उदयपुर सिमेन्टको कीर्तिमानी उत्पादन

भक्तिविलास पोखरेल

 

udaypur cementजलजले (उदयपुर), पुस १८ गते । मुलुकको सबैभन्दा ठूलो औद्योगिक प्रतिष्ठान उदयपुर सिमेन्ट उद्योगले आफ्नो उत्पादन परिमाणमा नयाँ किर्तिमान कायम गरेको छ । दैनिक आठ सय ४० मेट्रिक टन उत्पादन गर्नसक्ने क्षमता रहेको सो उद्योगले आइतबार सात सय १५ मेट्रिक टन सिमेन्ट उत्पादन गरी आफ्नो अढाई दशक लामो यात्रामा नयाँ किर्तिमानी कायम गरेको हो ।
विसं २०४९ साल मङ्सिर महिनाबाट उत्पादन सुरु गरेको उदयपुर सिमेन्ट उद्योगले यस अघि यति ठूलो परिमाणमा उत्पादन गर्न सकेको थिएन । उद्योगले अहिलेसम्मकै आफ्नो क्षमताको अधिकतम उपयोग गरेको हो । जापान सरकारले नेपाल सरकारलाई उद्योग हस्तान्तरण गरेपछि हालसम्म सबैभन्दा ठूलो परिमाणमा गैँडाछाप सिमेन्ट उत्पादन गर्न सफल भएको उद्योगका महाप्रबन्धक सुरेन्द्र पौडेलले बताउनुभयो । उहाँका अनुसार अहिले सिमेन्ट उत्पादनमा वृद्धिमात्र भएको छैन, उद्योगबाट निस्कने धूलो र धुवाँसमेत नियन्त्रण भएको छ । दैनिक प्रतिघण्टा दुई टनभन्दा बढी उढ्ने धूलो तथा धुवाँ नियन्त्रण गर्ने इलेक्ट्रोस्टारिक पावर (ईएसपी तथा पोलुसन कन्ट्रोल) मेसिन जडान गरिएपछि उद्योगबाट निस्कने धूलो र धुवाँ नियन्त्रणमा आएको हो ।
उत्पानमा आएको वृद्धिसँगै बजारमा गैँडाछाप सिमेन्टको माग पनि अत्यधिक बढेर गएको पौडेलले बताउनुभयो । उद्योगबाट उत्पादित गैँडाछाप सिमेन्टको मूल्य प्रतिबोरा आठ सय २९ रुपियाँ छ । उद्योगलाई पूर्ण क्षमतामा सञ्चालन गर्न उद्योग प्रशासनले दक्ष जनशक्तिका लागि लोकसेवा आयोगसँग विभिन्न पदका चार दर्जन बढी विज्ञापन माग गरी परिक्षा लिइरहेको पनि उहाँले जानकारी दिनुभयो ।

धुवाँधूलो पनि नियन्त्रण
उद्योगले करिब तीन करोड रुपियाँको लागतमा प्रदूषण नियन्त्रण गर्ने मेसिन इलेक्ट्रोस्टारिक पावर (ईएसपी) जडान गरेको एक महिनामा धेरै धूलो नियन्त्रण भएको उद्योगका महाप्रबन्धक पौडेलले बताउनुभयो । भारतबाट यो मेसिन ल्याएर जडान गरेपछि दैनिक प्रतिघण्टा दुई टनभन्दा बढीमात्रामा उड्ने धूलो अहिले २० किलोमा झरेको छ, उहाँले भन्नुभयो, त्यो पनि मेसिनले पूर्ण रूपमा काम गर्न थालेपछि शून्यमा झर्छ । उद्योगबाट उड्ने धूलो तथा धुवाँ नियन्त्रण गर्न प्रदूषण (कन्ट्रोल मेसिन) जडान भएपछि वायुमण्डलमा उडेर जाने धूलो रोकिएको उहाँको भनाइ छ । यसअघि मानिसको आँखाले देख्ने दूरीबाट उद्योग क्षेत्रमा धुवाँ धूलोको मुस्लो देखिन्थ्यो । उद्योगका नायब महाप्रबन्धक महेश काफ्लेले भन्नुभयो, अहिले टाढाबाट हेरे पनि धुवाँ र धूलो उडेको देखिँदैन । धूलो र धुवाँ दुवै नियन्त्रण गर्ने मेसिन अहिले एसियाली मुलुकमा आएको आधुनिक मेसिन भएको उहाँले बताउनुभयो ।
उद्योगले धूलो नियन्त्रण गर्न थालेपछि स्थानीयवासीमा खुसी छाएको त्रियुगा नगरपालिका वडा नं ५ निवासी युवराज कार्कीले बताउनुभयो । उद्योगको धूलोले सधैँ समस्या पाथ्र्यो तर अहिले त्यस्तो छैन, उहाँले भन्नुभयो । पहिले घरमा धोएर सुकाएको कपडा, पकाएर राखेको खाना, पशु चौपायाको घाँस समेत धूलोले ढाक्ने गरेको भए पनि अहिले त्यो समस्या हटेको उहाँले जानकारी दिनुभयो ।

 

थप समाचार
प्रतिकृया
नाम

ईमेल

ठेगना