पच्चीस सबस्टेसन थपिँदै


लक्ष्मीप्रसाद उपाध्याय

substationकाठमाडौँ, कात्तिक २६ गते ।  नेपाल विद्युत् प्राधिकरणले गुणस्तरीय, सुरक्षित विद्युतीय सेवा प्रवाह तथा सेवा विस्तार गर्नका लागि सव स्टेसन निर्माण र प्रसारण लाइन मर्मत सम्भार गर्ने कामको थालनी गरेको छ ।  
बिजुली पुगेको ठाउँमा समेत बिजुली आउने जाने भइरहने र आएको बिजुली पनि मधुरो हुने तर ग्राहकले उठेको महसुल तिर्नैपर्ने विषय चौतर्फी टीकाटिप्पणी हुन थालेको अवस्थामा प्राधिकरणले गुणस्तरीय विद्युत् प्रवाह गर्ने र थप सेवा विस्तार गर्ने योजना अगाडि बढाएको हो ।
ग्राहक सङ्ख्या निकै बढी भइसकेका तर सवस्टेसनको क्षमताले धान्न नसक्ने अवस्थाको पहिचान गरी यो कार्यक्रमलाई सञ्चालन गर्न थालिएको हो ।  आयोजना व्यवस्थापन निर्देशनालयका प्रमुख मनोज सिलवालका अनुसार देशभरका विभिन्न ठाउँका २५ वटा नयाँ ३३/११ केभी क्षमताका सवस्टेसन निर्माण गरिने भएका छन् ।  यी सवस्टेसन निर्माणले विद्युत् प्रवाहलाई नियमित गर्न मद्दत गर्नेछ ।  उहाँले गोरखापत्रसँगको कुराकानीमा भन्नुभयो, हामीले नयाँ सवस्टेसन निर्माणका लागि ठेक्का सम्झौता गरी ४० प्रतिशत जति काम सम्पन्न भइसकेको छ, आगामी एक वर्षभित्रै यी सवस्टेसनको निर्माण कार्य पूरा हुने गरी सम्झौता भएको छ ।
त्यसैगरी पुराना सवस्टेसनको क्षमता सुदृढीकरण गर्ने कार्यलाई पनि एकैसाथ अगाडि बढाइने भएको छ ।  निर्देशनालयका अनुसार यहीँ समयमा विभिन्न ठाउँमा रहेका पुराना ११ वटा सवस्टेसनको क्षमता सुदृढीकरण गर्न लागिएको छ ।  
सवस्टेसन निर्माण र प्रसारण लाइनको मर्मत सम्भार गरेपछि नयाँ दुई लाख ग्राहकलाई हालकै अवस्था विद्युत् वितरण गर्न सकिने लक्ष्य प्राधिकरणले लिएको छ ।  निर्देशनालय प्रमुख सिलवालले भन्नुभयो, वितरण लाइन र सवस्टेसन ओभरलोड भएकाले गुणस्तरीय विद्युतीय सेवा प्रवाह गर्न सकिएको थिएन, अब यी समस्या समाधान हुनेछन् ।
पुराना सवस्टेसन र प्रसारण लाइन भएकाले प्राविधिक चुहावट अधिक हुने गरेको छ ।  हालको प्रसारण लाइन र सव स्टेसनका कारणले २५ प्रतिशत भन्दा बढी विद्युत् चुहावट हुने गरेको प्राधिकरणका अध्ययनले देखाएको छ ।  
ऊर्जा मन्त्रालयमा मन्त्री, सचिव फेरिँदा र प्राधिकरणमा नयाँ कार्यकारी निर्देशक आउँदा प्राविधिक चुहावट नियन्त्रण गर्ने प्रतिवद्धता गर्ने गरिन्छ ।  प्राधिकरणले हरेक वर्ष प्राविधिक चुहावट नियन्त्रणलाई विशेष कार्ययोजनाका रूपमा प्रस्तुत गर्ने गरेको छ तर प्राविधिक चुहावट नियन्त्रणमा खासै प्रगति भएको देखिँदैन ।    

थप समाचार
प्रतिकृया
नाम

ईमेल

ठेगना