उपत्यकालाई लोडसेडिङमुक्त गर्ने प्रयास परीक्षणमै

लक्ष्मीप्रसाद उपाध्याय

काठमाडौँ, कात्तिक २६ गते ।  काठमाडौँ उपत्यकालाई लोडसेडिङमुक्त पार्न निकै कठिन रहेकाले हाल यो कार्य परीक्षणकै रूपमा रहेको ऊर्जामन्त्रीले स्पष्ट गर्नुभएको छ ।  मन्त्रालयले बिहीबार पत्रकार सम्मेलन आयोजना गरी उपत्यकालाई लोडसेडिङमुक्त पार्न परीक्षण (ट्रायल) गरिएको र त्यसलाई निरन्तरता दिने प्रयास भइरहेको स्पष्ट पारेको हो ।  मन्त्रालयले सबै विकल्प प्रयोग गरेर उपत्यकालाई लोडसेडिङमुक्त क्षेत्र बनाइने पुनः प्रतिबद्धता पनि व्यक्त गरेको छ ।  
कार्यक्रममा ऊर्जामन्त्री जनार्दन शर्माले भन्नुभयो, “यो परीक्षणका रूपमा रहेको छ ।  यसलाई निरन्तरता दिन सकिन्छ भन्ने आत्मविश्वास बढेको छ तर लोडसेडिङमुक्त पार्न सकिन्छ भन्न सकिने अवस्थालाई हामीले ठूलो चुनौतीका रूपमा हेरिरहेका छौँ । ”
उहाँले भन्नुभयो, “हामी परीक्षण अवधिमै छौँ, प्रयास गर्ने हो, प्रयास नगरेर त कहीँ पनि पुग्न सकिँदैन । ” कुलेखानीको पानी सिध्याएर सस्तो लोकप्रियता कमाउन सरकारले लोडसेडिङमुक्त पार्ने कार्यक्रम ल्याएको भनेर सबैतिरबाट सोधिने गरेको बताउँदै मन्त्री शर्माले भन्नुभयो, “कुलेखानीको पानीमा मात्र भर नपर्ने र अन्य विकल्पको पनि सहयोग लिइनेछ ।  
हाम्रो प्रयास जारी छ, सफलता मिल्छ होला । ” यद्यपि उपत्यकालाई लोडसेडिङमुक्त पार्न विभिन्न वैकल्पिक उपायका बारेमा अध्ययन भइरहेको बताउनुभएका मन्त्री शर्माले ती विकल्पबारे भने स्पष्ट पार्नुभएन ।  
सरकारले सय दिन पूरा गरेको अवसरमा आयोजित सो पत्रकार सम्मेलनमा अधिकांश समयमा आफ्ना योजना सुनाउनुभएका मन्त्री शर्माले ऊर्जा मन्त्रालयजस्तो प्राविधिक कार्ययोजना भएको मन्त्रालयको काम स्वीकृत गर्न अप्राविधिक बस्ने अर्थ मन्त्रालयका अधिकारीलाई कुर्नुपर्ने भएकाले सोचेअनुरूप काम हुन नसकेको गुनासोसमेत गर्नुभयो ।
उहाँले भन्नुभयो, “प्राविधिक कामको निर्णय अप्राविधिकहरूले गर्ने र अप्राविधिकहरूले गर्नुपर्ने निर्णय प्राविधिकहरूले गर्नुपर्ने भएपछि सोचेअनुरूप काम हुन सक्दैन रहेछ ।  अहिले यो मन्त्रालयमा त्यही भइरहेको छ । ”
नेपाल विद्युत् प्राधिकरणको पुनःसंरचना गर्ने कार्य हाल भइरहेको जानकारी दिँदै मन्त्री शर्माले केही समयभित्रै आमनागरिकका घरघरमा कर्मचारी गएर विद्युत् कम्पनीका लागि सेयर भराउने कामको थालनी गरिने र जनताको सहभागितामा ऊर्जा विकासको अभियान थालनी गरिनेसमेत बताउनुभयो ।  Janardan-Sharma
ऊर्जा मन्त्रालयका सचिव अनुपकुमार उपाध्यायले चमेलिया, कुलेखानी तेस्रो लगायतका निर्माणको अन्तिम चरणमा रहेका आयोजनालाई यथाशक्य सम्पन्न गर्ने लक्ष्यका साथ काम भइरहेको र आउँदो एक महिनाभित्र ४५ मेगावाट र दुई महिनाभित्र १२ मेगावाट बिजुली राष्ट्रिय प्रसारण लाइनमा थपिन लागेकाले उपत्यकाबाहिर पनि लोडसेडिङको समय कम गर्ने प्रयास भइरहेको जानकारी दिनुभयो ।  
हालसम्म कुलेखानीको पानी खासै प्रयोग नगरेकाले आउँदो हिउँद यामभरि निश्चित समयमा कुलेखानी चलाउँदा पनि खासै समस्या नपर्ने बताउँदै उहाँले आउँदा दिनमा औद्योगिक करिडोरमा चार घन्टाको लोडसेडिङको समयतालिका अनुसार मात्र काम गरिने बताउनुभयो ।

थप समाचार
प्रतिकृया
नाम

ईमेल

ठेगना