लोकतन्त्रविरोधी प्रवृत्ति पराजित गर्ने प्रतिबद्धता

जुनारबाबु बस्नेत/राधा चालिसे

 

काठमाडौँ, असोज २१ गते । नेपाली काँग्रेसले लोकतान्त्रिक पद्धतिमार्फत मुलुकमा समृद्धि सिर्जना गर्दै आमजनताको पहुँचमा पु¥याउने सोचलाई कमजोर पार्ने प्रवृत्तिलाई दृढताका साथ सामना गर्ने निर्णय गरेको छ ।
सत्ता साझेदारी नेकपा (माओवादी केन्द्र)ले सँगै जाने प्रतिबद्धता तोड्दै प्रमुख प्रतिपक्षी दल नेकपा (एमाले)सँग आसन्न चुनावी तालमेल र त्यसपछि पार्टी एकीकरण गर्ने निर्णय गरेको चौथो दिन बसेको नेपाली काँग्रेस केन्द्रीय कार्यसमितिको बैठकले यस्तो निर्णय गर्दै चुनौतीको सामना गर्ने स्पष्ट गरेको हो । nc cc
“लोकतान्त्रिक मूल्य र मान्यतालाई कमजोर पार्दै निरङ्कुशता र अधिनायकवादलाई प्रोत्साहित गर्ने, सामाजिक सद्भाव र एकतालाई कमजोर गर्दै राष्ट्रिय एकतालाई कमजोर पार्ने, विधिको शासनमा आधारित लोकतान्त्रिक पद्धतिमार्फत देशमा समृद्धि सिर्जना गर्दै आमजनताको पहुँचमा पु¥याउने सोचलाई कमजोर पार्ने प्रवृत्तिलाई दृढताका साथ नेपाली काँग्रेसले सामना गर्नेछ र यी प्रवृत्तिलाई पराजित गर्नेछौँ”, नेपाली काँग्रेसको केन्द्रीय कार्यसमितिको निर्णयमा स्पष्ट गरिएको छ ।
मङ्गलबार वाम एकतालगत्तै शीर्ष नेताहरूको बैठक र निरन्तरको केन्द्रीय कार्यसम्पादन समितिको दुई दिनको बैठकपछि शुक्रबार बिहान र अपराह्न पार्टी सभापति शेरबहादुर देउवाको अध्यक्षतामा केन्द्रीय कार्यसमितिको बैठक बसेको थियो ।
संविधान कार्यान्वयनमा थप गम्भीर
बैठकमा केन्द्रीय सदस्यहरूले वाम एकताबाट नेपाली काँग्रेस विचलित हुनुपर्ने अवस्था नभएको भन्दै लोकतान्त्रिक र प्रगतिशील शक्तिहरूलाई समेटेर बृहत् लोकतान्त्रिक गठबन्धन गर्न विशेष जोड दिएको नेता रमेश
लेखकले बताउनुभयो ।
केन्द्रीय सदस्यहरू नवीन्द्रराज जोशी, महेश आचार्य, अर्जुननरसिंह केसी लगायतका नेताहरूले वाम गठबन्धनले लोकतन्त्र र प्रजातन्त्रमाथि चुनौती थपिएको, संविधान कार्यान्वयनलाई थप जटिल बनाएको भन्दै यस्तो समयमा नेपाली काँग्रेस थप जिम्मेवार र गम्भीर भएर सफल रूपमा संविधान कार्यान्वयन गर्न थप गम्भीर हुनुपर्ने धारणा आएको थियो । “सबैको स्पष्ट धारणाले पार्टीलाई अगाडि बढ्न बल मिलेको छ”, लेखकको भनाइ छ ।
सहमति तोडेको ठहर
सत्तारूढ मुख्य दल नेपाली काँग्रेसले मौजुदा सरकारको बारेमा केही बोलेको छैन । तर, मौजुदा राजनीतिक परिस्थितिको ऐतिहासिक गर्भदेखिकै मिहिन विश्लेषण भने गरेको र त्यस क्रममा माओवादी केन्द्रले सहमति तोडेको ठहर गरेको छ ।
काँग्रेस बैठकको निर्णयअनुसार संविधान कार्यान्वयन गर्ने मूल कार्यभारका साथ नेपाली काँग्रेस र नेकपा (माओवादी केन्द्र) लगायतका राजनीतिक दलहरूबीचको सहकार्यलाई अगाडि बढाएको स्पष्ट गरिएको छ । त्यसै सिलसिलामा स्थानीय निर्वाचन सफलतापूर्वक सम्पन्न भएको, स्थानीय तहको निर्वाचनमा मधेसकेन्द्रित दल लगायतका सबै राजनीतिक दलको उत्साहपूर्ण सहभागिता सम्भव बनाउन सरकार सफल भएको जनाइएको छ ।
स्थानीय तहको निर्वाचनपछि प्रतिनिधिसभा र प्रदेशसभा निर्वाचनको मितिसमेत तोकी त्यसलाई आवश्यक पर्ने महŒवपूर्ण कानुनी व्यवस्था सुनिश्चित भइसकेको अवस्थामा हठात नेकपा
(माओवादी केन्द्र)को नेकपा (एमाले)सँग चुनावी तालमेल गर्ने निर्णयलाई नेपाली काँग्रेसले अस्वाभाविक रूपमा लिएको स्पष्ट गरिएको छ ।
वाम तालमेल र एकताप्रति सङ्केत गर्दै नेकपा (एमाले) र नेकपा (माओवादी केन्द्र) दलहरूबीच भएको छबुँदे सहमतिले सरकारको वर्तमान गठबन्धन निर्माण गर्दा भएको तीनबुँदे सहमति माओवादी केन्द्रले तोडेको बैठकले ठहर गरेको छ ।
अब धु्रवीकरणतर्फ
वामपन्थी दलबीचको यो अस्वाभाविक तालमेलले मुलुकलाई राजनीतिक धुव्रीकरणतिर धकेलेको नेपाली काँग्रेसले स्पष्ट गरेको छ । संविधान कार्यान्वयन, राष्ट्रिय एकता र विभिन्न जाति तथा समुदाय बीचको सद्भाव र विश्वासका आधारमा देशलाई समृद्धि र विकासको मार्गमा अगाडि बढाउने अहिलेको आवश्यकता भए पनि मुलुकको विकसित राजनीतिले त्यो मार्गमा अवरोध सिर्जना गरेको काँग्रेसको निष्कर्ष छ ।
समृद्धिको मार्गमा भन्दा विभाजनको मानसिकतालाई प्रोत्साहन गर्दै लोकतन्त्र, राष्ट्रिय एकता र सामाजिक सद्भाव समेतलाई कमजोर पार्नेतर्फ उन्मुख हुँदै आएको नेकपा (एमाले)सँग माओवादी केन्द्रले गरेको सहकार्यले देशलाई अनावश्यक रूपमा धु्रवीकरणतर्फ धकेलेको नेपाली काँग्रेसको निष्कर्ष छ ।
सहकार्यलाई प्राथमिकता
शान्ति प्रक्रियादेखिको राजनीतिक घटनाक्रम थप विश्लेषण गर्दै नेपाली काँग्रेसले फेरि पनि सहकार्यलाई नै जोड दिएको छ । शान्ति प्रक्रियाबाट विकसित भएको नेपालको राजनीति सहमति, सहकार्य र मेलमिलापको कार्यदिशाबाट संविधानको कार्यान्वयनसम्म आइपुगेको सोही बाटोमै समृद्धि सम्भव हो भनेको छ ।
मेलमिलापबाटै देशमा दिगो शान्ति, राजनीतिक स्थिरता र आर्थिक समृद्धि हुनसक्छ भन्दै नेपाली काँग्रेसले विज्ञप्तिमा स्पष्ट गरेको छ, “विकसित परिस्थितिबाट नेपाली काँग्रेस विचलित नभई राष्ट्रिय एकता, लोकतान्त्रिक शासन, शान्ति प्रक्रिया र संविधान कार्यान्वयनमा जिम्मेदारीका साथ अगाडि बढ्न प्रतिबद्ध छ र यस बाटोमा समान सोच राख्ने सबैसँग सहकार्य गर्न काँग्रेस सदैव तत्पर छ । ”
पार्टीले राष्ट्रियता, लोकतान्त्रिक मूल्य र मान्यतामाथि हुन थालेको आक्रमणलाई दृढताका साथ सामना गर्दै एकताबद्ध भएर उच्च मनोबल र सक्रियताका साथ अगाडि बढ्न कार्यकर्तालाई आह्वान र पार्टीलाई साथ दिने सबैसँग आग्रह गरेको छ ।
चुनावी तालमेल
अनपेक्षित र अस्वाभाविक घटनाक्रमबाट विकसित परिस्थितिको सामना गर्न र मुलकमा प्राप्त उपलब्धिको संरक्षण र सम्वद्र्धन गर्न चुनावी तालमेलको रणनीतिलाई अगाडि सारिएको पनि स्पष्ट गरिएको छ ।
प्रदेशसभा र प्रतिनिधिसभाको निर्वाचन तोकिएकै मितिमा सम्पन्न गराई संविधानको कार्यान्वयन तथा मुलुकमा राजनीतिक स्थायित्व कायम गरी आर्थिक समृद्धिको मार्गमा मुलुकलाई अगाडि बढाउने राष्ट्रिय दायित्व र जिम्मेवारी पुनः नेपाली काँग्रेसको काँधमा आएको ठम्याइ काँग्रेसको छ ।
त्यसका लागि सबै लोकतान्त्रिक, राष्ट्रवादी र प्रगतिशील राजनीतिक शक्तिहरूका बीचमा आपसी सद्भाव कायम राख्दै सहकार्य र आवश्यकताअनुसार चुनावी तालमेल गरी अगाडि बढ्ने निर्णय गरिएको छ ।
मापदण्ड कडा
नेपाली काँग्रेसले आसन्न निर्वाचनका लागि उम्मेदवारको मापदण्ड केही कडा बनाएको छ । साविक संविधानसभा हाल व्यवस्थापिका संसद्को समानुपातिक निर्वाचन प्रणालीबाट सांसद बनेका व्यक्तिहरूलाई आसन्न प्रतिनिधिसभाको निर्वाचनमा समानुपातिक निर्वाचन प्रणालीतर्फको उम्मेदवार पुनः नबनाउने निर्णय गरेको छ ।
दोहोरो अवसर नदिने निर्णय पनि गरिएको छ । त्यस क्रममा स्थानीय तहको निर्वाचनमा महानगर÷उपमहानगर, नगरपालिका तथा गाउँपालिकाको प्रमुख र उपप्रमुख पद र अन्य पदमा पार्टीका तर्फबाट उम्मेदवार वनेका व्यक्तिहरूलाई प्रदेशसभा तथा प्रतिनिधिसभाको सदस्य पदको उम्मेदवार नबनाउने स्पष्ट गरेको छ ।

बागीलाई दागी
काँग्रेसले विगत निर्वाचनका बागी, विद्रोही र तिनलाई सहयोग गर्नेलाई पुनः उम्मेदवारको अवसर नदिने भएको छ । “आमनिर्वाचन र स्थानीय तहको निर्वाचनमा पार्टीका आधिकारिक उम्मेदवारको विरुद्ध उम्मेदवारी दिएका तथा त्यस्ता उम्मेदवारका प्रस्तावक र समर्थक बनेकाहरूलाई प्रदेशसभा र प्रतिनिधिसभाको सदस्य पदको उम्मेदवार नबनाउने निर्णय गर्दछ । ”
सभापतिलाई अधिकार
आसन्न निर्वाचनमा उम्मेदवारीको अन्तिम टुङ्गो लगाउने पार्टीको निकाय गठनको अधिकार पार्टीको केन्द्रीय कार्यसमितिले सभापति शेरबहादुर देउवालाई दिएको छ । “प्रतिनिधिसभा र प्रदेशसभाका लागि उम्मेदवार चयन गर्न वरिष्ठ नेतालगायत साथीहरूसँग आवश्यक परामर्श गरी संसदीय समिति गठन गर्न पार्टी सभापतिलाई अधिकार दिने निर्णय गर्दछ । ” सो समितिले पार्टीले यही असोज २७ गतेभित्रै उम्मेदवारी टुङ्गो लगाइसक्ने पनि जनाएको छ ।

थप समाचार
प्रतिकृया
नाम

ईमेल

ठेगना