नीति तथा कार्यक्रम जेठ ११ मा

नारायण काफ्ले

काठमाडौँ, जेठ ८ गते ।  आर्थिक वर्ष २०७४/७५ को नीति तथा कार्यक्रम जेठ ११ गते व्यवस्थापिका संसद्मा पेस हुने भएको छ ।  सरकारका तर्फबाट राष्ट्रपति विद्यादेवी भण्डारीले संसद्मा नीति तथा कार्यक्रम पेस गर्नुहुनेछ ।  संवैधानिक व्यवस्था अनुसारका सरकारको वार्षिक नीति कार्यक्रम राष्ट्रपतिले पेस गर्ने अभ्यास छ ।  
यसैबीच राष्ट्रपति भण्डारीसँग प्रधानमन्त्री पुष्पकमल दाहाल ‘प्रचण्ड’ले आइतबार भेट गरी आर्थिक वर्ष २०७४/७५ को नीति तथा कार्यक्रमबारे जानकारी गराउनुभएको छ ।  राष्ट्रपति कार्यालय, शीतल निवासमा साँझ भएको भेटमा प्रधानमन्त्रीले नीति तथा कार्यक्रमबारे राष्ट्रपतिलाई जानकारी गराउनुभएको राष्ट्रपतिका प्रेस विज्ञ माधव शर्माले जानकारी दिनुभयो ।
यसअघि आइतबारै सरकारले आर्थिक वर्ष २०७४÷७५ को नीति तथा कार्यक्रम पारित गरेको छ ।
प्रधानमन्त्री निवास बालुवाटारमा आइतबार बिहान बसेको मन्त्रिपरिषद्को बैठकले सो नीति तथा कार्यक्रम पारित गरेको हो । “नीति तथा कार्यक्रममा राष्ट्रिय महŒवका सबै ठूला परियोजना समावेश गर्नुका साथै स्थानीय तहको निर्वाचन सम्पन्न गर्न र अरू दैनिक कामका लागि बजेट छुट्याइन्छ”, सूचना तथा सञ्चारमन्त्री सुरेन्द्रकुमार कार्कीले बताउनुुभयो ।
सरकारका प्रवक्ता कार्कीले नीति तथा कार्यक्रम संविधान कार्यान्वयनका साथै राष्ट्रिय परियोजना र  राष्ट्रिय पुनःसंरचनालाई तीव्रता दिनेतर्फ केन्द्रित रहेको जानकारी दिनुभयो ।  “बजेटबारे नेकपा (एमाले)लगायत प्रतिपक्षी दलका केही असहमति छन्”, उहाँले भन्नुभयो, “हामी त्यसबारे निरन्तर अन्तरसंवादमा छौँ, हिजो (शनिबार) मात्रै तीन प्रमुख दलबीच छलफल भएको छ, छलफल सकारात्मक रूपमा अगाडि बढिरहेको छ ।”
संसद् सचिवालयले नीति तथा कार्यक्रम र बजेटको कार्यतालिका अर्थ मन्त्रालयलाई पठाएको छ ।  यस्तै सभामुख ओनसरी घर्तीले कार्यतालिकाअनुसार प्रक्रिया अगाडि बढाउने विषयमा प्रमुख राजनीतिक दलका संसदीय दलका प्रमुख सचेतकसँग पनि आइतबार परामर्श गर्नुभएको छ ।  bidhya-555x335
कार्यतालिकाअनुसार सोमबार संसद्को अधिवेशन सुरु हुनेछ ।  यस्तै जेठ ९ गते संसद्मा सरकारका तर्फबाट विनियोजन विधयेकको सैद्धान्तिक छलफलका लागि अर्थमन्त्री कृष्णबहादुर महराले प्रस्ताव पेस गर्नुहुनेछ ।  संसद् सचिवालयले तयार पारी अर्थमा पठाएको कार्यतालिकाअनुसार यो पटक ‘प्रिबजेट’ छलफल जम्मा एक दिनमात्र हुने भएको छ ।  
नीति तथा कार्यक्रमको तयारीका लागि १० गतेको मिति तोकिएको छ ।  तयारीअनुसार ११ गते संसद्मा नीति तथा कार्यक्रम पेस हुनेछ ।  जेठ ११ गतेको पहिलो बैठकमा पेस भएको नीति तथा कार्यक्रम सोही दिनको दोस्रो बैठकबाट छलफल प्रारम्भ हुनेछ ।  
सचिवालयको कार्यतालिकाअनुसार जेठ १२ र १३ गते पनि नीति तथा कार्यक्रममा छलफल हुनेछ ।  नीति तथा कार्यक्रममाथिको संशोधनको समय पनि सोही अवधिलाई नै तोकिएको छ ।  आवश्यक परिमार्जनसहित नीति तथा कार्यक्रम पारित हुनेछ ।  
संवैधानिक प्रावधानअनुसार सरकारका तर्फबाट जेठ १५ गते संसद्मा बजेट पेस हुनेछ ।  बजेट पेसको समय भने तय भएको छैन ।  सरकारले नयाँ कार्यक्रम सामेल नगरी पुरानैलाई निरन्तरता दिने सर्तमा चुनावअघि बजेट ल्याउन दिन प्रमुख प्रतिपक्षी दल सहमत भएको थियो ।
सभामुखद्वारा परामर्श
बजेटको कार्यतालिका र अन्य समसामयिक विषयमा सभामुख ओनसरी घर्तीले प्रमुख दलका प्रमुख सचेतकसँग परामर्श गर्नुभएको छ ।  सभामुखले बजेटको कार्यतालिकासँगै संसद्को ‘बिजनेस’ व्यवस्थापनका विषयमा छलफल गर्नुभएको हो ।  
छलफलपछि एमाले प्रमुख सचेतक भानुभक्त ढकालले भन्नुभयो, “बजेटको कार्यतालिका लगायतका विषयमा छलफल भयो ।  विशेषगरी हाम्रो पार्टीको अडान नै मैले राखेँ ।  महाभियोग फिर्ता अधिवेशन सुरुसँगै हुनुपर्छ ।  संविधान संशोधनको प्रस्ताव चुनावअघि अघि बढ्न सक्दैन भनेँ । ”
संसद् अधिवेशन आजदेखि
यसैबीच संसद्को बजेट अधिवेशन सोमबारदेखि सुरु हुँदैछ ।  राष्ट्रपति विद्यादेवी भण्डारीले गत शुक्रबार नै अधिवेशन आह्वान गरिसक्नुभएको छ ।  सोमबार दिउँसो १ बजेका लागि बैठक बोलाइएको छ ।  जेठ ४ गते १३ महिना लामो अधिवेशन अन्त्य भए पनि जेठ १५ भित्र बजेट ल्याउनुपर्ने संवैधानिक दायित्वअनुसार चार दिनको अन्तरालमा तत्काल अधिवेशन बोलाइएको हो ।  

थप समाचार
प्रतिकृया
नाम

ईमेल

ठेगना