काँग्रेस बैठकमा निर्वाचन समीक्षा


नारद गौतम/राधा चालिसे

काठमाडौँ, साउन ९ गते ।  नेपाली काँंग्रेसलाई सशक्त र गतिशील पार्टी बनाउँदै मुलुकलाई शान्ति, समृद्धि र स्थायित्वतर्फ अग्रसर गराउन केन्द्रीय सदस्यहरूले जोड दिनुभएको छ ।  शनिबारबाट जारी नेपाली काँग्रेस केन्द्रीय समितिको बैठकमा आइतबार केन्द्रीय सदस्यहरूले यस्तो जोड दिनुभएको हो ।  
‘मुलुकमा शान्ति, समृद्धि र स्थायित्वका लागि पार्टीलाई गतिशील बनाउन नेतृत्वलाई विस्तृत सुझाव दिइएको छ,’ एक जना केन्द्रीय सदस्यले बैठकको सार सुनाउनुभयो ।  बैठकमा स्थानीय निर्वाचनमा भएको कमीकमजोरीलाई सबैले जिम्मेवारी लिई आगामी दिनमा सुधार गर्दै लैजान पनि जोड दिएको थियो ।
बैठकमा केन्द्रीय सदस्यहरूले भर्खरै सम्पन्न स्थानीय निर्वाचनको समीक्षा, संविधान संशोधन, मन्त्रिपरिषद्को विस्तार, पार्टीको संसदीय बोर्ड र विभागहरू गठन गरेर काँग्रेस सशक्त र गतिशील पार्टीको रूपमा अगाडि बढाउनुपर्नेमा जोड दिनुभएको केन्द्रीय सदस्यको भनाइ छ ।  बैठकमा पार्टी सभापति एवम् प्रधानमन्त्री शेरबहादुर देउवाले काँंग्रेसको बैठक सकिएपछि मन्त्रिपरिषद्लाई विस्तार गर्ने र पार्टीको विभागहरू गठन गर्ने जानकारी बैठकलाई दिनुभएको थियो ।  nc
गोरखापत्रसँग कुरा गर्दै केन्द्रीय सदस्य बालकृष्ण खाँडले आइतबारको केन्द्रीय समितिको बैठकमा बढी समय स्थानीय तह निर्वाचनको समीक्षा भएको बताउनुभयो ।  उहाँले बैठकमा वक्ताहरूले निर्वाचनमा काँग्रेसले आफ्नो सम्पूर्ण शक्ति किन लगाउन सकेन भनेर प्रश्न उठाएको जानकारी दिनुभयो ।  
बैठकमा मन्त्रिपरिषद्लाई पूर्णता दिन भएको ढिलाइ र पार्टीको कार्यसमिति र विभागलाई पूर्णता दिने विषयमा केन्द्रीय सदस्यले जिज्ञासा राख्नुभएको थियो ।  सदस्यहरूले राख्नुपर्ने भएको जिज्ञासामा प्रधानमन्त्री एवम् पार्टी सभापति देउवाले सरकारमा सहभागी हुने दलहरूबाट मन्त्रीहरूको नाम प्राप्त भएपछि मन्त्रिपरिषद्को विस्तार छिट्टै हुने जानकारी बैठकलाई गराउनुभएको थियो ।  ‘प्रधानमन्त्रीले कुन पार्टीलाई कुन मन्त्रालय दिने ठ्याक्कै टुङ्गो भइनसकेकाले मन्त्रिपरिषद् विस्तारमा ढिलाइ भएको हो’, पार्टीको केन्द्रीय समितिको बैठक सकिएपछि अविलम्ब मन्त्रिपरिषद्ले पूर्णता पाउने जानकारी पनि बैठकलाई गराउनुभएको नेता खाँडले बताउनुभयो ।  
पार्टीलाई गतिशील बनाउन पार्टीका नेताहरूलाई जिम्मेवारी दिनुपर्ने माग गरेपछि सभापति देउवाले अविलम्ब विभागहरूको गठन हुने जानकारी दिनुभयो ।  बैठकमा पार्टीको संसदीय बोर्ड गठन गर्न, संविधान संशोधनको प्रक्रियालाई अगाडि बढाउन र पार्टीलाई शत प्रतिशत एकीकृत गरेर लैजान धेरै जना केन्द्रीय सदस्यहरूले दोहो¥याउनुभएको थियो ।  
केन्द्रीय सदस्यहरूले संविधान कार्यान्वयनको मुख्य जिम्मेवारी काँग्रेसको काँधमा आएकाले मुलुकका सबै भूभागका नागरिकलाई समेटेर लैजान र द्वन्द्व सिर्जना नहुने गरी काम गर्न नेतृत्वलाई सुझाव दिनुभएको छ ।  
 बैठकमा दुई चरणको निर्वाचनको समीक्षा गर्दै निर्वाचन परिणामको सम्पूर्ण केन्द्रीय सदस्यहरू भागिदार भएको पदीय हिसाबले कमबेसीमात्र भएको धारणा वक्ताहरूले राखेका केन्द्रीय सदस्य बहादुरसिंह लामाले बताउनुभयो ।  
 त्यस्तै प्रदेश नं २ मा हुने आगामी निर्वाचनको लागि अवश्यक रणनीति बनाउनुपर्ने र पार्टीका भातृ सङ्गठन र विभिन्न विभागहरूलाई पनि जिम्मेवारी तोकेर परिचालन गर्नुपर्ने सुझाव पनि केन्द्रीय सदस्यहरूले दिएको उहाँले बताउनुभयो ।  उहाँका अनुसार अधिकांश वक्ताहरूले पार्टीभित्रको भागबन्डाको संस्कृति अन्त्य हुनुपर्नेमा जोड दिनुभएको थियो ।  
अर्का सदस्य अम्बिका बस्नेतले सङ्गठन सुदृढीकरणमा जोड दिनुपर्ने धेरै सदस्यहरू राखेको बताउनुभयो ।  संविधान संशोधनका लागि सबैलाई साथ लिएर जानुपर्नेमा पनि सदस्यहरूको गहन मत भएको उहाँले जानकारी दिनुभयो ।  
शनिबार र आइतबार गरी ४१ सदस्यले अघिल्ला चरणको निर्वाचनमा आफूहरूले भोगेका अनुभव र भएका कमीकमजोरीबारे समीक्षा गरेका थिए ।  
आइतबारको बैठकमा केन्द्रीय सदस्यहरू डा नारायण खड्का, डा. मिनेन्द्र रिजाल, दिलेन्द्रप्रसाद बडु, एनपी साउद, अर्जुनप्रसाद जोशी, जीवनबहादुर शाही, नवीन्द्रराज जोशी, अम्बिका बस्नेत, पुष्पा भुसाल, गगनकुमार थापा, बद्री पाण्डे, जीवन परियार, ईश्वरी न्यौपाने, सीता गुरुङ, केशवकुमार बुढाथोकी, श्यामकुमार घिमिरे, मोहनबहादुर बस्नेत, वीरबहादुर बलायर, रमेश लेखक र किरण यादवले धारणा राख्नुभएको थियो ।  बैठक सोमबार बिहान ११ बजे पुनः बस्ने पार्टी सचिवालयले जानकारी दिएको छ ।  

थप समाचार
प्रतिकृया
नाम

ईमेल

ठेगना