‘हाई प्रोफाइल’लाई बागीको चिन्ता, बिजुक्छेको ‘ब्रेक’

काठमाडौँ, कात्तिक १७ गते ।  नयाँ संविधान बनेपछिको पहिलो प्रतिनिधिसभा तथा प्रदेश संरचनामा हुन लागेको पहिलो प्रदेशसभा चुनावमा शीर्ष नेताबीचको भिडन्त समेत भइरहेको छ, शीर्ष नेतालाई बागीको चुनौती समेत छ ।  यस चुनावमा देखिएका पाँच रोचक पक्ष ः
‘हाई प्रोफाइललाई बागीको चिन्ता’
काँग्रेस वरिष्ठ नेता रामचन्द्र पौडलविरुद्ध पूर्व सहमहामन्त्री गोविन्दराज जोशीले उम्मेदवारी दर्ता गर्नुभएको छ ।  तनहुँ १ बाट टिकटको दाबी गर्नुभएको जोशीलाई संसदीय बोर्डले टिकट नदिएपछि बागी उम्मेदवारी दर्ता गर्नुभएको हो ।  राजपा अध्यक्ष मण्डलका संयोजक महन्थ ठाकुरविरुद्ध पनि महोत्तरी ३ मा बागी उम्मेदवारी दर्ता भएको छ ।  दोस्रो संविधानसभामा काँग्रेसले टिकट नदिएपछि स्वतन्त्र उम्मेदवारी दिई विजयी चन्द्रेश्वर झाले ठाकुरविरुद्ध उम्मेदवारी दर्ता गर्नुभएको हो ।  स्थानीय चुनावअघि झा राजपा नेपालमा प्रवेश गर्नुभएको थियो ।  
फोरमका अध्यक्ष उपेन्द्र यादवविरुद्ध पनि राजपाका सहमहामन्त्री जयप्रकाश ठाकुरले बागी उम्मेदवारी दिनुभएको छ ।  राजपाकै सहयोगमा सप्तरी २ मा यादव उम्मेदवार बन्नुभएको हो ।  सङ्घीय समाजवादी फोरमले टिकट नदिएपछि बबन सिंह रौतहट १ मा बागी उम्मेदवार बन्नु भएको छ ।  ०६४ को संविधानसभा सदस्य निर्वाचनमा पनि सिंहले स्वतन्त्र उम्मेदवारी दिई विजयी हुनुभएको थियो ।  
सिन्धुलीमा गणेश पहाडीविरुद्ध एमालेकै कुमारबहादुर कार्की र माओवादीका हरिबोल गजुरेलविरुद्ध माओवादी केन्द्रकै रामकुमार पौडेलले उम्मेदवारी दिएका छन् ।  
एमालेको ओतमा हृदयेश
एमालेको चुनाव चिह्नमा चुनाव लड्नेगरी सहकार्य गरेका राजपा नेता हृदयेश त्रिपाठी नवलपरासी १ मा उम्मेदवार बन्नुभएको छ ।  वाम राजनीति हुँदै मधेसी राजनीतिमा सक्रिय त्रिपाठी एमालेको चुनाव चिह्नमा चुनाव लड्न लाग्नुभएको हो ।  तत्कालीन तमलोपाका संसदीय दलका नेता वृजेश गुप्ता पनि एमालेकै चुनाव चिह्नमा उम्मेदवार बन्नुभएको छ ।  गुप्ता कपिलवस्तु २ बाट उम्मेदवार बन्नुभएको छ ।
विजुक्छेको ब्रेक
narayan-man-bijukchhe२०४८ सालदेखि भक्तपुरमा नियमित रूपमा चुनाव लड्दै आउनुभएका नारायणमान विजुक्छेको प्रत्यक्ष चुनावी यात्रामा यस पटक ब्रेक लागेको छ ।  ५ पटकसम्म भक्तपुरमा जनप्रतिनिधि बन्नुभएका बिजुक्छेले यस पटक प्रत्यक्ष चुनावमा मनोनयन नगर्नु भएको हो ।  भक्तपुर १ बाट बिजुक्छेको स्थानमा निवर्तमान सांसद प्रेम सुवालले मनोनयन गर्नुभएको छ ।  
दुई दशकपछि सक्रिय राजनीति
दुई दशकपछि सक्रिय राजनीतिमा ‘कमब्याक’ गर्दै पूर्वसभामुख दमननाथ ढुङ्गाना भक्तपुर २ बाट उम्मेदवार बन्नुभएको छ ।  काठमाडौँका स्थायी ढुङ्गाना २०४८ को निर्वाचनपछिका सभामुख हुनुहुन्थ्यो ।  काँग्रेसबाट चुनावी प्रतिस्पर्धामा आउनुभएका वरिष्ठ अधिवक्ता ढुङ्गानासँग एमालेका युवा नेता महेश बस्नेत प्रतिस्पर्धामा हुनुहुन्छ ।  पूर्वउद्योगमन्त्री रहनुभएका बस्नेत यसअघि भक्तपुर २ बाटै पराजित हुनुभएको थियो ।  
उदय भर्सेस नवराज
नेपाल प्रहरीका पूर्वडीआइजी नवराज सिलवाल वाम गठबन्धनका तर्फबाट ललितपुर १ बाट प्रतिनिधिसभा उम्मेदवार बनेका बन्नुभएको छ ।  सरकारले प्रहरी महानिरीक्षक नबनाएपछि मुद्दा मामिलाका कारण सिलवाल चर्चामा आउनुभएको थियो ।  आइजीपीका प्रत्याशी सिलवालले एआईजी बढुवामा समेत पर्न नसकेपछि प्रहरी सेवाबाट राजीनामा दिनुभएको थियो ।  सिलवालसँगको प्रतिस्पर्धामा लोकतानित्रक गठबन्धनबाट उदयशमशेर राणा हुनुहुन्छ ।  

थप समाचार
प्रतिकृया
नाम

ईमेल

ठेगना