दोब्बर बढ्यो तरकारीको भाउ


सीता शर्मा

काठमाडौँ, भदौ ८ गते । कलङ्कीबाट कालिमाटी तरकारी बजारमा किनमेलका लागि आउनुभएकी रिता अधिकारी मङ्गलबार अलमलमा देखिनुहुन्थ्यो । व्यापारीले अधिकांश तरकारीको भाउ बढेको बताएपछि गोरखापत्रसँग उहाँले भन्नुभयो ‘जुन् तरकारीको भाउ सोधे पनि उत्तिकै महँगो छ । कुन किन्ने कुन ?’ कलङ्कीबाटै आउनुभएका विजयी अधिकारीको अनुभव पनि उस्तै छ । महँगो पैसा तिरेर पनि राम्रो तरकारी पाउन नसकेको उहाँको गुनासो थियो । 

दुवै अधिकारीको भनाइजस्तै पछिल्ला केही दैनिक उपभोग्य तरकारीको मूल्य अघिल्लो वर्षको यसै समयको तुलनामा दोब्बरले बढेको छ । डेढ साताअघि देशका विभिन्न ठाउँमा आएको बाढी, पहिरो र डुबानका कारण तरकारी आयातमा अवरोध पुगेपछि बजारमा तरकारीको भाउ बढेको व्यापारीहरू बताउँछन् । लगातारको वर्षाका कारण महँगिएको तरकारीको भाउले उपभोक्ता मात्रै हैन व्यापारीसमेत समस्यामा परेका छन् । कालीमाटीका थोक व्यापारी रमेश खत्रीले गतवर्ष यही समयमा धेरै मात्रामा तरकारी खरिद गर्ने ग्राहकले अहिले बढीमा किलोग्राममा मात्र लैजाने गरेको उहाँले बताउभुयो । ‘एकातिर बजारमा तरकारी आएको छैन अर्कोतिर आएको तरकारीको भाउ पनि महँगो छ’ उहाँले भन्नुभयो ।
कालीमाटी फलफूल तथा तरकारी बजार विकास समितिको तथ्याङ्क अनुसार गतवर्षको यही समयको तुलनामा अहिले हरियो तरकारीको थोक मूल्य दोब्बरभन्दा बढेको छ । थोक मूल्यमै भाउ बढेपछि खुद्रा व्यापारीले आफ्नै किसिमले मूल्य निर्धारण गर्दा पनि सर्वसाधारण महँगोमा खरिद गर्न बाध्य भएका हुन् । समितिका अनुसार आलुको मूल्य भने अहिलेसम्म अघिल्लै वर्षको भाउमा किनबेच भइरहेको छ ।  tarkari-2-1-625x405
सामान्य अवस्थामा अरू बेला कालिमाटी बजारमा दैनिक करिब ८५० टन तरकारी भित्रिने गरेकोमा शनिबारदेखि दैनिक २५० देखि ३०० टन मात्रै तरकारी भित्रिएको समितिले जानकारी दिएको छ । उपत्यकावासीको मागभन्दा करिब ७० प्रतिशत कम मात्रै तरकारी आयात हुनु र आएको तरकारी पनि पानीले बिग्रेका कारण मूल्य बढेको समितिले जनाएको छ । समितिका प्रवक्ता विनय श्रेष्ठले देशैभरि लगातारको वर्षापछि आएको बाढी र पहिरोले सडकमा क्षति पुगेपछि काठमाडौँमा तरकारी आपूर्ति घटेर भाउ महँगिएको बताउनुभयो । मागअनुसार आयात हुन नसक्दा तरकारीको मूल्य बढेको भन्दै उहाँले तरकारी भित्रिने क्रम जारी रहेकाले दुई÷तीन दिनमै सहज हुने दाबी गर्नुभयो । ‘बाढी र पहिरोका कारण तरकारी बोकेका ट्रक गाडीहरू राजमार्गमै छन् । केही भित्रिने क्रममा छन्’ उहाँले भन्नुभयो ‘अबको दुई÷तीन दिनमा तरकारीको भाउमा सुधार आउँछ । ’
समितिका अनुसार यस समय कालीमाटी बजारमा धादिङ, मकवानपुर, काभ्रे, नुवाकोट, भक्तपुर, ललितपुर र काठमाडौँका विभिन्न ठाउँबाट तरकारी आउँछ । यो समयमा काठमाडौँमा खपत हुने तरकारीको आधा हिस्सा छिमेकी जिल्लाबाटै आउने भएकाले तरकारीको अभाव नहुने श्रेष्ठको दाबी छ । उहाँका अनुसार यो मौसममा आलु र प्याजमा भने भारतकै भर पर्नुपर्ने भएकाले धेरै लामो समयसम्म आयात समस्या भएमा अभाव हुन्छ तर केही दिनलाई धान्ने आलु र प्याज भएकोले समस्या नहुने भन्दै आलु र प्याज काठमाडौँवासीलाई एक साताभन्दा बढी धान्ने स्टक भएकाले तत्काल समस्या आउने अवस्था नभएको उहाँले बताउनुभयो ।

थप समाचार
प्रतिकृया
नाम

ईमेल

ठेगना