निर्वाचनको सम्पूर्ण तयारी पूरा


भउचप्रसाद यादव

काठमाडौंँ, मङ्सिर ९ गते ।  आसन्न प्रतिनिधिसभा र प्रदेशसभाको पहिलो चरणको निर्वाचनको सम्पूर्ण तयारी पूरा भएको निर्वाचन आयोगले जनाएको छ ।  पहिलो चरणको निर्वाचनमा प्रदेश नम्बर १ का सातवटा, प्रदेश नम्बर ३ का छ वटा, प्रदेश नम्बर ४ का छ वटा, प्रदेश ५ का दुईवटा, प्रदेश ६ का सातवटा र प्रदेश ७ का चारवटा जिल्लामा पहिलो चरणमा निर्वाचन हुँदैछ ।
पहिलो चरणका निर्वाचन अन्तर्गतका सबै मतदान केन्द्रमा कर्मचारी पुगिसकेको र कर्मचारीले मतदान केन्द्र बनाउने काम गरिरहेको जानकारी निर्वाचन आयोगका प्रवक्ता नवराज ढकालले दिनुभएको छ ।  उहाँका अनुसार, महिला, पुरुष र शारीरिक अपाङ्गता भएका मतदाताका लागि छुट्टाछुट्टै लाइनको व्यवस्था हुने गरी मतदान केन्द्रको निर्माण भइरहेको निर्वाचन आयोगले जनाएको छ ।  पहिलो चरणमा ३२ जिल्लाका ३७ प्रतिनिधिसभा र ७४ प्रदेशसभाका लागि मङ्सिर १० गते निर्वाचन हुँदैछ ।  Election-Commission-Nepal-768x411
मतदानका लागि आवश्यक पर्ने मतपत्र, मतपेटिका, स्वस्तिक छाप, नङमा लगाउने मसीलगायत ६७ प्रकारका निर्वाचन सामग्री सबै मतदान केन्द्रमा पुगिसकेको बताउँदै प्रवक्ता ढकालले पहिलो चरणको निर्वाचन अन्तर्गत दुई हजार ९१९ मतदान स्थलको चार हजार ४६५ मतदान केन्द्रमा ३१ लाख ९१ हजार ९४५ मतदाताले मतदान गर्नु हुने जानकारी दिनुभयो ।  प्रवक्ता ढकालका अनुसार पहिलो चरणको निर्वाचनमा प्रतिनिधिसभाका लागि १६ जना महिलासहित २८२ जना र प्रदेशसभाका लागि बीसजना महिलासहित ४२० जना उम्मेदवार चुनावी मैदानमा छन् ।  यसरी पहिलो चरणको निर्वाचनमा प्रतिनिधिसभा र प्रदेशसभा गरी ७०२ जना उम्मेदवार चुनावी मैदानमा छन् ।  
आयोगले हरेक मतदान केन्द्रमा नौदेखि १२ जना कर्मचारी खटाएको छ ।  २५० जना मतदाता भएको केन्द्रमा नौजना, पाँच सयसम्म मतदाता भएको केन्द्रमा दशजना र पाँचसय भन्दा बढी मतदाता भएको केन्द्रमा १२ जनाका दरले कर्मचारी खटाइएको छ ।  

थप समाचार
प्रतिकृया
नाम

ईमेल

ठेगना