‘केरुङ–काठमाडौँ रेलमार्ग सम्भव’

लक्ष्मण दर्नाल

 

काठमाडौँ, कात्तिक २५ गते । रसुवाको केरुङदेखि काठमाडौँसम्मको रेलमार्ग निर्माण सम्भव रहेको चिनियाँ अध्ययन टोलीले बताएको छ । चीनको सरकारी टोलीले केरुङ–काठमाडौँ, काठमाडौँ–पोखरा र काठमाडौँ–लुम्बिनीसम्म रेलमार्गको सम्भाव्यताका बारेमा प्रारम्भिक अध्ययन गरेपछि सो कुरा जानकारी दिएको हो । अध्ययन भ्रमण पश्चात शुक्रबार भौतिक पूर्वाधार तथा यातायात मन्त्रालयमा आयोजित बैठकमा सो जानकारी दिइएको हो ।
भौगोलिक रूपमा कठिन भए पनि केरुङ–काठमाडौँ रेलमार्ग बनाउन सकिने चिनियाँ अध्ययन टोलीले बताएको मन्त्रालयका सहसचिव एवं प्रवक्ता राजेन्द्रराज शर्माले जानकारी दिनुभयो । बैठकमा अध्ययन भ्रमण गरिएको स्थानमा रेलमार्ग निर्माण गर्न सम्भव रहेको भन्ने निर्णय गरी दुई देशबीचका अधिकारीले हस्ताक्षर गर्नुभएको प्रवक्ता शर्माले बताउनुभयो । समझदारीमा भौतिक पूर्वाधार मन्त्रालयका सचिव र चाइना रेलवे एडमिनिस्ट्रेसनका उपप्रशासकले हस्ताक्षर गर्नुभएको छ ।
अध्ययन भ्रमणपछि रेलमार्ग निर्माण गर्न चिनियाँ टोली उत्साहित भएको रेलवे विभागले जनाएको छ । शुक्रबारको बैठकमा चीनको अध्ययन टोलीले भौगोलिक लगायतका कठिनाइका बारेमा चासो राखेको विभागका प्रवक्ता प्रकाशभक्त उपाध्यायले जानकारी दिनुभयो । विभागका अनुसार प्राविधिक समस्या बढी औँल्याइएको छ । प्रवक्ता उपाध्यायले भन्नुभयो, हामीलाई भौगोलिक अवस्थाले गर्दा समस्या हुन्छ कि भन्ने लागेको थियो । जस्तोः केरुङमाथि लेकमा छ, स्यापु्रmवेशी एकलमै तल छ तर रेलमार्ग निर्माण गर्न सम्भव रहेको उनीहरूले बताएका छन् ।
बैठकमा भौगोलिक विकटता र भूकम्पले असर गरेको पहाडका चुनौतीका बारेमा पनि छलफल भएको छ । प्राविधिक समस्या सँगसँगै कानुनी समस्याका बारेमा पनि छलफल भएको छ । अध्ययन टोलीले नेपालको कानुनी र प्रशासनिक जटिलता तथा ढिलासुस्तीका बारेमा पनि चासो राखेको विभागले जनाएको छ । वातावरणीय संरक्षणसम्बन्धी ऐनको निर्णय प्रक्रिया लामो भएको र जग्गा प्राप्तिसम्बन्धी झन्झटिला प्रक्रिया रहेको बारेमा पनि टोलीले चासो व्यक्त गरेको छ । प्रशासनिक जटिलता र ढिलासुस्तीका बारेमा पनि छलफल गरेको छ । साथै नेपालमा संरचना वा पूर्वाधार विकास ऐनको आवश्यकता औँल्याइएको छ तर यी जटिलता हँुदाहुँदै पनि काम गर्न सकिन्छ भन्ने कुरा चिनियाँ अध्ययन टोलीले बताएका छन्, टोलीले सम्भव छ, हामी सकारात्मक छौँ, नेपालले पनि पहल गर्नुप¥यो भन्नुभएको छ, प्रवक्ता उपाध्यायले भन्नुभयो ।
अध्ययनपछि रेलमार्ग निर्माणको सवालमा दुई देशबीच निरन्तर छलफल गर्न र जानकारी आदान प्रदान गर्न एक÷एक जना ‘फोकल पर्सन’ तोकिएको छ । त्यसमा नेपालका तर्फबाट विभागका सिनियर डिभिजनल इन्जिनियर अमन चित्रकार रहनुभएको छ भने चिनियाँ सरकारको तर्फबाट राष्ट्रिय रेलवे प्रशासनका उप महानिर्देशक वाङ् च्यायुवँलाई तोकिएको छ । रेलमार्ग निर्माणको विषयमा अर्को बैठक सन् २०१७ भित्रै बेइजिङमा गर्ने सहमति भएको छ ।
मन्त्रालयका प्रवक्ता शर्माले रेलमार्ग निर्माणका लागि टेक्निकल सहयोग चीन आफैले गर्न तयार रहेको बताउनुभयो । उहाँले भन्नुभयो, टेक्निकल सहयोग चीनले गर्छु भनेको छ तर फाइनान्सियल रूपमा सरकार आफैले जोहो गर्नुपर्ने छ, चीनले के कति सहयोग गर्ने भन्ने कुरा पनि बाँकी नै छ तर यसका लागि सरकारले आर्थिक लगायतका योजना बनाउनुपर्छ । चिनियाँ अध्ययन टोली र नेपालको रेलवे विभागले रसुवा, पोखरा, लुम्बिनी र काठमाडौँको प्रारम्भिक अध्ययन गरेको हो । तीन दिनसम्म गरिएको स्थलगत अध्ययन तथा भ्रमणपछि शुक्रबार मन्त्रालयमा बैठक बसेको हो ।
चीनको नेसनल रेलवे एडमिनिस्ट्रेसनका उपप्रशासक जेङ जियनको नेतृत्वमा २३ सदस्यीय उच्चस्तरीय टोली रेलवे अध्ययनका लागि नेपाल आएको थियो । चीन सरकार र नेपाल सरकारको सम्झौताअनुसार अध्ययन भएको विभागले जनाएको छ । टोलीले अध्ययन प्रतिवेदन चीन सरकारलाई बुझाउने जनाइएको छ ।
काठमाडौँ–पोखरा रेलमार्गको मुग्लिङ आसपासबाट नारायणगढ हुँदै लुम्बिनी जोड्ने गरी अध्ययन भएको छ । केरुङ–काठमाडौँ रेलमार्ग भौगोलिक अवस्थाका कारणले ठूलो लगानी र प्रविधिको आवश्यक रहेको विभागले जनाएको छ । अध्ययनपछि दुई देशबीचको सम्झौताअनुसार रेलमार्गको काम अघि बढ्ने विश्वास लिइएको छ । अध्ययन भ्रमणमा चीनको परराष्ट्र र यातायात मन्त्रालयका प्रतिनिधि, नेसनल डेभलपमेन्ट कमिसनका प्रतिनिधि, परामर्शदाता, बैङ्कका अधिकारी, निर्माण व्यवसायी र नेपालको रेलवे विभागका पदाधिकारीको सहभागिता थियो । चिनियाँ अध्ययन टोली शुक्रबार स्वदेश फर्किएको छ ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds