १४ गते । ‘बौद्ध संस्कृति र सम्पदाको सम्वद्र्धन, सुरक्षा र संरक्षण’ गर्ने उद्देश्यले लुम्बिनीमा अन्तर्राष्ट्रिय बौद्ध सम्मेलनको आयोजना हुने भएको छ ।
     अन्तर्राष्ट्रिय बौद्ध सम्मेलन मूल आयोजक समितिद्वारा शुक्रवार राजधानीमा आयोजित कार्यक्रममा सो कुराको जानकारी गराएको हो ।
    यहि कात्तिक २९ देखि मङ्सिर २ गतेसम्म बुद्धको जन्मस्थलमै  आयोजना हुने सम्मेलन मीनभवनस्थित विश्व शान्ति विहारमा सञ्चालित लुम्बिनी बौद्ध विश्वविद्यालय अन्तर्गत थेरवाद बुदिष्ट एकेडेमी र म्यानमारको सागाइङ्गस्थित सितगु ईन्टरनेशनल बुदिष्ट एकेडेमीले संयुक्त रूपमा आयोजना गर्न लागेको समितिले जनाएको छ ।
कार्यक्रमको उद्देश्यबारे चर्चा गर्दै समितिका  सचिव भिक्षु निग्रोहले यस सम्मेलनमा प्रवद्र्धन, सुरक्षा, संरक्षण र पुननिर्माण गर्नुपर्ने ऐतिहासिक बौद्ध स्मारक, स्थान, ग्रन्थ र समुदायलगायतको पहिचान गरिने, विश्वभरका बौद्ध सम्पदाहरूको गहन रूपमा बुझ्न अनुसन्धान र शिक्षालाई उत्प्रेरित गरिने,आध्यात्मिक र सांस्कृतिक पर्यटन तथा धार्मिक भ्रमणको प्रवद्र्धन गर्ने र बौद्ध कला, संस्कृति र सम्पदाको संरक्षणका बारेमा विभिन्न देशहरूबीच सूचना आदान–प्रदान गरिने  जानकारी गराउनुभयो ।
    कार्यक्रम संयोजक पूर्व मन्त्री केशवमान शाक्यले  थेरवाद, महायान र बज्रयान तीनै सम्प्रदायसँग सम्वन्धीत ९४ वटा अनुसन्धानात्मक कार्यपत्र प्रस्तुत गरिने सम्मेलनमा करिब तीस देशका चार सय भन्दा बढि बौद्ध भिक्षु तथा बौद्ध विद्वानहरूको सहभागिता रहने बताउनुभयो ।
    उहाँले विश्वभरका बौद्ध सम्पदाहरूको सुरक्षा, सम्वद्र्धन र संरक्षण, प्रवद्र्धन र बौद्ध शिक्षा प्रणालीसँग सम्वन्धीत विषयका कार्यपत्र नेपालका ४६ जना र विदेशका ४८ जनाले प्रस्तुत गरिने पनि बताउनुभयो ।
    समितिका मिडिया संयोजक नवीन चित्रकारले सम्मेलनका लागि आवश्यक मिडिया सम्वन्धीत सम्पूर्ण काम एकै स्थानबाट हुन सकोस् भनेर मिडिया सेन्टर स्थापना गरिने र सेन्टरबाट सम्मेलनका बारेमा  सम्पूर्ण जानकारी पनि लिन सकिने बताउनुभयो ।
    सम्मेलनमा  रूस, बेलायत, जापान, स्वीडेन, स्वीटजरल्याण्ड, इटली, बङ्लादेश, श्रीलङ्का,पाकिस्तान, चीन, दक्षिण, कोरिया, मङ्गोलिया, ईण्डोनेशिया, थाइल्याण्ड, कम्बोडिया, मलेसिया, म्यानमार, अमेरिका, अष्ट्रेलिया,भारत, भियतनाम, लाओस, आयरल्याण्ड, जर्मनी, फ्रान्स, ब्राजिल, अष्ट्रिया, स्कटल्याण्ड, र भूटानका बौद्ध विद्धानलगायत पदाधिकारीहरूको सहभागिता रहने छ ।
    सम्मेलनको पहिलो दिन समुद्घाटनपछि बेलायतका प्राध्यापक रोबिन कनिङ्घम, भारतका प्राध्यापक रविन्द्र पन्थ, श्रीलङ्का प्राध्यापक असङग तिलकरत्ने र नेपालका भिक्षु डा. सुगन्ध(अनिल शाक्य),प्रमुख वक्ताका रूपमा मन्तव्य व्यक्त गर्नुहुने कार्यक्रम रहेको छ भने विभिन्न सेसनको आयोजनापछि मङ्सिर १ गते सम्मेलन समापन हुने संयोजक चित्रकारले बताउनुभयो ।
    त्यसैगरी सम्मेलनका लागि विदेशबाट आउनुभएका विदेशी पाहुनालाई लुम्बिनीलगायत कुदान, देवदह, रामग्राम, गोटिहवा र तिलौराकोटको सांस्कृतिक भ्रमण गराइने कार्यक्रम समेत तय गरिएको समितिले जानकारी गराएको छ ।

हाम्रा प्रकाशनहरु:

गोरखापत्र दैनिकThe Rising Nepal Newspaperमधुपर्कयुबामंचमुना