मेलम्ची छ महिना ढिला हुने


लक्ष्मण दर्नाल

काठमाडौँ, फागुन ४ गते । मेलम्ची खानेपानी आयोजना सम्पन्न हुने मिति फेरि पछाडि सरेको छ । निर्माण कम्पनीको लापरबाही र ढिलासुस्तीका कारण तोकिएको समयभन्दा फेरि पनि ६ महिना ढिला हुने सम्भावना
देखिएको हो ।
परियोजना सम्पन्न गर्नुपर्ने मिति २०७४ चैत १२ (सन् २०१८ मार्च २६) रहेकोमा तीन महिना बढाएर २०७५ जेठ ३१ (२०१८ जुन १४) पु¥याइएको छ । बन्द, हड्ताल, नाकाबन्दीलगायतका विविध कारणले काम गर्न नपाएको बाँकी दिन जोड्दै निर्माण कम्पनीले जुन १४ सम्म काम गर्न पाउने मेलम्ची खानेपानी विकास समितिले जनाएको छ ।
समितिका उपकार्यकारी निर्देशक भोजविक्रम थापाले भन्नुभयो, काम सुरु गरेदेखि बीच–बीचमा कम्पनीले काम गर्न नपाएका दिनहरू रहेकाले उसले जुन १४ सम्म कानुनी रूपमै काम गर्न पाउँछ । काम गर्न नपाएका दिनहरू गनेर थपिएको छ । ठेक्का सम्झौताको प्रावधान यस्तो रहेकोमा आयोजनाको सुरुङको काम पनि सुस्त रहेको छ । melamchi
एक महिनादेखि औसतमा ४.२ मिटरका दरले सुुरुङ खनिएको र यो निक्कै ढिला खनाइ रहेको मेलम्ची खानेपानी विकास समितिले जनाएको छ । निर्माण कम्पनीले पहिला ६ स्थानबाट सुरुङ खनेको थियो भने अहिले २ स्थानबाट मात्रै खनेको छ । हाल दैनिक बढीका ४.७ मिटर खनिएको छ भने घटीमा ३ मिटर खनिएको छ । हाल याल्थुम–सिन्धु खण्डमा २४० मिटर र ग्याल्थुमको एडिट सुरुङ ७२ मिटर बाँकी छ ।
सुरुङ छिचोलिएपछि पनि फिनिसिङ, भेन्टिलेसन, ढलानलगायतका काम गर्न कम्तीमा पाँच महिना थप समय लाग्ने अनुमान गरिएको छ । सुरुङको ब्रेकथु गर्न नै २४० मिटर बाँकी छ । हाल सरदर चार मिटरका दरले खन्दा पनि दुई महिनामा मात्र सुरुङ छिचोलिन्छ । निर्माण कम्पनीको व्यवस्थापन चुस्त नहुँदा पनि ढिलाइ भइरहेको उपकार्यकारी निर्देशक थापाले बताउनुभयो ।
त्यस्तै भेन्टिलेसनको काम पनि अझै सुरु भएको छैन । सुरुङ ढलानको काम पनि सुस्तगतिमा गरिएको छ । हालसम्म जम्मा ३ किमी मात्र ढलान सम्पन्न भएको छ । पटकपटक आग्रह गर्दा निर्माण कम्पनीले ढिलाइ गरिरहेको समितिका सूचना अधिकारी राजेन्द्रप्रसाद पन्तले बताउनुभयो । निर्माण कम्पनीकै ढिलाइका कारणले मेलम्ची खानेपानी विकास समितिले अहिलेसम्म चारपटक समयावधि थप गरिसकेको छ ।
सुरुङको ब्रेकथ्रु गरिसकेपछि त्यसको आरसीसी ढलान र ड्रिल गर्न बाँकी छ । अहिले ग्याल्थुमबाट डाउन र सिन्धुबाट अप काम भइरहेको छ । अन्तिम समयमा कामको गति घटाउनु नै ढिलाइ हुनुको प्रमुख कारण भएको समितिको दाबी छ । साथै कम्पनीले जनशक्ति घटाउनु, काम गर्ने स्थान घटाउनु र दैनिक काम नै घटाएर ढिलासुस्ती गर्नु लापरबाही भएको समितिले जनाएको छ । निर्माण कम्पनीका अधिकारीहरूले भने यस विषयमा बोल्न नमिल्ने बताएका छन् ।
उपकार्यकारी निर्देशक थापाका अनुसार बाँकी रहेको अम्बाथान ग्याल्थुम खण्डमा कमलो चट्टान परेकाले माथिबाट आउन सक्ने पहिरो नियन्त्रण गरेर जोखिमपूर्ण तरिकाले काम गरिरहेको छ । अन्तिम समयमा कामको गति घटिरहेको छ । सुरुङको ब्रेकथ्रु गर्न ढिलाइ भइरहेको छ । तीन महिनाअघिसम्म दैनिक १२ मिटरका दरले सुरुङ खनिएकोमा हाल दैनिक ३ मिटरमा झरेको छ ।
निर्माण कम्पनीले ब्रेकथ्रु गरेको चार महिनासम्म पनि सुन्दरीजलको सुरुङको फिनिसिङ गरेको छैन । हेडबक्सको मुख्य काम पनि सुरु भएको छैन ।

थप समाचार
प्रतिकृया
नाम

ईमेल

ठेगना