अब केन्द्रीय समिति सङ्ख्या सयभन्दा कम

राजेश चाम्लिङ राई

काठमाडौँ, साउन ८ गते ।  नेकपा (माओवादी केन्द्र)ले आफ्नो जम्बो केन्द्रीय समिति घटाएर दुई अङ्कमा झार्ने भएको छ ।  छ दिनसम्म पार्टी मुख्यालयमा चलेको बैठकको अन्तिम दिन अध्यक्ष पुष्पकमल दाहाल ‘प्रचण्ड’ले १२ बुँदे प्रस्ताव राख्दै केन्द्रीय समितिको सङ्ख्या घटाउने प्रस्ताव गर्नुभएको हो ।  
बैठकले अबको केन्द्रीय समिति सदस्यको सङ्ख्या ९९ मात्र बनाउने निर्णय गरेको छ ।  यद्यपि यो निर्णयको कार्यान्वयन गर्न भने केही समय लाग्नेछ ।  बैठकले आगामी भदौ १५ गतेभित्र सातवटै प्रदेशको भेला आयोजना गरेर यो निर्णय पारित गराएपछि मात्र निर्णय कार्यान्वयन हुनेछ ।  ucpn maobadi
सचिवालय सदस्य सावित्रीकुमार काफ्लेका अनुसार बैठकले सचिवालयलाई नै केन्द्रीय कार्यसमितिमा रूपान्तरण गर्नेछ ।  
यसअघि पनि केन्द्रीय सदस्यको सङ्ख्या बढीमा ९९ बनाउने निर्णय गरिएको थियो तर केन्द्रीय सदस्य बन्ने आकाङ्क्षी अत्यधिक भएपछि चार हजार जनाको महाधिवेशन आयोजक समिति बनाइएको थियो ।  
गत माघमा महाधिवेशन गर्ने भन्दै आयोजक समिति बनाइए पनि स्थानीय चुनावमा जानुपर्ने भएपछि महाधिवेशन हुन सकेको छैन ।  बैठकमा सङ्ख्या घटाउनेबारे सैद्धान्तिक सहमति भए पनि कसलाई कसरी घटाउने भन्ने स्पष्ट नीति बनेको छैन ।  
बैठकमा अध्यक्ष प्रचण्डले आगामी दिनमा प्रत्यक्ष निर्वाचित कार्यकारी प्रमुख र पूर्ण समानुपातिक निर्वाचन प्रणालीलाई लिएर नयाँ आन्दोलनको कार्यक्रम तय गर्ने प्रस्तावसमेत गर्नुभएको छ ।  
सचिवालय सदस्य सुरेशकुमार राईका अनुसार यी दुवै प्रस्तावलाई संविधान संशोधनका लागि भइरहेको प्रयासका क्रममा पनि समावेश गरिनेछ ।  संविधान संशोधनकै क्रममा यी दुई विषयका साथै संविधान जारी गर्दा राखिएको फरक मतका बुँदालाई समेटेर पार्टीले नयाँ कार्यक्रम बनाउने छ ।  
माओवादीले संविधान जारी गर्दा यी दुवै विषय नसमेटिएपछि यसमा फरक मत राख्दै संविधानमा हस्ताक्षर गरेको थियो ।  बैठकले चुनावमा पार्टी हित र निर्णयविपरीत काम गर्ने नेता तथा कार्यकर्तालाई कारबाही गर्न प्रत्येक प्रदेशमा तीन÷तीन सदस्यीय समिति बनाउने निर्णय पनि गरेको छ ।  समितिले दिने प्रतिवेदनका आधारमा पार्टीलाई अन्तर्घात गर्ने, विद्रोही उम्मेदवारी दिने वा पार्टीको आधिकारिक उम्मेदवारलाई सहयोग नगर्नेमाथि कारबाही गरिने बताइएको छ ।  
यसबाहेक माओवादीले सङ्घीय चुनावको प्रतिबद्धतापत्रको मस्यौदा बनाउन नारायणकाजी श्रेष्ठको संयोजकत्वमा समिति बनाएको छ ।  यसबाहेक प्रदेशसभाको चुनावका लागि उम्मेदवार छनोटका लागि रामबहादुर थापाको संयोजकत्वमा समिति बनाइएको छ ।  
माओवादीले साउन २० देखि २२ गतेसम्म पार्टीका तर्फबाट निर्वाचित प्रतिनिधिको भेला गर्ने निर्णय गरेको छ ।  त्यस्तै अन्य पार्टीसँगको एकताका लागि अपिल गर्ने निर्णय पनि गरेको छ ।  मुख्यतः माओवादीबाट फुटेर छुट्टै पार्टी बनाएका पार्टीहरूलाई समेट्न एकताको आह्वान गरिने बताइएको छ ।  
बैठकमा निर्णयार्थ प्रस्तावका बुँदा पेस गर्ने क्रममा प्रचण्डले स्थानीय तहको निर्वाचनमा ठूलो पार्टी बनेको एमाले परिवर्तनका एजेन्डालाई संस्थागत गर्नेबारेमा निराशावादी ढङ्गले प्रस्तुत भइरहेको उल्लेख गर्दै परिवर्तनका मुद्दा स्थापित गर्न माओवादीले महìवपूर्ण भूमिका निर्वाह गर्नुपर्ने बताउनुभएको थियो ।  
पार्टी सचिवालय सदस्य तथा जिल्ला इञ्चार्जहरूसमेत सहभागी बैठकका सम्पूर्ण विषय स्पष्ट पार्न आइतबार पार्टी मुख्यालय पेरिसडाँडामा पत्रकार सम्मेलन आयोजना गरिने भएको छ ।  पत्रकार सम्मेलनमा अध्यक्ष प्रचण्डले सबै विषय स्पष्ट ढङ्गले राख्ने प्रवक्ता पम्फा भुसालले जानकारी दिनुभयो ।  

थप समाचार
प्रतिकृया
नाम

ईमेल

ठेगना