‘हेभिवेट’बीचको भिडन्तले बढ्यो चुनावी गर्मी

नारायण काफ्ले

काठमाडौँ, कात्तिक ६ गते ।  ‘वामविरुद्ध लोकतान्त्रिक’ गठबन्धन र तालमेलका रूपमा पहिलोपटक जनप्रतिनिधिको सर्वोच्च निकाय व्यवस्थापिका र प्रदेशमा चुनावी प्रक्रिया सुरु भएको छ ।  पहिलो चरणमा तीन ठूला दल नेपाली काँग्रेस, एमाले र माओवादीमध्ये लोकतान्त्रिक गठबन्धनबाट काँग्रेसले बढी स्थानमा मनोनयन दर्ता गराएको छ ।  सङ्घीय संरचनामा पहिलोपटक हुन लागेको प्रदेशसभा निर्वाचनमा मुख्यमन्त्रीको दाबीसहित केही ‘हेभिवेट’ उम्मेदवारले मनोनयन गरेका छन् ।  प्रतिनिधिसभामा केही नयाँ उम्मेदवारले मौका पाए पनि अधिकांश पुरानैको वर्चस्व छ । Narayan-kaji-And-baburam-bhattrai 
वाम गठबन्धनमा सामेल भई अन्तिम समयमा कांँग्रेससँगको सहकार्यमा पुग्नुभएका पूर्व प्रधानमन्त्री डा. बावुराम भट्टराईले गोरखाबाट मनोनयन गर्नुभएको छ ।  आफ्नै मूल पार्टी  नेकपा (माओवादी केन्द्र)का नारायणकाजी श्रेष्ठ भट्टराईका मुख्य प्रतिस्पर्धी हुनुहुन्छ ।  बाबुरामलाई काँग्रेसले साथ दिएको छ भने श्रेष्ठलाई एमालेको साथ छ ।  तर, पछिल्लो स्थानीय तहको नतिजाअनुसार एमाले गोरखामा ‘निल’ भएको थियो ।  काँग्रेसले नौ र माओवादी केन्द्रले दुई स्थानमा जित हासिल गरेका थिए ।   
अन्तिम पटकका लागि भन्दै राप्रपा प्रजातान्त्रिकका अध्यक्ष पशुपतिशमशेर राणा काँग्रेसको सहयोगमा सिन्धुपाल्चोकमा चुनावी मैदानमा हुनुहुन्छ ।  चार वर्षअघि संविधानसभा सदस्यमा सिन्धुपाल्चोक ३ बाट पराजित राणाले योपटक क्षेत्र नम्बर २ बाट उम्मेदवारी दिनुभएको छ ।  क्षेत्र फरक भए पनि भूगोल र प्रतिस्पर्धी फेरिएका छैनन् ।  २०७० मा राणालाई पराजित गरेका एमालेका शेरबहादुर तामाङ नै योपटक पनि उक्त क्षेत्रमा उम्मेदवार हुनुहुन्छ ।  गएको संविधानसभा सदस्य निर्वाचनमा तत्कालीन बागमती अञ्चलबाटै माओवादीका एकमात्र प्रत्यक्ष निर्वाचित सांसद अग्नि सापकोटा योपटक नयाँ क्षेत्रमा प्रतिस्पर्धामा जानुभएको छ ।  सापकोटा बाहलवाला सूचना तथा सञ्चारमन्त्री मोहनबहादुर बस्नेतसँग प्रतिस्पर्धा गर्दै हुनुहुन्छ ।  बस्नेत यसअघि पनि सिन्धुपाल्चोक १ बाटै संविधानसभा सदस्यमा विजयी हुनुभएको थियो ।
पूर्वअर्थमन्त्री रामशरण महत योपटक पनि नुवाकोटबाटै प्रतिस्पर्धामा हुनुहुन्छ ।  पहिलो संविधानसभा सदस्यमा महतसँग पराजित हितबहादुर तामाङसँग उहाँको पुनः प्रतिस्पर्धा हुनेछ ।  काँग्रेसकै अर्का नेता अर्जुननरसिंह केसीले पनि नुवाकोटबाटै प्रतिनिधिसभा सदस्यमा उम्मेदवारी दर्ता गर्नुभएको छ ।  केसीको प्रतिस्पर्धीमा वाम गठबन्धनका नारायण खतिवडा हुनुहुन्छ ।  
संविधानसभा सदस्य निर्वाचनमा दुईपटक काठमाडौँ क्षेत्र नम्बर ६ बाट पराजित एमाले सचिव योगेश भट्टराई ताप्लेजुङबाट प्रतिनिधिसभामा उम्मेदवार बन्नुभएको छ ।  भट्टराईसँग काँग्रेसका केशव दाहाल प्रतिस्पर्धामा हुनुहुन्छ ।  
दुई प्रभावशाली युवा सांसद ओखलढुङ्गामा एकै स्थानमा प्रतिनिधिसभा सदस्यका लागि प्रतिस्पर्धा गर्दै हुनुहुन्छ ।  एमालेबाट यज्ञराज सुनुवार र काँग्रेसबाट रामहरि खतिवडाले प्रतिनिधिसभा सदस्यका लागि मनोनयन दर्ता गर्नुभएको छ ।  
माओवादी केन्द्रका अधिकांश केन्द्रीय स्तरका नेताले प्रदेश ५ र ६ बाट टिकट सुरक्षित गरी मनोनयन दर्ता गराएका छन् ।  बहालवाला मन्त्री जनार्दन शर्मा, महेन्द्रबहादुर शाहीसहित पूर्वगृहमन्त्री शक्ति बस्नेत, नेता देव गुरुङ, वर्षमान पुन लगायतका पहिलो चरणको निर्वाचनमै उम्मेदवार हुनुहुन्छ ।  वर्षमान पुनसँग काँगे्रसका युवा एवं बहालवाला सिँचाइ राज्यमन्त्री अमरसिंह पुन रोल्पामा प्रतिस्पर्धा गर्दै हुनुहुन्छ ।  पूर्वगृहमन्त्री बस्नेत योपटक काँग्रेसका राजीवविक्रम शाहसँग प्रतिस्पर्धामा हुनुहुन्छ ।  बस्नेत र शाह दुवै यसअघि संविधानसभा सदस्यमा जाजरकोटबाट निर्वाचित हुनुभएको थियो ।  
‘प्रदेशमा झरे हेभिवेट’
प्रादेशिक संरचनामा पहिलोपटक हुन गइरहेको निर्वाचनमा धेरै ‘हेभिवेट’ले प्रदेशसभा रोजेका छन् ।  मुख्यमन्त्रीको दाबीसहित केही शीर्ष नेता तथा पूर्वमन्त्रीसमेत प्रदेशसभा निर्वाचनको दौडमा हुनुहुन्छ ।
धादिङबाट राजेन्द्रप्रसाद पाण्डे र शालिकराम जमरकट्टेल प्रदेशसभा उम्मेदवार बन्नुभएको छ ।  पाण्डेलाई प्रदेश ३ को सम्भावित मुख्यमन्त्रीका रूपमा एमालेले अगाडि सारेको हो ।  प्रदेश ३ कै दोलखाबाट एमालेका पोलिटब्युरो सदस्य पशुपति चौलागाईं पनि प्रदेशसभाकै सदस्यमा प्रतिस्पर्धा गर्दै हुनुहुन्छ ।  चौलागाईंले पनि मुख्यमन्त्रीको उम्मेदवारका रूपमा हेरिएको छ ।  प्रदेश ३ को मुख्यमन्त्रीको दाबीसहित सिन्धुपाल्चोकबाट प्रदेशसभामा अरुण नेपालको पनि मनोनयन दर्ता भएको छ ।  एमालेकै अर्का पोलिटब्युरो सदस्य पृथ्वीसुब्बा गुरुङ पनि प्रदेश नम्बर ४ को मुख्यमन्त्री दाबीसहित प्रदेशसभामै प्रतिस्पर्धा गर्दै हुनुहुन्छ ।  
प्रदेश ६ बाट मुख्यमन्त्रीको दाबीसहित बिनाविभागीय मन्त्री महेन्द्रबहादुर शाहीलाई माओवादीले कालीकोटबाट प्रदेशसभाको उम्मेदवार बनाएको छ ।  यस्तै पूर्वमन्त्री जीवनबहादुर शाहीलाई काँग्रेसले प्रदेश ६ को सम्भावित मुख्यमन्त्रीका रूपमा अघि सारेको छ ।  शाहीले हुम्लाबाट प्रदेशसभा सदस्यमा मनोनयन दर्ता गर्नुभएको छ ।  पूर्व सूचना तथा सञ्चारमन्त्री शेरधन राईले पनि प्रदेशसभा नै रोज्नुभएको छ ।  


थप समाचार
प्रतिकृया
नाम

ईमेल

ठेगना