खाद्यान्नको मूल्यमा राहत

foodकाठमाडौँ, जेठ २७ गते ।  खाद्यान्नमा न्यून मूल्य वृद्धिदरका कारण उपभोक्तालाई महँगीबाट राहत मिलेको छ ।  नेपाल राष्ट्र बैङ्कले शुक्रबार सार्वजनिक गरेको वैशाख महिनासम्मको आर्थिक तथा वित्तीय स्थितिसम्बन्धी प्रतिवेदनले खाद्य मुद्रास्फीति वगतका तुलनामा निकै कम रहेको उल्लेख गरेको हो ।  प्रतिवेदन अनुसार वैशाख महिनामा खाद्यान्नको मूल्य वृद्धिदर ०.२ प्रतिशत रहेको छ ।  अघिल्लो वर्षको वैशाखमा यो वृद्धिदर ९.६ प्रतिशत रहेको थियो ।  गत वर्षको आधार मूल्यको प्रभाव र आपूर्ति व्यवस्थामा भएको सुधारले समग्र मुद्रास्फितीमा कमी आएको राष्ट्र बैङ्कले जनाएको छ ।  
प्रतिवेदन अनुसार वैशाख महिनासम्म दलहन तथा गेडागुडीको मूल्यमा १३.४, तरकारीको मूल्यमा १३.१ र घ्यु तथा तेलको मूल्यमा १.९ प्रतिशतले कमी आएको छ ।  यद्यपि चिनी तथा चिनीजन्य पदार्थको मूल्यमा १२.७ प्रतिशत र मदिराजन्य पेय पदार्थको मूल्यमा १०.७ प्रतिशतले वृद्धि भएका प्रतिवेदनमा उल्लेख छ ।  गैरखाद्य क्षेत्रको मूल्य वृद्धि पनि गत वर्षको तुलनामा कम देखिएको छ ।  राष्ट्र बैङ्कका अनुसार गत वर्षको वैशाखमा १०.४ प्रतिशत रहेको गैरखाद्य मुद्रास्फिती चालू आवको
सीमक्षा अवधिमा छ प्रतिशत रहेको छ ।  लत्ताकपडा तथा जुत्ता, घरायसी सामान तथा सेवा, सञ्चार र स्वास्थ्यलगायतका वस्तुहरूको मूल्य वृद्धिदर गत वर्षको तुलनामा कम रहँदा समग्र गैरखाद्यवस्तुको मूल्य वृद्धिमा कमी आएको राष्ट्र बैङ्कले जनाएको छ ।  
दस महिनाको अवधिमा नेपालको समग्र अन्तर्राष्ट्रिय व्यापारअन्तर्गत निर्यात ९.८ प्रतिशतले वृद्धि भई ६१ अर्ब दुई करोड रुपियाँ पुगेको छ भने आयात ३४.९ प्रतिशतले बढेर आठ अर्ब ६८ करोड रुपियाँ पुगेको छ ।  समीक्षा अवधिमा भारततर्फको निर्यात १५ प्रतिशत, चीनतर्फ, ५.६ प्रतिशत र अन्य मुलुकमा ३.१ प्रतिशतले बढेको छ ।  
त्यस्तै भारतबाट हुने आयात ४३.७ प्रतिशत, चीनबाट हुने आयात १२.५ प्रतिशत र अन्य मुलुकबाट भएको आयात २६.९ प्रतिशतले बढेको छ ।  भन्सार नाकाका आधारमा वीरगञ्ज, विराटनगर, मेची, कैलाली र जलेश्वर भन्सार कार्यालयबाट हुने निर्यातमा कमी आएको छ ।  
राष्ट्र बैङ्कले दस महिनासम्मको तथ्याङ्कको आधारमा चालू आर्थिक वर्षमा नेपालको समग्र अर्थतन्त्र सकारात्मक हुने प्रक्षेपण गरेको छ ।  
त्यस्तै आगामी आर्थिक वर्षमा पुनः निर्माण, ठूला परियोजनाको कार्यान्वयन, तथा ऊर्जा आपूर्ति व्यवस्थापनमा नेपालको आर्थिक वृद्धिदर निर्भर रहने केन्द्रीय बैङ्कको आँकलन छ ।  पुनः निर्माणले गति लिएसँगै केही समयभित्रै नेपालको व्यापार सन्तुलन चापको अवस्थामा रहने प्रतिवेदनमा उल्लेख छ ।  विपे्रषण आप्रवाहको सुस्त वृद्धिले निक्षेप वृद्धिलाई समेत प्रभावित बनाएकोले आगामी दिनमा निक्षेप र कर्जा वृद्धिको अन्तर कम गर्दै लैजानुपर्ने राष्ट्र बैङ्कको सुझाव छ ।  

थप समाचार
प्रतिकृया
नाम

ईमेल

ठेगना