नयाँ राडार सञ्चालन हुँदै

विश्वास रेग्मी

काठमाडौँ, माघ ११ गते । नेपाली आकाशमा हुने उडानलाई थप सुरक्षित बनाउने लक्ष्यसहित ललितपुरको भट्टेडाँडामा नयाँ राडार निर्माण गरिएको छ । ‘इन रुट राडार’ माघ १८ गतेदेखि औपचारिक सञ्चालनमा आउनेछ ।
त्रिभुवन अन्तर्राष्ट्रिय विमानस्थल आधुनिकीकरण आयोजना (सर्भिलेन्स) अन्तर्गत् जापान अन्तर्राष्ट्रिय सहयोग नियोग (जाइका)को सहायतामा निर्माण भएको उक्त राडारको अहिले परीक्षण जारी छ । यसअघि जडान गरिएको राडार पुरानो भएपछि जाइकाको एक अर्ब सहायता र नेपाल नागरिक उड्डयन प्राधिकरणको करिब दस करोड रुपियाँको लगानीमा भट्टेडाँडामा अत्याधुनिक राडार निर्माण गरिएको हो ।
पुरानो राडारबाट बढीमा पचास किलोमिटर आसपासको मात्र उडान निगरानी हुँदै आएकोमा नयाँ राडारबाट ४५० किलोमिटरसम्म क्षेत्रको उडानको जानकारी प्राप्त गर्न सकिने प्राधिकरणका महानिर्देशक सञ्जीव गौतमले जानकारी दिनुभयो । ‘इन रुट राडारले नेपाली आकाशको करिब ७५ प्रतिशत क्षेत्रमा भइरहेको उडानको बारेमा जानकारी दिनसक्छ, उहाँले भन्नुभयो । radar
उहाँका अनुसार पूर्वमा उच्च हिमाली क्षेत्रमा बाहेक सबै ठाउँ र पश्चिममा सुर्खेतसम्मको उडानको जानकारी भट्टेडाँडास्थित राडारबाट प्राप्त गर्न सकिन्छ । यसको सञ्चालनपछि उडानको मिहिन जानकारी प्राप्त हुने भएकाले उडान सुरक्षा पनि बढ्दै जानेछ, उहाँले भन्नुभयो । भट्टेडाँडास्थित इन रुट राडारबाट प्राप्त जानकारी त्रिभुवन अन्तर्राष्ट्रिय विमानस्थलमा निर्माण गरिएको नयाँ टर्मिनल राडारले प्राप्त गर्नेछ ।
प्राधिकरणका अनुसार नयाँ राडारबाट आकाशमा उडान भरिरहेको जहाजको बढी २५ फिट तल माथिसम्मको अवस्थिति पत्ता लाग्नेछ । यस्तो दूरी पुरानो राडारमा एक सय फिटसम्म हुने गथ्र्यो । यसले गर्दा जहाज कुन उचाइमा उडिरहेको छ भन्ने वास्तविक तथ्याङ्क पत्ता लगाउन थप सहयोग पुग्छ, आयोजना प्रमुख सञ्जीवसिंह कठायतले भन्नुभयो ।
नयाँ राडारमा आठ हजार फिट माथिका उडानको निगरानी राख्ने क्षमता रहेको छ । यसबाहेक यस राडारबाट प्राप्त हुने जानकारीको प्रयोग गरेर दुई जहाजबीचको दूरी पनि कम गर्न सकिने छ । यसअघि इन रुट राडार नहुँदा दुई जहाजबीच १५ नटिकल माइलसम्मको दूरी कायम हुनेमा नयाँ राडार सञ्चालनपछि पाँच नटिकल माइलसम्म कायम गर्न सकिने कठायतले जानकारी दिनुभयो । यसले आकाशमा उडान ट्राफिक पनि घटाउन सहयोग पुग्छ, उहाँले भन्नुभयो । काठमाडौँ आसपासको आकाशमा नियमित रूपमा ‘होल्ड’ हुने समस्या भोग्दै आएका हवाईयात्रुका लागि नयाँ राडार सञ्चालनमा आएपछि त्यस्तो समस्या कम हुने उहाँको दाबी छ ।
गत नोभेम्बरमा अमेरिकाको फेडरल एभिएसन अथोरिटी (एफएए)ले उक्त राडारको उडान परीक्षण गरेको थियो । उक्त परीक्षण सफल भएपछि केही महिनायता यसको नियमित परीक्षण हुँदै आएको छ ।
‘नेपालको उडान थप सुरक्षित’
नयाँ राडार सञ्चालनमा आएपछि नेपालको उडान क्षेत्र थप सुरक्षित हुने मासासी ओगावाले विश्वास व्यक्त गर्नुभयो । मङ्गलबार भट्टेडाँडास्थित उक्त राडारको परीक्षण सञ्चालनको निरीक्षण गर्दै उहाँले अत्यधुनिक किसिमको राडार भएकोले यसबाट उडानसँग सम्बन्धित अत्यन्त निकटको जानकारी प्राप्त हुने र यसले उडानलाई सुरक्षित बनाउने उहाँको भनाइ थियो ।
त्यस्तै, उहाँले उडान क्षेत्रलाई थप सुरक्षित बनाउन जापान सरकार नेपालसँग सहकार्यका लागि तयार रहेको प्रतिबद्धता व्यक्त गर्नुभयो । निरीक्षण कार्यक्रमका क्रममा जाइका नेपालका प्रमुख प्रतिनिधि जुन साकुमाले जाइकाको उडान क्षेत्रको सुरक्षाका लागि काम गर्ने नीतिअन्तर्गत जापानी प्राविधिकको समेत सहयोगमा राडार निर्माण गरिएको जानकारी दिनुभयो । राडारबाट अन्तर्राष्ट्रिय उडानको शतप्रतिशत र आन्तरिक उडानको ९७ प्रतिशतसम्म जानकारी प्राप्त गर्न सकिने अनुमान रहेको उहाँले बताउनुभयो ।

 

 

थप समाचार
प्रतिकृया
नाम

ईमेल

ठेगना