राष्ट्रिय राजनीतिलाई आकर्षित गर्दै विराटनगर

सुरेश यादव/जितेन्द्र ठाकुर

विराटनगर, असार १२ गते ।  नेपाली राजनीतिको ऐतिहासिक महत्व बोक्ने विराटनगर अहिले महानगरपालिका बनेको छ ।  महानगर बनेपछि पहिलो पटक हुन लागेको चुनावी स्पर्धा र सरगर्मी गाउँगाउँ, टोलटोल र घरघरमा छिरेको छ ।  दोस्रो चरणमा निर्वाचन हुन लागेको तीन वटा प्रदेशमा एक मात्र महानगरपालिका विराटनगरले अहिले राष्ट्रिय राजनीतिलाई नै आकर्षित गरिरहेको छ ।
निर्वाचनमा नेपाली काँग्रेस, नेकपा एमाले र सङ्घीय समाजवादी फोरम नेपालबीच ठूलो टक्कर हुने देखिएको छ ।  मतदाता रिझाउन विभिन्न चुनावी नारा र विकासे कार्यसूची लिएर यी दलहरू घरघरमा पुगिरहेका छन् ।  कसैले स्मार्ट सिटी त कसैले मेगासिटी अनि कसैले विराटनगरलाई औद्योगिक नगरी बनाउने सपना बाँड्दैछन् ।  
नेपाली राजनीतिमा लामो समय प्रभाव राख्ने बीपी कोइराला, मातृकाप्रसाद कोइराला र गिरिजाप्रसाद कोइराला जस्ता हस्ती जन्मेको ठाउँमा यसअघि पनि विभिन्न चुनाव उत्तिकै रोचक थिए ।  विसं २०५४ सालदेखि २०७० सालको दोस्रो संविधानसभासम्मका चुनावमा काँग्रेसले नै पकड जमाएको थियो भने २०५४ सालको स्थानीय निर्वाचनमा भने एमालेले तत्कालीन नगरमा विजय हासिल गरेको थियो ।
नयाँ संरचनाअनुसार साविकको वैजनाथपुर गाविस र बुधनगरको १, ३ र ५ वडा समावेश गरी बनेको विराटनगर महागरपालिकाका प्रमुख, उपप्रमुख लगायतमा अन्य उम्मेदवार प्रचारप्रसारको अन्तिम दिन आइतबार घरदैलौ कार्यक्रममा व्यस्त भए ।  महानगरपालिका प्रमुखमा १४ जना र उपप्रमुखमा ११ जनाको उम्मेदवारी परेको छ ।  
नेपाली काँग्रेसका तर्फबाट भीम पराजुली प्रमुख र इन्दु कार्की उपप्रमुख, माओवादी केन्द्र र सङ्घीय समाजवादी फोरमको गठबन्धनले प्रमुखमा उमेश यादव र उपप्रमुखमा नविता न्यौपाने, एमाले र विजयकुमार गच्छदारको नेतृत्वको लोकतान्त्रिक फोरमका गठबन्धनबाट प्रमुखमा विनोद ढकाल र उपप्रमुखमा सुची चौधरीको त्रिपक्षीय प्रतिस्पर्धा विराटनगरमा अहिले चर्चाको विषय बनेको छ ।
कुल दुई लाख १४ हजार ६६३ जनसङ्ख्या रहेको विराटनगर महानगरपालिकामा एकलाख १४ हजार १७६ मतदाता छन् ।  केन्द्रीय राजनीति र नेताको प्रभाव देखाउने थलोका रूपमा रहेको विराटनगरमा उम्मेदवार छनोटमा समेत ढिलाइ भएको थियो ।  निर्वाचनको मिति नजिकिँदै जाँदा सबै दलका उम्मेदवारले केन्द्रीय आँगनमा ल्याएर चुनावी चाप र ताप शिखरतिर लैजान लाग्दा मौन अवधि आरम्भ भइसकेको छ ।  आइतबार राति १२ बजेदेखि मौन अवधिले छोएको छ ।
एमालेले २०५४ सालमा भएको स्थानीय चुनावमा विराटनगर नगरपालिकाको प्रमुख उपप्रमुखसहित २२ वटा वडामध्ये १३ वटा वडामा जित हासिल गरेको थियो ।  त्यस निर्वाचनमा एमालेका रमेशचन्द्र पौडेलले काँग्रेसका अमृत अर्याललाई प्रमुखमा र काँग्रेसका उपेन्द्रकान्त लाललाई एमालेका भूराज राईले उपप्रमुखमा पराजित गरेको विगत छ ।  उति बेला विजयका झन्डा फहराउने नेता भने अहिले त्यही रूपमा चर्चामा हुनुहुन्न ।  पौडेल एमालेमै रहे पनि सक्रिय हुनुहुन्न भने भूराज राई सङ्घीय समाजवादी फोरम नेपालमा हुनुहुन्छ ।
 विराटनगर महानगरपालिकामा तीनवटा चुनावी संसदीय क्षेत्र ५, ६ र ७ छन ।  तीन वटै क्षेत्रबाट काँग्रेसले पछिल्लो सविधानसभाको चुनाव जितेको छ ।  पाँच नम्बर क्षेत्रमा अमृत अर्यालले उपेन्द्र यादवलाई हराउनुभएको थियो भने ६ नम्बर क्षेत्रमा महेश आचार्यले फोरम लोकतान्त्रिकका भक्ति माझीलाई हराउनुभएको थियो ।  
क्षेत्र नम्बर ७ मा डा. शेखर कोइरालाले विजयकुमार गच्छदारलाई हराउनुभएको थियो ।  
विसं २०७० मा यी तीन क्षेत्रमा काँग्रेस पहिलो नम्बरमा आए पनि २०६४ सालको पहिलो संविधानसभा चुनावमा मधेसी जनअधिकार फोरमले (हालको सङघीय समाजवादी फोरम) पहिलो स्थान हासिल गरेको थियो ।  गत संविधानसभामा नगरसँग जोडिएका तीन निर्वाचन क्षेत्रमध्ये ५ र ६ मा एमाले चौथो स्थानमा थियो भने ७ मा तेस्रो स्थानमा थियो ।  प्रत्यक्षतर्फको निर्वाचनमा पहिलो स्थानमा काँग्रेस, दोस्रोमा फोरम, तेस्रोमा माओवादी र चौथो स्थानमा एमाले थियो ।  
विसं २०७० को संविधानसभा चुनावको समानुपातिक मत परिणाममा भने काँग्रेस २९ हजार मत हासिल गरेर पहिलो, राप्रपा २३ हजार मत हासिल गरेर दोस्रो, फोरम नेपाल १८ हजार मत हासिल गरेर तेस्रो र लोकतान्त्रिक फोरम १५ हजार मत हासिल गरेर चौथो भएका थिए ।  त्यस्तै माओवादी केन्द्र र एमालेले ११–११ हजार मत ल्याएका थिए ।  संविधानसभा २०६४ मा भने समानुपातिकतर्फ फोरमले ५८ हजार, काँग्रेसले ३२ हजार, एमालेले १५ हजार र माओवादीले १३ हजार मत ल्याएको थियो ।  पहिलो सविधानसभामा पहिलो स्थान हासिल गरेका फोरम नेपाल दोस्रो सविधानसभा चुनावमा तेस्रो स्थानमा झरेको थियो भने नेपाली काँग्रेसले आफ्नो स्थान कायम राखेको थियो ।  

थप समाचार
प्रतिकृया
नाम

ईमेल

ठेगना