Saturday, 30th August 2014

सुदूरको देउडा बागलुङमा नाचिने

बागलुङ,  भदौ १४ गते । मध्य तथा सुदूरपश्चिममा प्रचलित देउडा नाच बागलुङमा नाचिने भएको छ । यही भदौ १७ गते गौरा पर्वको अवसरमा मध्य–सुदूरपश्चिम धवलागिरि सम्पर्क मञ्चले नाच प्रदर्शन गर्ने भएको हो ।

    त्यस क्षेत्रबाट यहाँ आई विभिन्न पेसा व्यवसायमा संलग्न व्यक्तिहरुले पर्व मनाउने तयारी गरेका हुन् । धवलागिरिमा रहेका मध्य तथा सुदूरपश्चिमेलीहरुले आफ्नो मौलिक संस्कृतिको जगेर्ना गर्दै गौरा मनाउन लागेका हुन् ।

    धवलागिरिमै पहिलोपटक गौरा पर्वको अवसरमा देउडा गीत तथा नाच प्रदर्शन गर्न लागिएको मञ्चले जनाएको छ ।  

     “पेसा व्यवसाय र बसाइँसराइका कारण धवलागिरि क्षेत्रमा आएका मध्य तथा सुदूरपश्चिमेलीबीच एकताको भावना विकास गर्दै आफ्नो कला संस्कृति जोगाउने उद्देश्य लिएका हौँ”, मञ्चका सदस्य महेश चन्दले भन्नुभयो ।     

     गौरा पर्वले एकआपसमा सङ्गठित हुन र आफ्नो मौलिक कला, संस्कृति र परम्पराको संरक्षणमा लाग्न सन्देश दिने विश्वास गरिएको छ ।

    भाद्र प्रतिपदादेखि अष्टमीसम्म विशेष पूजाआजाका साथ गौरा पर्व मनाउने प्रचलन रहिआएको छ । रासस

हाम्रा प्रकाशनहरु:

गोरखापत्र दैनिकThe Rising Nepal Newspaperमधुपर्कयुबामंचमुना