विस्तृत छलफलपछि काँग्रेसले उम्मेदवारको टुङ्गो लगाउने

राधा चालिसे

ncकाठमाडौंँ, कात्तिक ९ गते ।  नेपाली काँग्रेसले दोस्रो चरणमा मङ्सिर २१ मा हुने प्रतिनिधिसभा र प्रदेशसभा सदस्यको निर्वाचनका लागि बृहत् लोकतान्त्रिक गठबन्धनमा आबद्ध अन्य पार्टीसँग पनि छलफल गरेर मात्र उम्मेदवारको टुङ्गो लगाउने निर्णय गरेको छ ।  उम्मेदवार तय गर्न प्रधानमन्त्री एवम् पार्टी सभापति शेरबहादुर देउवाको अध्यक्षतामा बुधबार बसेकोे पार्टीको संसदीय समिति (बोर्ड) ले विस्तृत छलफल गर्दै यस्तो निर्णय गरेको हो ।  
बोर्डले बुधबार राप्रपा प्रजातान्त्रिकका अध्यक्ष पशुपतिशम्शेर राणासँग छलफल गरेको छ ।  गठबन्धनमा आबद्ध अन्य दलसँग पनि बिहीबार बिहान वार्ता गरेर बोर्डको बैठक पुनः दिउँसो बस्ने निर्वाचन प्रचारप्रसार समिति संयोजक बालकृष्ण खाँणले जानकारी दिनुभयो ।  बुधबारको बोर्ड बैठकमा सहभागी सदस्यहरूले आगामी निर्वाचनमा गठबन्धनमा आबद्ध राजनीतिक दलहरूसँग सहकार्य गर्दै अधिकतम स्थानमा काँग्रेसले उम्मेदवारी दिनुपर्ने, सहकार्य गर्ने दलहरू बलियो भएको स्थानमा नेपाली काँग्रेसले पूर्ण सहयोग गरेर जित सुनिश्चित गर्नुपर्ने धारणा व्यक्त भएको पनि उहाँले बताउनुभयो ।  
बैठकमा प्रधानमन्त्री एवम् पार्टी सभापति देउवाले सबैलाई समेटेर एकता र मेलमिलापको नीतिले नै अहिलेको चुनौतीको सामना गर्न सकिने धारणा राख्नुभएको पनि खाँणले बताउनुभयो ।  गठबन्धनमा आबद्ध अन्य दल र नेपाली काँग्रेस उत्तिकै बलियो देखिएको स्थानमा दुवै दलबाट उम्मेदारी दिएर स्वच्छ प्रतिस्पर्धा गर्दै आ–आफ्ना पार्टी विचार जनतासमक्ष पु¥याउन पनि सकिने उहाँले बताउनुभयो ।  मङ्सिर २१ गते हुने दोस्रो चरणको निर्वाचनका लागि पार्टीले ४५ जिल्लाको उम्मेदवारको टुङ्गो लगाउनुपर्नेछ ।  उम्मेदवारको सूची आउँदो १६ गते निर्वाचन आयोगमा बुझाउनुपर्नेछ ।  काँग्रेसको नेतृत्वमा गठन भएको बृहत् लोकतान्त्रिक गठबन्धनमा सङ्घीय समाजवादी फोरम नेपाल, राष्ट्रिय जनता पार्टी नेपाल, राष्ट्रिय प्रजातन्त्र पार्टी र राष्ट्रिय प्रजातन्त्र पार्टी (प्रजातान्त्रिक) छन् ।  नेपाल लोकतान्त्रिक फोरम भने नेपाली काँग्रेससँग समाहित भइसकेको छ ।
यसैबीच पार्टीको संसदीय समिति र पदाधिकारीको मङ्गलबार बसेको बैठकले नेता महेश आचार्य नेतृत्वको घोषणापत्र तयारी समितिले तयार गरेको घोषणापत्रको खाकामा आवश्यक सुझाव समेटी अन्तिम रूप दिइसकेको छ । घोषणापत्र केही दिनमै सार्वजनिक गरिने पार्टी कार्यालयका सचिव प्रेम केसीले बताउनुभयो ।

थप समाचार
प्रतिकृया
नाम

ईमेल

ठेगना