एमालेलाई १० र माओवादीलाई सात मन्त्रालय

Pm-officeकाठमाडौँ, फागुन ११ गते । अब देशमा प्रधानमन्त्री कार्यालयसहित १८ वटा मन्त्रालय रहने भएका छन् । प्रधानमन्त्री कार्यालयलाई छुट्टयाएपछि बाँकी रहेका १७ मन्त्रालयमध्ये नेकपा (एमाले)ले १० तथा माओवादी (केन्द्र)ले सात वटा लिने गरी दुई दलबीच मन्त्रालय बाँडफाँटमा सहमति भएको छ । प्रधानमन्त्री निवास बालुवाटारमा बिहीबार एमालेका अध्यक्ष एवम् प्रधानमन्त्री केपी शर्मा ओली र माओवादी केन्द्रका अध्यक्ष पुष्पकमल दाहाल ‘प्रचण्ड’बीच भएको छलफलमा बाँडफाँटमा सहमति भएको हो । 

मन्त्रालय बाँडफाँटमा सहमति जुटाउन दुई नेताबीच बुधबार पनि छलफल भएको थियो । यी दुई नेताबीच भएको सहमतिअनुसार आ–आफ्नो दलमा छलफल गरेपछि मन्त्रालयको बाँडफाँटमा सहमति भएको हो । एमालेको भागमा अर्थ तथा योजना, परराष्ट्र, रक्षा, भौतिक पूर्वाधार तथा यातायात, सङ्घीय मामिला तथा सामान्य प्रशासन, सूचना तथा सञ्चार, कानुन न्याय तथा संसदीय मामिला, पर्यटन, शिक्षा तथा खेलकुद, स्वास्थ्य तथा जनसङ्ख्या मन्त्रालय परेको छ ।
त्यस्तै, माओवादी केन्द्रको भागमा गृह, जलस्रोत तथा ऊर्जा, उद्योग वाणिज्य तथा आपूर्ति, शहरी विकास आवास खानेपानी तथा सरसफाइ, वन तथा वातावरण, कृषि सहकारी तथा भूमि व्यवस्थापन, श्रम रोजगार तथा महिला बालवालिका मन्त्रालय परेको छ ।
प्रधानमन्त्रीका प्रेस संयोजक चेतन अधिकारीले मन्त्रालय बाँडफाँट गर्ने विषयमा मोटामोटी छलफल भएको तर सहमति हुन बाँकी रहेको बताउनुभयो । उहाँले भन्नुभयो, दुवै नेताको बीचमा कुराकानी भएको छ, खाका पनि तयार भएको छ तर त्यसलाई अन्तिम रूप दिन बाँकी छ । उहाँले शुक्रबारसम्ममा यस विषयमा टुङ्गोे लाग्न सक्ने बताउनुभयो । एमाले सचिव योगेश भट्टराईले छलफल भएको तर के–के विषयमा सहमति भए त्यसको जानकारी नरहेको बताउनुभयो ।
दुवै दलले मन्त्रालय बाँडफाँट गरे पनि मन्त्रीको नाम टुङ्गोे लगाउन भने सकेका छैनन् । मन्त्रीको नाम टुङ्गोे लगाउन एमालेले बिहीबार स्थायी समितिको बैठक बोलाए पनि त्यसलाई शुक्रबारसम्मका लागि स्थगित भएको छ । यसैगरी, बिहीबार बसेको नेकपा (माओवादी केन्द्र) को शीर्ष नेताको बैठकले पनि सरकारमा पठाउने मन्त्रीहरूको नाम टुङ्गो लगाउन सकेन । बैठकले अध्यक्ष पुष्पकमल दाहाल ‘प्रचण्ड’, नेता नारयणकाजी श्रेष्ठ र रामबहादुर थापा ‘बादल’लाई मन्त्रीको नाम टुङ्गो लगाउने जिम्मेवारी दिएको छ ।

 

थप समाचार
प्रतिकृया
नाम

ईमेल

ठेगना