‘ई–गभर्नेन्स नेपाल सरकारको प्राथमिकता’

गोरखापत्र समाचारदाता-
काठमाडाँैं । सूचना तथा सञ्चार मन्त्री मोहनबहादुर बस्नेत अन्तर्राष्ट्रिय दूर सञ्चार सङ्घ (आइटीयू) द्वारा अर्जेन्टिनाको ब्युनर्स आयर्समा आयोजित ‘विश्व दूर सञ्चार विकास सम्मेलन’ मा सहभागी भई स्वदेश फर्किनु भएको छ ।
स्वदेश फर्केपछि आइतबार त्रिभुवन अन्तरराष्ट्रिय विमानस्थलमा सञ्चारकर्मीसँग कुरा गर्दै उहाँले सम्मेलनमा दिगो विकासका लक्ष्य प्राप्त गर्न सूचना तथा सञ्चार प्रविधिको भूमिका के कस्तो हुन सक्छ, र कुनै पनि मुलुकको समृद्धि र विकासमा सूचना तथा सञ्चार प्रविधिले के कसरी सहयोग पु¥याउन सक्छ भन्ने विषयमा सम्मेलन केन्द्रित रहेको जानकारी दिनुभयो ।

sanchar_kabita
उहाँका अनुसार, सम्मेलनमा सूचना, प्रविधि तथा दूर सञ्चारको क्षेत्रमा विश्वका विभिन्न मुलुकमा भएका नवीनतम खोज अनुसन्धान, उपलब्धि, प्राविधिकको प्रयोग, सफलता र अभ्यासको आदान प्रदानबारे सहभागी मुलुकका प्रतिनिधिबीच घनिभूत छलफल भएको थियो ।
सम्मेलनमा आफूले नेपाल सरकारले ई–गभर्नेन्सलाई प्राथमिकता दिएको, मुलुकभर अप्टिकल फाइबर बिछ््याउने कार्य द्रुतगतिमा भइरहेको, इन्टरनेट सेवा विस्तार कार्यलाई प्राथमिकताका साथ अगाडि बढाइएको, ई–प्रविधिबाट शिक्षा, स्वास्थ्य, भुक्तानीजस्ता सेवा प्रदान गर्नुका साथै आर्थिक गतिविधिमा समेत सूचना प्रविधि र अनलाइन प्रणाली लागू गरी आमनागरिकको समय र उत्पादन लागतसमेत घट्न जाने तथा यसले मुलुकको दिगो विकासको लक्ष्य प्राप्तिमा मद्दत पुुग्ने जानकारी गराइएको उहाँले बताउनुभयो ।
त्यसैगरी, सम्मेलनमा भूपरिवेष्ठित, विकासोन्मुख र साना टापु मुलुकका मन्त्रीबीच भएको छलफलमा नेपालले दूर सञ्चारको क्षेत्रमा हासिल गरेको उपलब्धिको प्रशंसा हुनुका साथै सो उपलब्धिलाई कसरी दिगो विकासका लक्ष्य प्राप्तिमा मद्दत पु¥याउन सकिन्छ भन्ने जिज्ञासा राखिएको जानकारी मन्त्री बस्नेतले दिनु भयो ।
सम्मेलनलाई सम्बोधन गर्ने क्रममा मन्त्री बस्नेतले सूचना तथा सञ्चार प्रविधिको विकास र प्रयोगलाई विकाससँग जोड्नुपर्ने, अन्तर्राष्ट्रिय इन्टरनेट ब्यान्डविथको मूल्य घटाउन विशेष पहल गर्नुपर्ने, साइबर सुरक्षामा विशेष जोड दिनुपर्ने तथा आईटीयूको अध्ययन अनुसन्धानबाट प्राप्त ज्ञानलाई सदस्य मुलुकले अधिकतम प्रयोग गर्नुपर्ने विषयमा सम्मेलनको ध्यानाकर्षण गराउनुभएको थियो ।
त्यसैगरी, सम्मेलनमा उहाँले दूर सञ्चारको क्षेत्रमा नेपालले अहिलेसम्म गरेका प्रगति, विद्यामान समस्या र चुनौतीबारे प्रस्तुति गर्नुका साथै अन्तरराष्ट्रिय दूर सञ्चार सङ्घ (आईटीयु) ले नेपाललाई पु¥याएको सहयोगको सराहनासमेत गर्नु भएको थियो । सन् २०२५ सम्ममा नेपाललाई ‘डिजिटल नेपाल’ मा रुपान्तरण गर्न पूर्वाधार विकास र सूचना तथा सञ्चार प्रविधिको प्रयोगमा जोड दिइएको धारणा समेत मन्त्री बस्नेतले सम्मेलनमा व्यक्त गर्नु भएको थियो ।
सम्मेलनमा मन्त्री बस्नेतले डिजिटल डिभाइस कम गर्न राज्यले विशेष कार्यक्रम ल्याउनुपर्ने, सूचना तथा सञ्चार प्रविधिलाई एउटा मन्त्रालयले मात्र नभई राज्यले नै अङ्गीकार गर्नुपर्ने, साइबर सुरक्षामा विशेष जोड दिनुपर्नेलगायतका विषयमा आईटीयूले विशेष ध्यान दिनुपर्नेलगायतका विषय उठाउनु भएको जनाइएको छ ।
सम्मेलनमा मन्त्री बस्नेतले आईटीयूका महासचिव होयुलिन झोव, बुर्किनाफासोका डिजिटल अर्थमन्त्री हड्जा फतिमत सानोनलगायतसँग उच्चस्तरीय भेटवार्ता गर्नुका साथै सूचना प्रविधिका क्षेत्रमा भएका प्रगति, चुनौती र सम्भावनाबारे छलफल गरिएको जानकारी त्यस अवसरमा पत्रकारहरूलाई गराइएको थियो ।
विश्वका ६० भन्दा बढी मुलुकका उपप्रधानमन्त्री, मन्त्री र राज्यमन्त्री तथा दूर सञ्चारसम्बन्धी मन्त्रालय र संस्थाका वरिष्ठ अधिकारीको सहभागिता रहेको सो सम्मेलन असोज २२ देखि कात्तिक ३ गतेसम्म जारी रहनेछ ।




थप समाचार
प्रतिकृया
नाम

ईमेल

ठेगना