लाइसेन्स लिन उमेरले छेक्दैन

purna b basnet

सरोज ढुंगेल 

काठमाडौँ, माघ २७ गते । सवारी चालक अनुमतिपत्र (लाइसेन्स) लिन उमेरले छेक्दैन भन्ने प्रमाणित गरिदिनुभएको छ भक्तपुर सूर्यविनायक नगरपालिका गुण्डुका पूर्णबहादुर बस्नेतले ।  उमेरले ७० काटिसक्नुभएका बस्नेतले केही समयअघि मात्र सवारीसाधन अनुमतिपत्र (लाइसेन्स) लिनुभएको हो । पछिल्लो समय वृद्धवृद्धा पनि सवारी चालक अनुमतिपत्र (लाइसेन्स) लिनका लागि आकर्षित भएको पाइएको छ । 

यातायात व्यवस्था विभागका अनुसार निजी प्रयोजनको लागि सवारी अनुमतिपत्र लिन उमेरले छेक्दैन । यातायात व्यवस्था विभागका प्रवक्ता वीरेन्द्रबहादुर स्वाँरले वृद्धवृद्धाले पनि लाइसेन्स लिन पाउने व्यवस्था भएकोले पछिल्लो समय सवारी अनुमतिपत्र लिने वृद्धको सङ्ख्या बढेको बताउनुभयो ।
विभागले उमेर अनुसारको तथ्याङ्क नराख्ने भएकाले यति उमेरसम्मका वृद्धले लाइसेन्स लिएका छन् भन्न गाह्रो हुने वताउँदै स्वास्थ्यले साथ दिएको छ भने सवारी अनुमतिपत्र लिनलाई उमेरले नरोक्ने स्पष्ट गर्नुभयो । मानिसलाई पछिल्लो समय सवारीसाधन अनिवार्य बन्दै गएकाले पनि सवै उमेर समूहका मानिसले सवारी अनुमतिपत्र लिने गरेका हुन् ।
केही समय पहिले सवारी अनुमतिपत्र लिनुभएका ७० वर्षीय पूर्णबहादुर वस्नेतले आफू उमेरले ७० वर्ष नाघे पनि जोश भने १६ वर्षे युवाको जस्तो रहेको दावी गर्नुभयो । बस्नेतले भक्तपुर राधेराधेस्थित इजिवे ट्रायल सेन्टरमा ट्रायल गरी सवारी अनुमतिपत्र लिनुभएको हो । इजिवे ट्रायल सेन्टरका प्रमुख निर्भय बाबु प्रसाईले पछिल्लो समय वृद्धवृद्धाले पनि लाइसेन्स लिन थालेको जानकारी दिनुभयो ।
विगत ४० वर्षदेखि साइकलमार्फत हिँडडुल गर्ने बस्नेत पछिल्लो समय स्कुटरमा हिँडडुल गर्न थाल्नुभएको छ । उहाँ पूर्व मन्त्री तथा भक्तपुर क्षेत्र नं. २ का प्रतिनिधि सभा सदस्य महेश बस्नेतका पिता हुनुहुन्छ ।
सेन्टरका प्रमुख निर्भय बाबु प्रसाईले ७० वर्षिय वृद्ध पूर्णबहादुर बस्नेतले एकसाता सवारीसाधन सम्बन्धि ट्रायल कक्षा लिएर एकैपटकमा लिखित र ट्रायल परिक्षा पास गरेको जानकारी दिनुभयो । उहाँले भन्नुभयो,“छोरा महेश बस्नेतले पनि लाइसेन्स विना स्कुटर नचलाउनु भनेपछि सवारी अनुमतिपत्र लिन अनिवार्य बन्यो ।”
सेन्टरका प्रबन्ध निर्देशक निर्भय बाबु प्रसाईले सेन्टरमा ६५ वर्ष माथिका वृद्धवृद्धालाई निशुल्क ट्रायल सिकाउन सुरु गरिएको जानकारी दिदै सवारीसाधन चलाउने तर लाइसेन्स नभएका वृद्धहरुको लागि लाइसेन्स सम्बन्धि कक्षा निशुल्क दिइने भएकोले सेन्टरमा सम्पर्कको लागि आग्रह गर्नुभयो ।

थप समाचार
प्रतिकृया
नाम

ईमेल

ठेगना