भाइबरको चिठ्ठाले फसाउला !

विश्वास रेग्मी

काठमाडौँ, मङ्सिर ४ गते । विगत केही हप्तायता ओभर दी टप (ओटीटी)सेवामार्फत कल तथा म्यासेज गरेर लाखौंको चिठ्ठा परेको भन्दै बैङ्क तथा वित्तीय संस्थाको खाता नम्बर माग हुन थालेपछि प्रयोगकर्ता अलमलमा छन् । खासगरी भाइबर, ह्वाट्सएपजस्ता म्यासेजिङ तथा भ्वाइस एप्समार्फत विदेशका नम्बर प्रयोग गरी चिठ्ठा परेकोले त्यसलाई प्राप्त गर्न बैङ्क खातामा रकम जम्मा गरिदिन अपरिचित नम्बरबाट प्रयोगकर्तालाई आग्रह गर्ने प्रयोगकर्ताको भनाइ छ । कतिपय अवस्थामा उपहार पठाएको भन्दै खाता नम्बर उपलब्ध गराउनसमेत दबाब दिने उनीहरूको गुनासो छ । viber

बैङ्क खाताबाट पैसा प्राप्त पार्ने नियतसहित चिठ्ठाको प्रलोभन देखाउने प्रवृत्ति पछिल्लो समय बढ्दो छ । भाइबर तथा ह्वाट्सएपबाट प्राप्त हुने त्यस्ता कलमा हिन्दी, ऊर्दूलगायतका भाषा प्रयोग गरी चिठ्ठाको प्रलोभनमा पार्ने पाइएको छ । ००९२ तथा ००९३ जस्ता कोडको प्रयोग गरी विदेशबाट बैङ्क खाता नम्बर माग हुने गरेको छ । यसबाहेक ८८८८८८८८८, १२३४५६ जस्ता अपरिचित नम्बरबाट कल गरेर धम्की दिने तथा फिरौती माग गरेको जस्ता गुनासो पनि प्रयोगकर्ताको रहेको छ । चिठ्ठाको प्रलोभनबाट प्रयोगकर्तालाई सचेत गराउन नेपाल दूरसञ्चार प्राधिकरण, केन्द्रीय अनुसन्धान ब्यूरो र सेवा प्रदायकले प्रयास अघि बढाइसकेको जनाएका छन् ।
प्राधिकरणले अपरिचित जुनसुकै नम्बरबाट कल प्राप्त भएमा त्यसलाई नउठाउन प्रयोगकर्तालाई आग्रह गरेको छ । ‘गलत नियत र आपराधिक गतिविधिमा संलग्न व्यक्तिले ठग्ने नियतका साथ यस्ता कल तथा म्यासेज गरेको पाइएको छ’ प्राधिकरण प्रवक्ता मिनप्रसाद अर्यालले भन्नुभयो ‘यस्ता फ्रड कलको अनुसन्धानका लागि प्रक्रिया अघि बढाइसकिएको छ’ । प्राधिकरणले अनुसन्धान ब्यूरोसहितको छलफलमा दुरसञ्चार सेवा प्रदायकलाई ‘कलिङ् लाइन आइडेण्टिफिकेसन
(सीएलआइ)नभएका कललाई ब्लक गर्न हालै निर्देशन पनि दिइसकेको छ । त्यस्तै ग्राहकले सहजै पहिचान गर्न नसक्ने फोन कल रोक्न पनि प्राधिकरणले निर्देशन जनाएको छ । अन्तर्राष्ट्रिय दूरसञ्चार युनियनले पनि स्पष्ट कोड उल्लेख भएका
(सीएलआई) कल मात्र सेवाप्रदायकले प्रयोगकर्तासम्म पु¥याउनुपर्ने व्यवस्था गरेको छ ।
दूरसञ्चार सेवा प्रदायकहरूले पनि आफ्ना प्रयोगकर्तालाई भाइबर तथा ह्वाट्सएपबाट आउने त्यस किसिमका कलको प्रलोभनमा नपर्न तथा बैङ्क खाता उपलब्ध नगराउन सूचना जारी गरिसकेका छन् । नेपाल टेलिकमले ठगी गर्ने नियतले यस्तो कल गर्ने पाइएकोले सजग रहन तथा व्यक्तिगत जानकारी कसैलाई नदिन सचेत गराएको छ । टेलिकमका प्रवक्ता प्रतिभा वैद्यका अनुसार त्यस्ता कल प्राप्त हुने गेटवे बन्द गर्न सम्बन्धित सेवा प्रदायकलाई कम्पनीले जानकारी गराइसकेको छ । ‘फ्रड कल प्राप्त हुने गेटवेलाई हामीले निरन्तर बन्द पनि गराइरहेका छौँ’ उहाँले भन्नुभयो । त्यस्तै एनसेलले कम्पनीको लोगो तथा नाम दुरुपयोग गरी भाइबर तथा ह्वाट्एसमा २५ लाख परेको म्यासेज पठाएर भ्रममा पारेकोले सचेत रहन आग्रह गरेको छ । आफ्ना ग्राहकलाई सधैँ आधिकारिक नम्बरबाट मात्र सन्देश पठाउने भएकोले यस्ता गलत सन्देशमा विश्वास नगर्न एनसेलले सुझाव दिएको छ । त्यस्तै नेपाल प्रहरीले पनि भाइबर, म्यासेन्जरमा कल गरी चिठ्ठा परेको भन्दै खाता नम्बर दिएर त्यसमा रकम जम्मा गर्न लगाउने गिरोह विदेश तथा नेपालभर नै सक्रिय रहेकोले प्रलोभनमा नपर्न तथा प्रहरी कार्यालयमा उजुरी दर्ता गर्न अनुरोध गरेको छ ।

 

थप समाचार
प्रतिकृया
नाम

ईमेल

ठेगना