महरेडाँडा पर्यटकीय गन्तव्य बन्दै

mahare dandaबेनी (म्याग्दी), कात्तिक ११ गते । म्याग्दीको  अन्नपूर्ण गाउँपालिका ८ राम्चेमा पर्ने  महरेडाँडा पर्यटकको रोजाइमा पर्न थालेको छ । समुद्री सतहदेखि तीन हजार तीन सय मिटरको उचाइमा रहेको महरेडाँडाबाट सूर्योदय, हिमशृङ्खला र पहाडी भूगोलको रमाइला दृश्य  अवलोकन   गर्न सकिन्छ ।
पर्यटकीय गन्तव्यका रूपमा विकास हुन थालेपछि यहाँ आन्तरिक एवं बाह्य पर्यटकको भीड लाग्ने गरेको छ । यसलाई पर्यटकीय गन्तव्यका रूपमा विकास गर्न  राम्चेका स्थानीयवासीले सात वर्षअघि सामुदायिक लज र पदमार्गको निर्माण गरेका थिए । यहाँबाट सिस्ने, गुर्जा, धौलागिरि, निलगिरि, अन्नपूर्ण, माछापुच्छ«े, मनास्लु लगायत २० भन्दा बढी हिमशृङ्खला, सूर्योदय र सूर्यास्तको मनमोहक दृश्य अवलोकन गर्न सकिन्छ । पोखराको फेवाताल, मिर्मीमा कालिगण्डकी थुलेको बाँध, पोखरा बजार, म्याग्दी, बाग्लुङ, पर्वत, तनहुँ, गोरखा, कास्की, गुल्मी, पाल्पा, अर्घाखाँची, रुकुमलगायतका जिल्लाका अग्ला पहाडका टाकुराहरूको अवलोकन गर्न पाउनु महरेडाँडाको अर्को विशेषता हो ।
घना गुराँसे जङ्गलको बीचमा रहेको महरेडाँडा आसपासका पशुगोठ, जडीबुटी, बोटबिरुवाको अवलोकनसँगै चराचुरुङ्गीका चिरबिर आवाज सुन्दै यात्रा गर्न सकिन्छ । पर्वतको बाँसखर्क, डाँडाकटेरी, म्याग्दीको नागी, टिकोट र खिवाङ हुँदै सामुदायिक पदमार्गको पदयात्राबाट महरेडाँडा  पुग्न सकिन्छ भने अर्कोतर्फ पुनहिल आएका पर्यटक गुराँसे जङ्गलभित्रको यात्रा गर्दै  महरेडाँडा पुग्ने गर्दछन् । महरेमा एकरात बास बसेपछि केही पर्यटक पर्वतको जलजला र लेस्पार हुँदै कास्की झर्दछन् भने केही पर्वतको हम्पालडाँडा र नागी हुँदै बेनी झर्ने गर्दछन् ।
पदमार्गको विकास र प्रचारप्रसारले गर्दा पछिल्लो समय स्वदेशी तथा विदेशी पर्यटकको आगमनमा वृद्धि हुन थालेको सामुदायिक पदमार्गका समन्वयकर्ता चित्र पुन तिलिजाले बताउनुभयो । सात वर्षअघि बेनीको गलेश्वरदेखि पर्वतको बाँसखर्क, डाँडाकटेरी र नागी हुँदै महरेडाँडा पुग्नका लागि सामुदायिक पदमार्गको विकास गरिएको तिलिजाले बताउनुभयो । महरेदेखि घोडेपानी पुनहिल र काँडापानी हुुँदै घान्द्रुक जान सकिन्छ भने लामो पदयात्राका लागि महरेदेखि स्वात, खोप्रालेक बहेली, दोबाटो हुँदै घान्द्रुक निस्कन सकिने तिलिजाले बताउनुभयो । शान्त वातावरण र रोमाञ्चक पदयात्राका लागि स्वदेशी र विदेशी पर्यटकको रोजाइमा पर्न थालेको उहाँले बताउनुभयो । बिदाका समयमा घुम्न निस्किने नेपालीका लागि पनि यो पदमार्ग रोजाइमा पर्न थालेको छ ।  
एक सिजनमा मात्र करिब पाँच सयभन्दा बढी विदेशी पर्यटक आउने गरेको   महरेडाँडा सामुदायिक लजका कर्मचारी ललित खोरजा मगरले बताउनुयभो । वर्षैपिच्छे पर्यटकको सङ्ख्यामा वृद्धि हुनथालेको उहाँले बताउनुभयो । पर्यटकको चाप बढेकाले २० जना क्षमताको सामुदायिक लजको क्षमता विस्तार गर्ने तयारी भएको उहाँले बताउनुभयो । सात वर्षअघि नागीमा रहेको हिमाञ्चल माविलाई आयस्रोत जुटाउन समुदायले  सामुदायिक लजको निर्माण गरेका हुन् । व्यवस्थित पदमार्गका  साथै भौतिक पूर्वाधारको विकास गर्न सकेमा उल्लेख्य मात्रामा पर्यटक भित्र्याउन सकिने राम्रो सम्भावना रहेको सामुदायिक पदमार्गका समन्वयकर्ता तिलिजा पुनले बताउनुभयो । पर्यटकलाई सुविधा दिन महरेडाँडामा फ्रि वाईफाईको व्यवस्था गरिएको छ ।

थप समाचार
प्रतिकृया
नाम

ईमेल

ठेगना