सुरक्षा घेराभित्र राखिँदै मतपेटिका

matpitikaकाठमाडौँ, मङ्सिर १२ गते । पहिलो चरणको प्रतिनिधिसभा र प्रदेशसभा सदस्य निर्वाचनका मतपेटिका केही विकट क्षेत्रबाहेक जिल्ला सदरमुकाम ल्याउने क्रम जारी छ । योपटक यसअघिजस्तो मतगणना सुरु भएको छैन । आउँदो मङ्सिर २१ गते हुने दोस्रो चरणको मतदानपछि एकैपटक मतगणना सुरु हुनेछ । 

स्थानीय तह निर्वाचनमा सबै चरणमा मतदान सकिएलगत्तै मतगणना भए पनि अहिले एकैपटक मतगणना गर्ने निर्णय यसअघि नै भइसकेको छ । मतगणना एकैपटक हुने भएपछि मतपेटिकाको सुरक्षा कसरी हुन्छ भन्ने चासो सबैमा छ । अबको १० दिनसम्म मतपेटिका सुरक्षा घेराभित्र राखिने निर्वाचन आयोगले जनाएको छ ।
निर्वाचन आयोगका सूचना अधिकारी सूर्यप्रसाद अर्यालले सुरक्षा घेराभित्र मतपेटिका राखिने बताउनुभयो । कोठाभित्र मतपेटिका बन्द अवस्थामा राखी बाहिरबाट समेत सिल गरिने बताउँदै उहाँले भन्नुभयो, “मतपेटिका कोठाभित्र बन्द गरी सिल गरिन्छ । जनपद प्रहरीको सुरक्षामा हुनेछ । आवश्यकताअनुसार बाहिरी घेरामा सशस्त्र प्रहरी र सेनाको समेत सुरक्षा हुनेछ । ”
आयोगले मतदानपछि सिल गरिएका सबै मतपेटिका जिल्ला निर्वाचन कार्यालय वा मुख्य निर्वाचन अधिकृतको कार्यालयमा राखिनेछन् । मतदान केन्द्रबाट मतपेटिका उम्मेदवार र प्रतिनिधिको रोहबरमा मुचुल्का तयार गरी जिल्ला निर्वाचन कार्यालय वा मुख्य निर्वाचन अधिकृतको कार्यालयसम्म ल्याइनेछन् । मतपेटिका सङ्कलनका क्रममा फिर्ता भएका र प्रयोग नभएका मतपेटिका पनि दलीय प्रतिनिधिसमेतको मुचुल्का गरेर फिर्ता ल्याइनेछन् ।
मतपेटिका राखिएको स्थानमा सिल गरिनेछ । स्थानले सम्भव भएसम्म समानुपातिक र प्रत्यक्ष तर्फको मतपेटिका फरक कोठामा राख्ने तयारी निर्वाचन आयोगको छ । अबको ११ दिनसम्म चौबीसै घन्टा सुरक्षाकर्मीको सुरक्षा घेराभित्र मतपेटिका राखिनेछन् । आवश्यकताअनुसार सीसीटीभीबाट समेत मतपेटिका रहेको स्थानको निगरानी गर्ने व्यवस्था मिलाइएको छ ।
मतपेटिका राखिएको कोठामा ताला लगाई लाहाछाप गरिनेछ । मतपेटिका रहेको कोठाको सम्पूर्ण जिम्मेवारी निर्वाचन कार्यालयको हुनेछ । मतपेटिका राखिएको स्थानको चाबी जिल्ला निर्वाचन कार्यालय वा मुख्य निर्वाचन अधिकृतको कार्यालयसँग रहनेछ । राजनीतिक दलहरूले प्रतिनिधि राख्न चाहेमा प्रतिनिधि राख्न सकिने व्यवस्था सम्बन्धित जिल्ला निर्वाचन कार्यालय र मुख्य निर्वाचन अधिकृतको कार्यालयले गर्नेछ ।
मुख्य निर्वाचन अधिकृत वा जिल्ला निर्वाचन कार्यालयमा रहने मतपेटिकाको तीन तहको सुरक्षा घेराभित्र रहनेछ । मतपेटिका राखिएको स्थानबाहिर जनपद प्रहरीले सुरक्षा दिनेछ । बाहिरको पहिलो घेरामा सशस्त्र प्रहरी हुनेछ । सबैभन्दा बाहिरी घेरामा नेपाली सेनाको सुरक्षा रहनेछ । दोस्रो चरणमा मङ्सिर २१ गते मतदान सम्पन्न भएसँगै मतगणना सुरु हुनेछ ।

थप समाचार
प्रतिकृया
नाम

ईमेल

ठेगना