हिउँदे आरोहणमा बढ्यो आकर्षण

विश्वास रेग्मी

काठमाडौं, कात्तिक १९ गते ।  हिमाल आरोहणको याम नजिकिदैं गर्दा अनुमति लिनेको सङ्ख्या पनि बढ्न थालेको छ । विशेषगरी कम उचाइका हिमालका लागि परिचित ‘हिउँदे आरोहण’ अनुमतिको समय बाँकी छँदै गत बर्षको तुलनामा एक सयभन्दा बढीले अनुमति लिइसकेका छन् ।  पर्यटन विभागका अनुसार अनुमति खुला गरिएको एक महिना अन्तरमै एक हजार २६९ जनाले आरोहणको अनुमति लिइसकेका छन् ।  हिमाल आरोहणका लागि बर्षको दोस्रो सिजनका रुपमा रहेको हिउँदे आरोहणमा गत बर्ष कुल एक हजार १२५ जनाले अनुमति लिएको विभागको तथ्याङ्क छ ।  
विभागले गत भदौ १३ देखि हिउँदे आरोहणको अनुमति उपलब्ध गराएको थियो ।  आरोहण अनुमतिका लागि केहि हप्ता बाँकी रहेकोमा सङ्ख्या अझै बढ्न सक्ने विभाग अन्तर्गतको अनुमति शाखाका रामेश्वर निरौलाले जानकारी दिनुभयो ।  विभागको तथ्याङ्क अनुसार दुई दर्जनभन्दा बढी हिमालका लागि गत हप्तासम्म १६० ओटा आरोहण दलले अनुमति लिएका छन् ।  अधिकांश विदेशी आरोहण दलको बाहुल्यता रहेको यस सिजनका लागि अहिलेसम्म १५ ओटा नेपाली दलले अनुमति प्राप्त गरेका छन् ।  mount climbing
गत हप्तासम्मको तथ्याङ्क अनुसार आरोहीको पहिलो रोजाइमा आमादब्लम हिमाल परेको छ ।  छ हजार ८१४ मिटर उचाइको यस हिमालका लागि २७४ जनाले आरोहण अनुमति लिइसकेका छन् ।  त्यस्तै दोस्रो रोजाइमा परेको आठ हजार १६३ मिटर उचाइ सहितको मनास्लु हिमालका लागि २६१ जनाले अनुमति लिएको विभागले जनाएको छ ।  सरिबुङ् हिमालमा पनि आरोहीको आकर्षण देखिएको छ ।  यसका लागि १४० जनाले अनुमति लिइसकेका छन् ।  मुस्ताङ् हिमालका लागि ५८ जनाले अनुमति लिएकोमा थापा पिकमा ४९ जनाले अनुमति पाइसकेको विभागको तथ्याङ्क छ ।  प्रसिद्ध धौलागिरी हिमाल आरोहणका लागि अहिलेसम्म दश जनाले अनुमति पाएका छन् ।  आरोहणका लागि मकालु, ल्होत्से, भृकुटी लगायत प्रसिद्ध हिमालमा पनि आरोहीको आकर्षण देखिएको छ ।  विशेषगरी ठूला उचाइका हिमालका लागि अभ्यास आरोहणका रुपमा कम उचाइका हिमाल आरोहण गर्ने प्रचलनमा रहेको छ ।  हिउँदे आरोहण आरोहीका लागि गर्मियाममा सगरमाथा लगायत अन्य चर्चित हिमाल आरोहणको तयारीका रुपमा पनि रहने गरेको छ ।  विभागले हालै मात्र नेपाल पर्वतरोहण सङ्घ(एनएमए)ले अनुमति दिदै आएका ३३ ओटा हिमालको आरोहण अनुमति पनि आफै दिने निर्णय गरेको थियो ।  


थप समाचार
प्रतिकृया
नाम

ईमेल

ठेगना