तीन जना पूर्वसभामुख चुनावी प्रतिस्पर्धामा

tin sabhamukhकाठमाडौंँ, कात्तिक २५ गते । आसन्न प्रतिनिधिसभा निर्वाचनमा चार जना पूर्वसभामुख चुनावी मैदानमा हुनुहुन्छ । नेपालको इतिहासमा छ जना पूर्वसभामुख रहनुभएकोमा नेपालको पहिलो सभामुख कृष्णप्रसाद भट्टराईको निधन भइसकेको छ । उहाँ विसं २०१५ सालको निर्वाचनपछिको संसद्मा सभामुख हुनुहुन्थ्यो । 

जीवित रहनुभएका पाँच जना पूर्व सभामुखमध्ये तारानाथ रानाभाटबाहेक चार जनाले फेरि संसद्मा जाने चाहनासहित उम्मेदवार बन्नुभएको छ । तीमध्ये तीन जना प्रत्यक्ष र एक जना समानुपातिक उम्मेदवार हुनुहुन्छ ।
विसं २०४६ मा प्रजातन्त्र पुनःस्थापना भएपछि २०४८ सालको प्रतिनिधिसभाका सभामुख दमननाथ ढुङ्गानाले २३ वर्षपछि फेरि संसद्मा पुग्न प्रतिस्पर्धा गर्दै हुनुहुन्छ ।
काठमाडौँको बत्तीसपुतलीका वासिन्दा ढुङ्गाना भक्तपुरको क्षेत्र नम्बर–२ बाट नेपाली काँग्रेसका उम्मेदवार बन्नुभएको हो । यसबीचमा उहाँ शान्ति, मानव अधिकार र सङ्क्रमणकालीन न्यायको क्षेत्रमा लाग्नुभएको थियो ।
प्रतिस्पर्धा वाम गठबन्धनको तर्फबाट नेकपा (एमाले) का उम्मेदवार पूर्वमन्त्री महेश बस्नेतसँग ढुङ्गानाको हुँदैछ । नेपाल मजदुर किसान पार्टीका निवर्तमान सांसद् अनुराधा थापासमेत गरी १३ जना उम्मेदवार सो क्षेत्रमा उम्मेदवार हुनुहुन्छ । ढुङ्गानापछिका सभामुख रामचन्द्र पौडेल तनहुँ–१ बाट नेपाली काँग्रेसको उम्मेदवार बन्नुभएको छ । उहाँ २०४८ देखिका सबै संसदीय तथा संविधान सभाका दुवै निर्वाचनमा जित हासिल गर्दै आउनुभएको छ ।
उहाँको मुख्य प्रतिस्पर्धा वाम गठबन्धनको तर्फबाट नेकपा (एमाले) का उम्मेदवार कृष्णकुमार श्रेष्ठसँग हुने देखिएको छ । पौडेलविरुद्ध वागी उम्मेदवारी दिनुभएका नेपाली काँग्रेसकै पूर्व सहमहामन्त्री गोविन्दराज जोशीको उम्मेदवारी निर्वाचन आयोगले खारेज गरिसकेको छ । यसले पौडेललाई निर्वाचन अलि सहज बनाइदिएको भए पनि सो क्षेत्रमा अरू नौ जना उम्मेदवार पनि प्रतिस्पर्धामा हुनुहुन्छ ।
पौडेलपछिका सभामुख तारानाथ रानाभाट भने प्रतिस्पर्धामा रहनुभएको छैन । रानाभाटपछि दुई कार्यकाल सभामुख रहनुभएका सुवास नेम्वाङ इलाम–२ बाट वाम गठबन्धनको तर्फबाट नेकपा (एमाले) का उम्मेदवार बन्नुभएको छ । उहाँका प्रमुख प्रतिस्पर्धीमा नेपाली काँग्रेसका तर्फबाट पूर्वराज्यमन्त्री केशव थापा रहनुभएको छ । उहाँहरूसँगै अन्य १० जना प्रतिस्पर्धी हुनुहुन्छ ।
निवर्तमान सभामुख ओनसरी घर्तीमगर पनि प्रतिनिधिसभामा पुनः आउन उम्मेदवार बन्नुभएको छ । तर, अन्य पूर्व सभामुखभन्दा भिन्न उहाँ समानुपातिक सूचीबाट उम्मेदवार बन्नुभएको छ । नेकपा माओवादी (केन्द्र) ले उहाँलाई समानुपातिक सूचीमा राखेको छ ।

थप समाचार
प्रतिकृया
नाम

ईमेल

ठेगना