Wednesday, 23rd July 2014

बन्द उद्योग सञ्चालनमा ल्याइनेःमन्त्री थापा

पुतलीबजार (स्याङ्जा),  साउन ७ गते । नेकपा (एमाले)का केन्द्रीय सदस्य तथा उद्योग मन्त्री कर्णबहादुर थापाले पुष्पलाल नेपाली समाजलाई रुपान्तरित गर्न जीवन उत्सर्ग गर्ने महान सपुत भएको बताउनुभएको छ ।
छत्तीसौँ पुष्पलाल स्मृति दिवस तथा नवौँ महाधिवेशन सन्देशसभामा आज यहाँ आयोजित कार्यक्रममा बोल्दै मन्त्री थापाले पुष्पलाललाई दुरदृष्टि भएका गरिब र निमुखा जनताको पक्षधर नेताका रुपमा नेपाली समाजले चिनेको प्रष्ट पार्नुभयो ।

उहाँले नेपाली मौलिकतामा आधारित वस्तुनिस्ठ विश्लेषण गर्ने र समयलाई चिन्न सक्ने मार्गदर्शक नेता पुष्पलालले देखाएको बाटो सम्पूर्ण एमालेका कार्यकर्ताले आत्मसात् गर्न जरुरी भएको चर्चा गर्नु भयो ।

     मन्त्री थापाले औद्योगीकरण र उद्यमशीलताबिना मुलुकको विकास असम्भव भएको बताउँदै लाखौँ बेरोजगार युवालाई रोजगारीको अवसर प्रदान गर्न आफूले बन्द भएका उद्योग सञ्चालन गर्ने तयारी गरेको बताउनुभयो ।

नेकपा (एमाले) स्याङ्जाका अध्यक्ष तथा नवनिर्वाचित केन्द्रीय सदस्य पदमा अर्यालको अध्यक्षतामा सम्पन्न सो कार्यक्रममा केन्द्रीय अनुशासन आयोगका सदस्य प्रेमनारायण पौडेल र चक्रबहादुर पराजुली, किसान महासङ्घका सदस्य रामबहादुर थापा, जिल्ला सचिव सुधीरकुमार पौडेल र सहसचिव रामचन्द्र भट्टराईले पुष्पलालको योगदान बारे चर्चा गर्नु भएको थियो ।  रासस  

हाम्रा प्रकाशनहरु:

गोरखापत्र दैनिकThe Rising Nepal Newspaperमधुपर्कयुबामंचमुना