वर्षाले धान किसान चिन्तित

अविनाश चौधरी

 

धनगढी, असोज ७ गते । खेतमा धान पाकेका बेला मनसुन पुनः सक्रिय भएपछि कैलालीका किसान चिन्तित भएका छन् । बुधबारदेखि भएको वर्षाले पाकेको धानखेतमा पानी जमेपछि कृषक चिन्तित भएका हुन् । शुक्रवार बिहानसम्म लगातार भएको वर्षाले धानखेतमा असर पु¥याएको उनीहरूले बताएका छन् । किसानका अनुसार पाकेर काट्न तयार भएको धान पानीसँगै हावा चलेपछि ढलेको छ । ढलेको धान छिट्टै काट्न नपाए सडेर नोक्सान हुने बताएका छन् ।
उन्नत जातको धान पाकेर काट्ने तयारी भएको बेला परेको झरीले समस्या गरेको स्थानीय कृषक दशिराम चौधरीले बताउनुभयो । पाकेको धान हावापानीले ढलाएको छ । ढलेको धान अहिले पानीमै डुबेको छ, चौधरीले अगाडि थप्नुभयो, वर्षा चाँडै रोकिएन भने काट्नका लागि तयार भएको धानमा क्षति पुग्ने देखिएको छ ।
अगाडि नै पाकेको धानलाई यहाँका कतिपय किसानले काटिसकेका थिए । तीन दिनदेखि वर्षा नरोकिएपछि धान काटेर भित्र्याउन तयारी गरेका किसान चिन्तित भएको जनाइएको छ । काटेर भित्र्याउन तयार भएको धानलाई पानीले भिजाएको कैलारी गाउँपालिका–४ का दिनेश चौधरीले बताउनुभयो । barsha dhan
यहाँका कतिपय किसानले धान काटेर भित्र्याउने तयारी गरेका थिए, उहाँले भन्नुभयो, तर काटेको धान खेतमै भिजेको छ । दसैँको बेला आएको पानीले समस्या ग¥यो ।
यसवर्षको मनसुनी सिजनको सम्भवतः अन्त्यतिर भएको वर्षाले तरकारी खेतीमा समेत असर गरेको छ । भदौको पहिलो साताबाट उक्त महिनाभरि वर्षा नभएपछि किसानले खेतबारीमा धमाधम तरकारी खेती गरेका थिए ।
हावापानी फिल्ड कार्यालय अत्तरियाले पछिल्लो २४ घण्टामा कैलालीमा १६ मिलिमिटर वर्षा भएको जनाएको छ । बङ्गालको खाडीबाट सक्रिय भएको मौसमी वायु नेपालको पूर्वी क्षेत्र हुँदै पश्चिमतर्फ सरिरहेकाले केही दिन अझै वर्षा हुने सो कार्यालयका मौसम विज्ञान सहायक राममणि मिश्रले बताउनुभयो । बङ्गालको खाडीबाट आएको मौसमी वायुले वर्षा गराएको हो, उहाँले भन्नुभयो, १÷२ दिन वर्षा रोकिए पनि केही दिनपछि पुनः पानी पर्ने सम्भावना देखिएको छ ।
यसवर्ष जुन १२ तारेख अर्थात् जेठ २९ गतेबाट नेपालमा सक्रिय भएको मनसुन सेप्टेम्बर २४ तारिख अर्थात् असोज ८ गतेसम्म हट्ने मौसमविद्को अनुमान थियो । तर, लगभग अन्त्यतिर आइसकेको मनसुन अझै केही दिन लम्बिने र दसैँमा पनि पानी पर्न सक्ने मिश्रले जानकारी दिनुभयो ।
असोजमा भएको वर्षाले धानबालीमा खासै नोक्सान नगरे पनि धानको गुणस्तरमा भने कमी ल्याउने जिल्ला कृषि विकास कार्यालय कैलालीले जनाएको छ । सो कार्यालयका प्राविधिक सहायक शङ्कर अवस्थीले काट्ने अवस्थाको धानलाई पानीले प्रभावित गर्ने र चामलको गुणस्तर खस्किने बताउनुभयो ।
यसवर्ष कैलालीमा ७२ हजार दुई सय ५० हेक्टर जमिनमा धानखेती गरिएको थियो । अधिकांश किसानले लगाएको उन्नत जातको धान पाकेर काट्ने तयारी भएको छ ।

 

थप समाचार
प्रतिकृया
नाम

ईमेल

ठेगना