चमेलियाको सबस्टेसन परीक्षण तीव्र

लक्ष्मीप्रसाद उपाध्याय

 

काठमाडौँ, असोज १ गते । चमेलिया जलविद्युत् आयोजनाबाट निर्धारित समयभन्दा एक महिना अगावै बिजुली उत्पादन गर्ने उद्देश्यका साथ सबस्टेसन र प्रसारण लाइन परीक्षण गर्ने कार्य करिब अन्तिम चरणमा पुगेको छ ।  आयोजनाका अधिकारीका अनुसार निर्माण सम्पन्न गर्ने पछिल्लो कार्यतालिकाभन्दा एक महिना अघि नै विद्युत् उत्पादन गरिने आयोजनाका अधिकारीले दाबी गरेअनुसार अत्तरिया र आयोजनाको पावरहाउस दार्चुलास्थित बलाँचको सबस्टेसनको परीक्षण कार्य अन्तिम चरणमा पुगेको छ । आयोजनाको निर्माण ठेकेदार कम्पनीले सन् २०१७ को डिसेम्बरमा सम्पन्न गरिसक्ने कार्यतालिका पेश गरेको छ ।
हाल परीक्षण गर्ने कामको गति हेर्दा निर्धारित समय सन् २०१७ को डिसेम्बरभन्दा एक महिना अघि नोभेम्बर महिनामा विद्युत् उत्पादन गर्ने लक्ष्य लिएको आयोजना प्रमुख अजयकुमार दाहालले दाबी गर्नुभयो ।
आयोजना प्रमुख दाहालले शनिबार गोरखापत्रसँग भन्नुभयो, अत्तरियास्थित सबस्टेसनको परीक्षण गर्ने कार्य सम्पन्न भइसकेको छ । बलाँचस्थित सबस्टेसन परीक्षण गर्ने कार्य भइरहेको छ । यहीँ गतिमा अन्य परीक्षणको कार्य सम्पन्न भएमा हामी निर्धारित समयभन्दा एक महिना अघि नै चमेलियाबाट बिजुली उत्पादन गर्न सक्ने छौँ । chameliya parichhan
उहाँका अनुसार सबस्टेसन र प्रसारण लाइनका परीक्षणपछि जलविद्युत् आयोजनाको सुरुङमा पानी भर्ने काम यसेको परीक्षण गर्ने काम गरिने छ । यो काम आगामी एक महिनाभित्र सम्पन्न गरिने कार्ययोजना बनेको छ । उहाँले भन्नुभयो, हामी सेप्टेम्बरमा एउटा युनिटबाट उत्पादन सुरु गर्न सक्ने अवस्थामा पुग्नेछौ । अर्काे युनिटबाट उत्पादन गर्न डिसेम्बर महिना कुर्नुपर्ने हुन सक्छ ।
यस अघि आयोजनाले बलाँचदेखि अत्तरियासम्मको १३२ केभी प्रसारण लाइनका पोलको परीक्षण गरिसकेको छ । लाइन परीक्षण गरेलगत्तै पावर हाउस बलाँच र अत्तरियामा निर्माण गरिएको सबस्टेसनको परीक्षण सुरु गरेको हो ।
आयोजनाको सुरुङको सबै अडिट बन्द गर्ने र सुरुङको बाँकी रहेको सम्पूर्ण कार्य पूरा गर्नका लागि आयोजनाले निर्माण ठेकेदार चिनियाँ कम्पनी चाइना गेजुवाको प्राविधिक टोली फिल्डमा खटिइरहेको छ । दसैँको सार्वजनिक बिदाको समयलाई सदुपयोग गर्ने गरी सुरुङमा पानी भर्ने योजना रहेको आयोजना प्रमुख दाहालले बताउनुभयो । नोभेम्बर महिनाभरिमा पावरहाउसका दुईवटै युनिटलाई परीक्षण गरिसक्ने कार्यतालिका बनाएका छौँ । कार्यतालिकाअनुसार काम सम्पन्न गरी एक महिना अघि नै उत्पादन गरी राष्ट्रिय प्रसारण लाइनमा जोड्ने योजना छ, आयोजना प्रमुख दाहालले शनिबार भन्नुभयो ।
चमेलिया जलविद्युत् आयोजनाको लागि निर्माण गरिएको प्रसारण लाइनलाई डबल सर्किटको बनाउने तयारी पनि प्राधिकरणले बनाएको छ । चमेलिया नदीमा अन्य आयोजना पनि निर्माणाधीन अवस्थामा रहेकाले ती सबै आयोजनाबाट उत्पादित बिजुलीलाई पनि अत्तरियास्थित सबस्टेसनसम्म ल्याउन डबल सर्किटको प्रसारण लाइन निर्माण गर्नुपरेको प्राधिकरणले जनाएको छ । डबल सर्किटको प्रसारण लाइन निर्माण गर्न प्रसारण लाइन वरपरका करिब एक हजार नौ सय रूख काट्नुपर्ने भएकोले हालसम्म एक हजार छ सय रूख कटान भइसकेका छन् । वन तथा भू–संरक्षण मन्त्रालयले रूख कटान गर्न अनुमति दिइसकेको भए पनि वन ऐन अनुसार वर्षात्का बेला वनजङ्गलमा रूख काट्न नपाइने भएकाले बाँकी रूख आगामी कात्तिक १५ गतेबाट कटान सुरु गरिने समेत आयोजनाले जनाएको छ । वन विभागका महानिर्देशक कृष्णप्रसाद आचार्यले भन्नुभयो, हामीले रूख कटान गर्नका लागि सहमति दिइसकेका छौँ । कात्तिक महिनाबाट रूख कटानी गर्न वन प्राविधिकले सहयोग गर्नेछन् ।

 

थप समाचार
प्रतिकृया
नाम

ईमेल

ठेगना