लक्ष्यभन्दा १६ प्रतिशतले बढ्यो आयकर

काठमाडौँ, साउन १२ गते ।  आन्तरिक राजस्व विभागले गत आर्थिक वर्षमा लक्षितभन्दा १९ प्रतिशत बढी आयकर सङ्कलन गरेको छ ।  विभागले सार्वजनिक गरेको तथ्याङ्क अनुसार गत आवमा आयकरबापत एक खर्ब ४८ अर्ब २३ करोड ६० लाख ८६ हजार रुपियाँ राजस्व प्राप्त भएको छ ।  सरकारले सो आर्थिक वर्षका लागि आयकरबापत  एक खर्ब २७ करोड ५५ लाख रुपियाँ सङ्कलन गर्ने लक्ष्य राखेको थियो ।  सङ्कलित आयकर गत आवभन्दा अघिल्लो आर्थिक वर्षका तुलनामा २७ प्रतिशतले बढी हो ।  
विभागले मङ्गलबार गत आर्थिक वर्षको समीक्षा गर्दै समग्र राजस्व सङ्कलन लक्ष्यभन्दा ११ प्रतिशतले वृद्धि भएको तथ्याङ्क सार्वजनिक गरेको हो ।  विभागका अनुसार गत आवमा दुई खर्ब ३३ अर्ब ६० करोड ५० लाख १७ हजार रुपियाँ राजस्व सङ्कलन गर्ने लक्ष्य रहेकोमा असार मसान्तसम्म दुई खर्ब ५८ अर्ब १७ करोड ४९ लाख ८५ हजार रुपियाँ सङ्कलन भएको जनाएको छ ।  सङ्कलित राजस्व अघिल्लो आर्थिक वर्षको तुलनामा भने २७ प्रतिशतले बढी हो ।data  
शीर्षकगतरूपमा मूल्य अभिवृद्धि कर लक्ष्यभन्दा तीन प्रतिशत बढी अर्थात् ६१ अर्ब १२ करोड ३ लाख ८५ हजार रुपियाँ सङ्कलन भएको छ ।  गत आवमा सरकारले मूल्य अभिवृद्धि करबापत ५८ अर्ब ३२ करोड ८७ लाख रुपियाँ सङ्कलन गर्ने लक्ष्य राखेको थियो ।  यो राजस्व गत आवभन्दा अघिल्लो आवको तुलनामा भने २३ प्रतिशतले बढी हो ।  
अन्तःशूल्कबापत गत आवमा ४७ अर्ब २१ करोड ५४ लाख रुपियाँ सङ्कलन भएको विभागले जनाएको छ जुन अघिल्लो आवको तुलनामा ३० प्रतिशतले बढी हो ।  बहालकरबापत चालिस करोड ५८ लाख ७९ हजार, ब्याजकरबापत ८५ करोड ९३ लाख १३ हजार, शिक्षा सेवा शुल्कबापत ७३ करोड ९७ लाख २५ हजार र स्वास्थ्य सेवा शुल्क ८६ करोड ३३ लाख ६६ हजार रुपियाँ सङ्कलन भएको छ ।  
समीक्षा कार्यक्रममा विभागका महानिर्देशक किशोरजंग कार्कीले कर प्रशासनको मिहिनेतका कारण लक्ष्यभन्दा बढी राजस्व सङ्कलन गर्न सफल भएकोले चालु आवमा पनि तोकिएको लक्ष्यभन्दा बढी राजस्व उठाउन सबैले जिम्मेवार भएर काम गर्नुपर्ने भनाइ राख्नुभएको थियो ।  
सरकारले चालु आर्थिक वर्षमा करिब तीन खर्ब रुपियाँ बराबरको राजस्व सङ्लनको लक्ष्य राखेको छ ।  

थप समाचार
प्रतिकृया
नाम

ईमेल

ठेगना