चैते धानको खेती सफल हुँदै

देउखुरी, साउन ९ गते ।  वर्षमा दुईपटक गरिने धान खेती दाङमा सफल बन्दै गएको छ ।  राजपुर गाउँपालिका गुरुङखोलाका किसान लालबहादुर बुढाले चैते धान खेती गर्न थालेको दुई वर्ष भएको छ ।  प्रशस्त पानी हुने ठाउँमा चैते धानको सफल उत्पादन भएपछि जिल्लाका विभिन्न स्थानमा यो धान खेती गर्ने किसान थपिँदै जान थालेका छन् ।  गुरुङ खोलाका किसान बुढासहित त्यस भेगका किसानले यो वर्ष २२ हेक्टर क्षेत्रफलमा चैते धान लगाएर अहिले भित्र्याएका छन् । chaite dhan_1
बर्सेनि धान उत्पादन दर घट्दै जाँदा जिल्ला कृषि विकास कार्यालयले चैत महिनामा धान लगाएर उत्पादन बढाउन सकिने कार्यक्रम ल्याएपछि किसानहरू पनि हौसिएका छन् ।  कृषि कार्यालयले सिँचाइ सुविधा भएका र ब्लकै बनाएर चैते धान खेतीलाई प्रवद्र्धन गर्न थालेको माटोविज्ञ दिगम्बर यादवले बताउनुभयो । चैते धान प्रतिहेक्टरमा ५१ क्विन्टल २५ किलोसम्म फल्ने गरेको छ भने वर्षे धान ४० क्विन्टल ६५ किलोसम्म फलेको मापन भएको कृषि कार्यालयले जानकारी दिएको छ ।  उत्पादनमा पनि बढी हुने र दुईपटक लगाउन सकिने भएपछि प्रशस्त पानी हुने क्षेत्रका किसान यसतर्फ आकर्षित बन्दै गएको यादवको भनाइ छ ।

उन्नत बीउले चैते धान उत्पादनमा वृद्धि  
यसैबीच तनहुँ समाचारदाताका अनुसार यो वर्ष तनहुँमा चैते धान उत्पादनमा पाँच प्रतिशत वृद्धि भएको जिल्ला कृषि विकास कार्यालय तनहुँले जनाएको छ ।  कृषकहरू उन्नत जातको बीउलाई प्राथमिकता दिनु तथा मौसम पनि अनुकूल भएकाले उत्पादनमा वृद्धि भएको कार्यालयकी सूचना अधिकृत शशी अधिकारीले जानकारी दिनुभयो ।  अधिकृत अधिकारीका अनुसार तनहुँमा यो वर्ष तीन हजार ६९५ हेक्टर जमिनमा चैते धान लगाइएकोमा उत्पादन १३ हजार ९५० मेट्रिक टन धान उत्पादन भएको छ ।  गत वर्ष सोही क्षेत्रफलमा धान लगाइएकोमा उत्पादन १३ हजार ३०२ मेट्रिक टन भएको थियो ।  कार्यालयले कृषकलाई चैते धानको उन्नत  बीउ ५० प्रतिशत अनुदान दिएको थियो ।  कृषि अनुसन्धान केन्द्रबाट ल्याइएको हर्दिनाथ–१ र चैते–२ जातको उन्नत बीउ अनुदानमा दिइएको कार्यालयका वरिष्ठ कृषि विकास अधिकृत चेतनाथ अधिकारीले जानकारी दिनुभयो ।  
अधिकृत नवराज पण्डितका अनुसार तनहुँलाई धानमा आत्मनिर्भर र चैते धानको क्षेत्रफल बढाउन १० रोपनी भन्दा बढी क्षेत्रफलमा धान लगाउने कृषकका लागि बाली बीमाको ७५ प्रतिशत प्रिमियम रकम कार्यालयले दिने व्यवस्था गरिएको छ ।  बीमाबाट लागतको नभई उत्पादनको आधारमा क्षतिपूर्ति दिने व्यवस्था गरिएको छ ।  कार्यालयले जिल्लालाई धान खेतीमा आत्मनिर्भर बनाउने क्रममा चुँदीरम्घाको फाँटलाई चैते धानको नमुना फाँट बनाउन लागेको छ ।  चुँदीको फाँटलाई चैते धानको उच्च सम्भावना भएको फाँटहरूको छनोट गरिएको कार्यालयले जनाएको छ ।
 

थप समाचार
प्रतिकृया
नाम

ईमेल

ठेगना