मनाङमा फस्टायो आलु खेती


नवीनराज कुइँकेल

 

मनाङ, भदौ ३१ गते । हिमाली जिल्ला मनाङमा आलु खेती राम्रो फस्टाउन थालेको छ । यो वर्ष अघिल्लो आर्थिक वर्षको तुलनामा उत्पादनमा आठ प्रतिशत वृद्धि भएको छ ।
जिल्ला कृषि विकास कार्यालय मनाङका अनुसार आलु खेती गरिएको क्षेत्रफल बढ्नुको साथै उत्पादनमा पनि वृद्धि भएको हो । वरिष्ठ कृषि विकास अधिकृत राममिलन विश्वकर्माका अनुसार आव २०७३÷७४ मा आठ हजार २३७ मेक्ट्रिक टन आलु उत्पादन भएको छ । सो वर्ष ६६५ हेक्टरमा आलु खेती गरिएको थियो । आव २०७२÷७३ मा सात हजार ६११ मेट्रिक टन उत्पादन भएको कार्यालयले जनाएको छ ।
मनाङमा प्रधानमन्त्री कृषि आधुनिकीकरण परियोजना अन्तर्गत नेसोङ गाउँपालिकामा छवटा पकेट क्षेत्र र एउटा ब्लकका रूपमा आलु खेती गरिएको छ । आलु खेतीको ब्लकमा १३ वटा कृषक समूह संलग्न छन् ।
उत्पादन वृद्धि भएपछि मनाङको आलु अन्य जिल्लामा पठाउन थालिएको छ । छिमेकी जिल्ला लमजुङ, तनहुँ, कास्कीको साथै राजधानी काठमाडाँैको बजारसम्म मनाङको आलु पुग्न थालेको छ । यसअघि बजार नहुँदा उत्पादित आलु यहीँ कुहिन्थ्यो, नेसोङ–१ का किसान बुधराज घलेले भन्नुभयो, अहिले सडक खुलेको छ । यहाँको आलु सिधै काठमाडाँै पुग्छ ।
हिमालपारिको जिल्ला मनाङ आलुखेतीको लागि प्रख्यात छ । नेपालमा अर्गानिक खेती हुने जिल्लामध्ये मनाङ अग्रपङ्क्तिमा पर्छ । मोटरबाटो नहुँदा यहाँ उत्पादन भएको स्वादिलो आलु जिल्ला बाहिर जान सकेको थिएन । जब मोटर बाटो आयो, सानै भए पनि सवारीसाधन चल्न थाले र यहाँका उत्पादन देशका कुनाकुनामा पुग्न थालेका छन् । यहाँको प्रमुख बालीमध्ये आलु पनि हो । अहिले आलु खन्ने समय भएको छ । वर्षको एक पटकमात्र खेतीपाती गरिने भए पनि यहाँको उत्पादनले नेपालीको मात्रै नभई विदेशीको पनि मन जितेको छ । यहाँ आउने नेपाली पर्यटक हुन् या विदेशी पर्यटक पाएसम्म स्वादिलो आलुको परिकार खान रुचाउँछन् । मनाङका प्रायः होटलमा आलुका विभिन्न परिकार बनिरहेका हुन्छन् । aalu kheti
मनाङका होटलमा खपत हुने र आफूहरूले खानेबाहेक बाँकी सबै आलु खेर जाने गरेकोमा अहिले बजार पाउन थालेपछि किसान खुसी भएका छन् । उनीहरूले आलु खेतीलाई थप विस्तार गरिरहेका छन् ।
आफूलाई गुजाराका लागि मात्र खेती गर्नेगरेका यहाँका कृषकले व्यावसायिक रूपमा आलुखेती गर्न थालेका छन् । आफूलाई खान पनि भएको छ, बेचेर आम्दानी पनि भएको छ, चामेका किसान हिमबहादुर रानाले भन्नुभयो ।

 

थप समाचार
प्रतिकृया
नाम

ईमेल

ठेगना