आँप उत्पादन ८० प्रतिशत कम

mango_2नेपालगञ्ज, जेठ ११ गते ।  मौसमी असर र हावाहुरीका कारण यो वर्ष बाँकेमा आँप उत्पादनमा निकै कमी आएको छ ।  गत वर्षभन्दा यो वर्ष आँप उत्पादनमा ८० प्रतिशत गिरावट आउने जिल्ला कृषि विकास कार्यालय बाँकेले जनाएको छ ।  गत वर्ष रूखमा लटरम्म आँप फलेर लाखौँ रुपियाँको आँप बिक्री गरेका किसान यसपालि कम फल्दा निराश छन् ।  
खजुरा गाउँपालिका सोनपुरका आँप उत्पादक कृषक काशीराम कँडेलले गत वर्ष एउटै रूखबाट पाँचदेखि १० हजार रुपियाँको आँप बिक्री गरेको जनाउँदै यो वर्ष घरमै खानाका लागि समेत नपुग्ने गरी रूखमा दाना लागेको बताउनुभयो ।  
यसपालि आँपमा फूल नै निकै कम लागेको चर्चा गर्दै उहाँले केही मात्रामा फुलेको आँप पनि दुई तीनपटक आएको हावाहुरीले झारेपछि आँप बिक्री गरेर पैसा कमाउने सपना मरिसकेको बताउनुभयो ।  
यो वर्ष जिल्लाका अधिकांश कृषकका लागि घरमा खानका लागि मात्र पनि मुस्किलले पुग्ने गरी रूखमा आँप बचेको उहाँले बताउनुभयो ।  
सक्रिय रूपमा फल्ने आँपका बोटमा यस वर्ष फूल र फल निकै कम देखिएको छ ।  लामो खडेरी र हावाहुरीले फूल र फल झरेपछि आँपको उत्पादनमा कमी आएको जिल्ला कृषि विकास कार्यालयले जनाएको छ ।  
मौसम परिवर्तन र हावाहुरीले आँप उत्पादनमा कमी आएको जिल्ला कृषि विकास कार्यालय बाँकेका सूचना अधिकारी धनबहादुर पुनले बताउनुभयो ।  
उहाँका अनुसार गत वर्ष बाँकेमा चार हजार २६० मेट्रिक टन आँप उत्पादन भएको थियो तर यो वर्ष एक हजार मेट्रिक टन मात्र आँप उत्पादन हुने अनुमान गरिएको छ ।  
यस वर्ष आँपको उत्पादन कम हुने भएपछि जिल्लाका अधिकांश आँप उत्पादन गर्ने किसान निराश देखिएका छन् ।  कृषकका अनुसार उत्पादन कम भएकाले मूल्यमा समेत वृद्धि हुने देखिएको छ ।  
बाँके जिल्लामा उन्नत प्रजातिका दसहरी, बाम्बेग्रिन, मालदह, लंगडा, गौरजित, सफेदा, अम्रपाली, मलिका, चौसा, फजलीलगायत स्थानीय जातका गरी करिब एक दर्जन जातका आँप फल्ने गरेका छन् ।  
जिल्लामा करिब दुई सयभन्दा बढी किसान व्यावसायिक आँप खेतीमा लागेका छन् भने ७३० हेक्टर क्षेत्रफलमा आँप उत्पादन हुँदै आएको छ ।  
जिल्लामा आँप उत्पादनमा धेरै कमी हुने भएपछि यहाँका अधिकांश उपभोक्ताले भारतबाटै आउने आँपमा निर्भर रहनुपर्ने भएको छ ।   

थप समाचार
प्रतिकृया
नाम

ईमेल

ठेगना