वामगठबन्धन अपरिहार्यः शाक्य

गोरखापत्र समाचारदाता-
कीर्तिपुर, कात्तिक २२ गते । नेकपा (माओवादी केन्द्र)का सचिवालय सदस्य हितमान शाक्यले समृद्ध नेपाल, स्थिर सरकार र विकासको लागि वामगठबन्धन अपरिहार्य रहेको बताउनुभएको छ ।
कीर्तिपुर सामुदायिक भवनमा नेकपा (एमाले)निकट पेशागत बुद्धिजीवीहरुको समूहले आयोजना गरेको उम्मेदवार भेटघाट कार्यक्रममा बोल्दै नेता शाक्यले राष्ट्रिय तथा अन्तर्राष्ट्रिय परिघटनालाई विश्लेषण गरेर दुई पार्टीले वामगठबन्धन गठन गरेको स्पष्ट पार्नुभयो ।

hitman -upesh maharjan
काठमाडांैँ जिल्ला क्षेत्र नं.१० का प्रतिनिधिसभामा वामगठबन्धनका साझा उम्मेदवार रहनुभएका नेता शाक्यले एउटै विचार र सिद्धान्त भएका वामपन्थी घटकहरु छरिएकाले देशले निकास पाउन नसकेको स्मरण गर्दै देशमा दुई पार्टी पद्धतिको विकास भए देशले चाँडै फड्को मार्ने दाबी गर्नुभयो ।
वामपन्थीहरु तितरवितर हुँदा दुईपटक नेपाली काँग्रेसले विजय हासिल गरे पनि वामपन्थीहरुको किल्ला कीर्तिपुरमा यो पटक वामपन्थीहरुको जीत सुनिश्चित रहेको उहाँले दाबी गर्नुभयो ।
कीर्तिपुरको ऐतिहासिक, पूरातात्विक, वन सम्पदा, प्रकृति, संस्कृति, शिक्षाको क्षेत्रमा अग्रणी रहे पनि निर्वाचित जनप्रतिनिधिहरुले व्यक्त गरेको प्रतिबद्धता पूरा गर्न नसकेकाले विकासमा पछाडि परेको शाक्यले बताउनुभयो ।
नेकपा (एमाले)की नेतृ तथा उक्त क्षेत्रको प्रदेश ‘ख’का प्रत्यक्ष उम्मेदवार रमा आलेमगरले जुनसुकै शक्तिले चाहेर पनि निर्वाचन विथोल्न नसक्ने बताउँदै वामपन्थीहरुको जीत पक्का भएको बताउनुभयो । नेकपा (माओवादी केन्द्र)का स्थानीय नेता तथा प्रदेश ‘क’का प्रत्यक्ष उम्मेदवार दिलिप महर्जनले आउँदो निर्वाचनपछि पार्टी एकता औपचारिक रुपमा घोषणा हुन मात्र बाँकी रहेको चर्चा गर्नुभयो ।
सोही कार्यक्रममा त्रिभुवन विश्वविद्यालयका पूर्वउपकुलपति प्रा.डा. हीराबहादुर महर्जनले अग्रगामी र यथास्थितिवादी दुई विचार बीचको लडार्इंमा नेपालका बुद्धिजीवीहरुले अग्रगामी पक्षधरहरुलाई सहयोग दिनुपर्नेमा जोड दिनुभयो ।
यसैबीच, कीर्तिपुर नयाँबजारमा बुधबार नेकपा (एमाले) र नेकपा (माओवादी केन्द्र)को संयुक्त बैठकले पार्वती थापामगर र रामशरण आलेमगरको नेतृत्वमा ३३ सदस्यीय साझा निर्वाचन परिचालन समितिको सचिवालय गठन गरेको छ ।फोटो – उपेश महर्जन (गोरखापत्र अनलाइन)

 

थप समाचार
प्रतिकृया
नाम

ईमेल

ठेगना