ठेकेदारको कार्यशैली अझै सुध्रिएन

thekedarभैरहवा, साउन ५ गते ।  भैरहवामा निर्माणाधीन राष्ट्रिय गौरवको  अन्तर्राष्ट्रिय गौतमबुद्ध विमानस्थल निर्माणको काम अझै  निकै सुस्त गतिमै अगाडि बढेको छ ।  
करिब दुई महिनादेखि सीमित जनशक्ति र साधनबीच काम सुरु गरेको चिनियाँ कम्पनीले अहिलेसम्म ५० प्रतिशत काम सम्पन्न गरिसक्नु पर्नेमा गौतम बुद्ध विमानस्थल स्तरोन्नति आयोजनाको कार्यालयले असार १५ सम्म समय सीमा दिएर ४० प्रतिशत पूरा गरी काममा प्रगति गरेको देखाउन भने पनि त्यो समेत  पूरा गर्न सकेन ।  हामीले कामको प्रगतिका लागि सीमा तोकेका थियौं, सीमाअनुसार जुन महिनाकोे अन्त्यसम्म ४० प्रतिशत काम पूरा हुनुपर्ने थियो तर अहिले ३० प्रतिशत मात्र सकिएको छ, गौतम बुद्ध विमानस्थल स्तरोन्नति आयोजनाका प्रमुख ओम शर्माले भन्नुभयो, पहिलो कुरा ठेकेदार कम्पनीले राम्रोसँग काम गर्न सकेन, अर्कोतर्फ वर्षा लागेको छ, निर्वाचनले पनि केही हदसम्म काम प्रभावित भएको थियो ।
स्थानीय निकाय निर्वाचनका कारण  पनि विमानस्थल निर्माण कार्य ओझेलमा परेको उहाँले दाबी गर्नुभयो ।  अहिले काममा ढिलो भयो, छिटो काम गर्नुप¥यो भनेर दबाब दिन जाने कोही छैनन्, जसले गर्दा अहिले निर्माणाधीन विमानस्थल ओझेलमा परेको हो, हेभी इक्युपमेन्ट व्यवसायी सङ्घ रूपन्देहीका अध्यक्ष महेश भट्टले भन्नुभयो ।
विमानस्थल निर्माणको जिम्मा पाएको चिनियाँ कम्पनी नर्थवेस्ट सिभिल एभिएसन प्रालि र उक्त कम्पनीलाई सहयोग गर्दैआएको स्थानीय सप्लायर्स नर्थवेस्ट नेपाल इन्फ्रा प्रालिबीचको करिब चार महिनाअघि सुरु भएको विवादले निर्माण कार्य पूर्ण रूपमा प्रभावित भएको थियो ।
अझै पनि केही बिग्रिएको छैन, मासिक छ प्रतिशतका दरले काम सम्पन्न गर्दैजाने हो भने पनि तोकिएको समयभित्र विमानस्थल निर्माण सम्पन्न हुन्छ, आयोजना प्रमुख शर्माको दाबी छ ।  अप्ठेरो काम सकिएकाले सजिलो काम मात्र बाँकी रहेको उहाँले बताउनुभयो ।  शर्माका अनुसार अहिले टर्मिनल बिल्डिङको निर्माण कार्य सुरु भएको छ ।
विमानस्थल पार्किङ एरिया निर्माणसँगै रन वेमा ग्राभेल गरी सम्याउने काम सुरु भएको शर्माले बताउनुभयो ।  जनशक्ति र स्रोतसाधन थप्नका लागि हामीले दबाब दिइरहेका छौं ।  अहिले करिब १३५ जनाले काम गरिरहेको छन्, शर्माले भन्नुभयो ।
गत  जुन महिनाभित्रै  ५० प्रतिशत काम सम्पन्न हुनुपर्ने थियो ।  जम्मा ३० प्रतिशत मात्र भएको छ ।  विगतमा तराई मधेस आन्दोलन र नाकाबन्दीले निर्माण प्रभावित भएको थियो ।  हाम्रो चाहना पनि जुन कम्पनीले सुरुदेखि नै काम गरेको छ त्यही कम्पनीले सम्पन्न गरोस् भन्ने हो, शर्माले भन्नुभयो ।  कम्पनीले काम गर्न सकेन भनेर हटायो भने फेरि नयाँ प्रक्रियाबाट सुरु गर्नु पर्दा अतिरिक्त दुई वर्ष लाग्ने भएकाले पनि यहीँ कम्पनीलाई निरन्तरता दिएर काम अघि बढाउनुपर्ने पक्षमा आयोजना रहेको शर्माले बताउनुभयो ।
पछिल्लो दुई महिनामा चिनियाँ निर्माण कम्पनीले १३ करोड ८० लाख रुपियाँ भुक्तानी लगेको छ ।  कार्यालयका अनुसार अहिले दैनिक एक करोड रुपियाँ बराबरको काम गर्नुपर्छ तर निर्माण कम्पनीले त्यस अनुरूप गर्न सकेको छैन ।  चिनियाँ कम्पनीले यसअघि अग्रिम भुक्तानी बापत ८८ करोड र काम गरेको बिलअनुसार ५३ करोड गरी जम्मा एकअर्ब ३१ करोड भुक्तानी लिइसकेको छ ।
गौतम बुद्ध विमानस्थललाई स्तरोन्नति गरी अन्तर्राष्ट्रिय विमानस्थलका रूपमा निर्माण गर्न चिनियाँ कम्पनी नर्थ वेस्ट सिभिल एभिएसनलाई एसियाली विकास बैङ्क (एडीबी) को ऋण सहयोगमा छ अर्ब २२ करोड ५१ लाख २० हजार २२७ रुपियाँमा ग्लोबल टेन्डरबाट सन् २०१७ डिसेम्बर ३१ सम्म सम्पन्न गर्ने सम्झौता गरिएको थियो ।  

थप समाचार
प्रतिकृया
नाम

ईमेल

ठेगना