राजधानीमा क्रिसमस इभको रमझम

देवबहादुर कुँवर

काठमाडौँ, पुस ९ गते । दरबारमार्गका रेस्टुरेन्ट व्यवसायी रोहित किङरिङ मगर ‘क्रिसमस–इभ’ मनाउन निकै मिहिनेतसाथ लागिपर्नुभएको छ । उहाँ होटल याक एन्ड यती लाइनमा रहेको रेस्टुरेन्ट तथा लाउन्ज बार ‘किङरिङ’को सजिसजाउमा व्यस्त हुनुहुन्छ । 

इसाई धर्मावलम्बीको महान पर्व ‘क्रिसमस’ नेपालमा पनि धुमधामका साथ मनाउन थालिएकाले आफूले पनि ग्राहक आकर्षित गर्न रेस्टुरेन्ट सजाएको उहाँले बताउनुभयो । विशेषगरी क्रिसमस मनोरञ्जन गरी मनाइने भएकाले पर्यटकीय स्थल, होटल, रेस्टुरेन्ट, सपिङ मल र डिस्कोहरू झकिझकाउ गरिएको पर्यटन व्यवसायी बताउँछन् ।
ठमेल नरसिंह चोकस्थित इबिजा लाउन्ज बारका सञ्चालक दावाङ तामाङ पनि रेस्टुरेन्टलाई दुलहीझैँ सजाइरहनुभएको छ । क्रिसमस–इभ अर्थात् डिसेम्बर २५ तारिखको अघिल्लो रात्रिकालीन मनोरञ्जनका लागि ग्राहकलाई आकर्षित पार्न यतिको दुःख गर्नुपरेको हो– उहाँले भन्नुभयो । Santa-Cluse
उपत्यकाका मुख्य पर्यटकीयस्थल, विभिन्न स्टार होटल, सपिङ मल, पर्यटकीय नगरी ठमेल र दरबारमार्ग क्षेत्रमा ‘मेरी क्रिसमस–ईभ’को व्यापक तयारी देखिएको छ । होटल, रेस्टुरेन्ट तथा सपिङ मलको गेटदेखि नै रङ्गीचङ्गी बेलुन र ध्वजापताकासहित प्रवेशद्वार निर्माण गरिएका छन् ।
त्यस्तै गेटपाले तथा सुरक्षा गार्डहरूलाई सान्टा क्लाउजको पोसाक पहिरन लगाई आकर्षक र आत्मीय स्वागत सत्कारसँगै बनावटी क्रिसमस ट्रीमा सेताम्मे कपास थुपारेर हिँउको थुप्रो राखी चर्चित कलाकारको साङ्गीतिक मनोरञ्जनात्मक कार्यक्रम पनि आयोजना गरिएका छन् ।
ठमेल पर्यटन विकास परिषद्का अध्यक्ष समिर गुरुङले मेरी क्रिसमसलाई स्वागत गर्न अघिल्लो साँझ ठमेलमा सामान्य किसिमको सङ्गीत कार्यक्रम राखिएको जानकारी दिनुभयो । सार्वजनिक सवारी साधनमुक्त ठमेलको सडक चोकमा सान्टा क्लाउजको पोसाकमा सजिएकाहरूले सर्वसाधारणलाई स्वागत गर्नेछन् ।
ठमेल परिषद्ले मेरी क्रिसमस–इभ (आइतबार साँझ)को दिन बढीभन्दा बढी ग्राहक ठमेल आमन्त्रण गर्न तीन दिनअघि नै मेरी क्रिसमसको प्रचारप्रसार अभियान सञ्चालन गरेको थियो । होटल तथा रेस्टुरेन्ट व्यवसायीहरूले आफ्नै किसिमका छुट्टाछुट्टै मनोरञ्जन कार्यक्रम आयोजना गरेका छन् ।
तर, परिषद्ले नयाँ वर्ष, २०१८ मा लाइभ कन्सर्ट आयोजन गर्ने जनाएको छ । क्रिसमस इभका लागि अधिकांश होटल, सपिङ मल, रेस्टुरेन्ट, बार तथा लाउन्ज बारहरूले चर्चित गायक तथा गायिकाहरू आमन्त्रण गरी साङ्गीतिक महोत्सव आयोजना गरिएको जनाएका छन् । christmas
दरबारमार्ग क्षेत्रका पनि अधिकांश होटल तथा रेस्टुरेन्टमा क्रिसमस ट्रीका अतिरिक्त आकर्षक प्रवेशद्वार निर्माण गरी ग्राहकलाई मनोरञ्जन दिन व्यवसायीहरू सक्रिय देखिन्छन् । राजधानीका काठमाडौँ मल, सीटीसी सेन्टर, राइजिङ मललगायतका सपिङ सेन्टरहरूले प्रत्यक्ष साङ्गीतिक कार्यक्रमका अतिरिक्त ग्राहकलाई छुटको समेत व्यवस्था गरेका छन् ।
त्यस्तै ठमेलका इविजा, फेसेज, हार्ड–रक, फायर, रेगी, ओएमजी, पर्पलएज, फूलमुन, सीएनआईलगायतका दुई दर्जन रेस्टुरेन्ट तथा नाइट क्लब र लाउन्ज बारले रातभर डीजे म्युजिकसँगै गीत सङ्गीत कार्यक्रम आयोजना गरेका छन् ।
इसाई धर्मका प्रवर्तक भगवान यशुको जन्मोत्सव पारेर यो पर्व मनाउने गरिन्छ । नेपाल सरकारले पनि २०६३ सालबाट मुलुक धर्मनिरपेक्ष भएसँगै क्रिसमसका दिन सार्वजनिक बिदा दिँदै आएको छ ।
यसैबीच महानगरीय प्रहरी कार्यालयले क्रिसमस मनाउने क्रममा सर्वसाधारणको भीड लाग्ने उपत्यकाका सबै स्थानमा सुरक्षा व्यवस्था भरपर्दो बनाउन निर्देशन दिएको छ । पर्यटकीय क्षेत्र, होटल तथा सपिङ मल, डिस्को तथा नाइट क्लबमा कडा सुरक्षा निगरानी राख्न निर्देशन दिएको हो ।
त्यस्तै ठमेल र दरबारमार्ग क्षेत्रको सुरक्षाका लागि महानगरीय प्रहरी परिसर काठमाडौँका प्रहरी उपरीक्षककै नेतृत्वमा सुरक्षाकर्मी तैनाथ हुने जनाइएको छ । महानगरीय प्रहरी वृत्त लैनचोर र दरबारमार्गले क्रिसमस इभका लागि आवश्यक सुरक्षा तयारी बलियो र भरपर्दो बनाइएको जानकारी दिएको छ ।
प्रहरी वृत्त लैनचौरका प्रमुख तथा प्रहरी नायब उपरीक्षक दीपक पोखरेलले भन्नुभयो– क्रिसमस इभमा कुटपिट, झैझगडा, आगलागी, चोरी, डकैती र लुटपाट मात्र नभई अन्तर्राष्ट्रिय आपराधिक समूहको समेत घुसपैठ हुने भएकाले उच्च सुरक्षा सतर्कता अपनाइएको छ ।

थप समाचार
प्रतिकृया
नाम

ईमेल

ठेगना