मन्त्रिपरिषद्मा अनुभवी मन्त्री

अजय शर्मा

काठमाडौँ, जेठ २५ गते ।  प्रधानमन्त्री शेरबहादुर देउवाले पहिलो चरणमा तीन उपप्रधानमन्त्री र चार मन्त्रीसहित आठ सदस्यीय मन्त्रिपरिषद् गठन गर्नुभएको छ ।  नवगठित मन्त्रिपरिषद्मा प्रधानमन्त्रीसहित नेपाली काँग्रेसका चार, नेकपा (माओवादी) केन्द्रका तीन र फोरम लोकतान्त्रिकका एक मन्त्री रहनुभएको छ ।
फोरम लोकतान्त्रिकबाट विजयकुमार गच्छदार उपप्रधान तथा सङ्घीय मामिला तथा स्थानीय विकास मन्त्री बन्नुभएको छ ।  त्यस्तै, माओवादी केन्द्रबाट कृष्णबहादुर महरा उपप्रधान तथा परराष्ट्र मन्त्री र जनार्दन शर्मा गृह मन्त्री, प्रभु शाह विना विभागीय मन्त्री बन्नुभएको छ ।
नेपाली काँग्रेसबाट गोपालमान श्रेष्ठ उपप्रधान तथा शिक्षा, ज्ञानेन्द्रबहादुर कार्की अर्थ र फरमुल्लाह मन्सुरलाई श्रम तथा रोजगार मन्त्रीको जिम्मेवारी दिइएको छ ।  नयाँ मन्त्रिपरिषद्मा सहभागी सात मन्त्रीमध्ये सबै यसअघि विभिन्न मन्त्रालयको जिम्मेवारी सम्हालिसक्नु भएको छ ।  प्रधानमन्त्री देउवा नै चौथो पटक प्रधानमन्त्री बन्नुभएको हो ।  
लोकतन्त्रको स्थापना २०६२/०६३ पछि गठन भएका सरकारमा महरा र गच्छदार ६/६ पटक मन्त्री बन्नुभएको छ ।  २०४८ साल देखिको गणना गर्दा विजयकुमार गच्छदार १३ पटक मन्त्री हुनु भएको छ ।  उहाँ २०६६ सालमा माधवकुमार नेपालको नेतृत्वमा गठित सरकारमा पहिलो पटक उपप्रधानमन्त्री बन्नुभएको थियो ।  
हाल पनि उपप्रधानमन्त्री तथा स्थानीय विकास मन्त्री बनेका गच्छदारको उपप्रधानमन्त्री भएको यो पाँचौ पटक हो ।  उहाँ २०६८ सालमा बाबुराम भट्टराई नेतृत्वको सरकारमा, २०७२ सालमा केपी शर्मा ओली नेतृत्वमा गठित सरकारमा पनि उपप्रधानमन्त्री बन्नुभएको थियो ।  minister
पहिलो संविधानसभाको निर्वाचनपछि बनेको माओवादी केन्द्रका अध्यक्ष पुष्पकमल दाहालल नेतृत्वको सरकारमा उहाँ भौतिक योजना मन्त्री बन्नुभएको थियो भने निवर्तमान प्रधानमन्त्री दाहालकै नेतृत्वको सरकारमा उपप्रधानमन्त्री तथा सङ्घीय मामिला तथा स्थानीय विकास मन्त्रीको जिम्मेवारीमा हुनुहुन्थ्यो ।  
यस्तै, गच्छदारपछि मन्त्रिपरिषद्मा धेरै पटक सहभागी हुनेमा कृष्णबहादुर महरा हुनुहुन्छ ।  उहाँ माओवादी केन्द्र सहभागी भएका दुई बाहेक सबै सरकारमा सहभागी हुनुहुन्छ ।  उपप्रधानमन्त्री तथा परराष्ट्रमन्त्री महरा २०६३ साल चैत महिनामा पहिलो पटक मन्त्री हुनुभएको हो ।  तत्कालीन प्रधानमन्त्री गिरिजाप्रसाद कोइरालाको नेतृत्वमा गठन भएको अन्तरिम सरकारमा उहाँ सूचना तथा सञ्चार मन्त्री बन्नुभयो ।  माओवादी केन्द्रले २०६४ भदौमा सरकार छोड्यो र पुनः तीन महिनापछि फेरि सरकारमा फर्कियो त्यति बेला पनि महरा फेरि सञ्चार मन्त्री हुनुभयो ।  
यस्तै २०६५ मा माओवादी केन्द्रका अध्यक्ष प्रचण्ड नेतृत्वको पहिलो निर्वाचित गणतान्त्रिक सरकारको सूचना तथा सञ्चार मन्त्री तथा सरकारको प्रवक्ता हुनुभयो ।  २०६७ माघमा बनेको झलनाथ खनाल नेतृत्वको सरकारमा उहाँ पहिलो पटक उपप्रधानमन्त्रीका साथै चौथो पटक सञ्चार मन्त्री बन्नुभएको थियो ।  महराले २०६८ मा झलनाथ खनाल नेतृत्वको सरकारमा गृह मन्त्रालयको जिम्मेवारी पाउनुभएको थियो ।  प्रचण्ड नेतृत्वको सरकारमा २०७३ सालमा दोस्रो पटक उहाँ उपप्रधानमन्त्रीका साथै अर्थ मन्त्रालय सम्हाल्नुभयो ।  बुधबार गठित काँग्रेस सभापति शेरबहादुर देउवाको सरकारमा समेत उहाँ उपप्रधान र परराष्ट्रमन्त्री बन्नुभएको छ ।  
नवगठिन सरकारमा गृहमन्त्रीको जिम्मेवारी पाउनुभएका माओवादी केन्द्रका नेता जनार्दन शर्मा प्रचण्ड नेतृत्वको सरकारमा ऊर्जा मन्त्री हुनुहुन्थ्यो ।  २०४८ सालमा गिरिजाप्रसाद कोइरालाको निर्वाचित सरकारमा नेपाली काँग्रेसका पूर्व उपसभापति गोपालमान श्रेष्ठले भौतिक योजना तथा निर्माण मन्त्री, वन तथा भूसंरक्षण मन्त्री र उद्योग मन्त्रीको रूपमा सहभागिता जनाउनुभएको थियो ।  
नेपाली काँग्रेसका केन्द्रीय सदस्य ज्ञानेन्द्र कार्की गिरिजाप्रसाद कोइरालाको पालामा २०६३ मा जलस्रोत मन्त्री बन्नुभएको थियो ।  यसपटक उहाँलाई अर्थमन्त्रालयको जिम्मेवारी दिइएको छ ।
नेपाली काँग्रेसकै केन्द्रीय सदस्य फरमुल्लाह मन्सुर गिरिजाप्रसाद कोइरालाको पालामा वातावरण, विज्ञान तथा प्रविधि मन्त्री बन्नुभएको थियो ।  उहाँ अहिले श्रम तथा रोजगार मन्त्री बन्नुभएको छ ।
यस्तै, प्रधानमन्त्री देउवाको नेतृत्वमा विना विभागीय मन्त्री हुनुभएका प्रभु शाह २०६७ मा झलनाथ खनाल नेतृत्वको सरकारमा पहिलो पटक कानुन तथा न्याय मन्त्री बन्नुभएको थियो ।  

थप समाचार
प्रतिकृया
नाम

ईमेल

ठेगना