पहिलो तीन महिना: मलेसिया रोजगारीको पहिलो गन्तव्य


सीता शर्मा

malaysia-citiesकाठमाडौँ, कात्तिक १७ गते ।  चालू आर्थिक वर्षको पहिलो तीन महिनामा मलेसिया नेपाली कामदारको प्रमुख गन्तव्य मुलुक भएको छ ।  अघिल्लो आर्थिक वर्षमा तेस्रो गन्तव्य मुलुक भएको मलेसिया चालू आर्थिक वर्षमा प्रमुख गन्तव्य मुलुक हुन पुगेको हो ।  वैदेशिक रोजगार विभागका अनुसार साउन, भदौ र असोज महिनामा वैदेशिक रोजगारीमा गएको सङ्ख्याको अवस्था हेर्दा सबैभन्दा धेरै मलेसिया गएका छन् ।  जबकि गएको आर्थिक वर्षको पहिलो तीन महिनाको अवधिमा कतार जाने नेपालीको सङ्ख्या सबैभन्दा धेरै थियो ।  
 विभागका अनुसार चालू आर्थिक वर्षको पहिलो तीन महिनामा ३१ हजार २६६ जना नेपाली कामदार रोजगारका लागि मलेसिया गएका छन् भने कतार २० हजार २९१ जना गएका छन् ।  अघिल्लो वर्ष मलेसियाका लागि १९ हजार १८० जनाले श्रमस्वीकृति लिएका थिए भने कतारका लागि २७ हजार ६२० जनाले श्रमस्वीकृति लिएको तथ्याङ्क विभागसँग छ ।  यस्तै सो अवधिमा संयुक्त अरब इमिरेटस् (युएई) मा १४ हजार नेपाली श्रमिक रोजगारीका लागि गएका छन् भने ११ हजार ४१९ जना साउदी अरब गएका छन ।  यो अवधिमा कुल ८४ हजार ७७६ जनाले संस्थागत तर्फबाट अन्तिम श्रम स्वीकृति लिएकोमा मलेसियाको हिस्सा मात्रै ३६ दशमलव ८९ प्रतिशत छ ।  
विभागका प्रवक्ता मोहन अधिकारीले कतारमा छिमेकीको नाकाबन्दीको प्रभावले पछिल्लो समय मलेसिया सुरक्षित देखिएकाले पछिल्लो समयमा मलेसिया जाने सङ्ख्या बढेको जानकारी गराउनुभयो ।  
उहाँले भन्नुभयो, कतारमा त्यस्तो ठूलै समस्या देखिएको त होइन तर निर्माण क्षेत्रमा कामदारको माग घटेको छ, साउदी अरब आफै आर्थिक मन्दीको समस्यामा गुज्रिएको छ, त्यसकारण मलेसिया पछिल्लो दिनमा उत्कृष्ट गन्तव्य बनेको हो ।  
वैदेशिक रोजगार व्यवसायी विमल ढकालले दुई वर्षअघिसम्म नेपाली कामदारका लागि त्यति सुरक्षित नभएको मलेसिया अहिले क्रमिक रूपमा सुरक्षित र भरपर्दो बन्दै गएकाले पछिल्लो पटक नेपालीका लागि मलेसिया महिलो गन्तव्य मुलुक बन्न सफल भएको बताउनुभयो ।
कतारमाथि साउदी अरबको नेतृत्वमा छिमेकी देशले लगाएको नाकाबन्दीका कारण त्यहाँबाट माग कम भएको र नेपालीको जाने चाहना पनि केही घटेको उहाँको भनाइ छ ।  नेपाल वैदेशिक रोजगार व्यवसायी सङ्घका पूर्वअध्यक्षसमेत रहनुभएका ढकालले खाडी मुलुकमा रमजान पर्व पर्नु र नेपालको दसैँ तिहारले गर्दा ती देशमा जानेको सङ्ख्या कम हुँदा पनि मलेसिया अगाडि देखिएको बताउनुभयो ।
गत आर्थिक वर्षको तीन महिनामा भने कतारका लागि सबैभन्दा धेरै २७ हजार ६२० जनाले अन्तिम श्रम स्वीकृति लिएका थिए ।  सोही अवधिमा कुल ८८ हजार ५५३ जनाले अन्तिम श्रम स्वीकृति लिएकोमा कतारको हिस्सा ३१ दशमलव १९ प्रतिशत हो ।  गत वर्ष कतारपछि साउदी अरबका लागि २५ हजार ६९९, मलेसियाका लागि १९ हजार १८० र दुबईका लागि ११ हजार ७० जनाले अन्तिम श्रम स्वीकृति लिएका छन् ।  

थप समाचार
प्रतिकृया
नाम

ईमेल

ठेगना