नेपाल–भारत प्रबुद्ध समूहको बैठक आजदेखि

लक्की चौधरी

काठमाडौँ, फागुन १२ गते । नेपाल–भारत प्रबुद्ध समूह (ईपीजी)को बैठक शनिबारदेखि काठमाडौँमा बस्दैछ । हरेक तीन महिनामा बस्ने समूहको बैठक शनिबार र आइतबार दुई दिन चल्नेछ ।
नेपाल–भारतबीच भएको शान्ति तथा मैत्री सन्धिको पुनरावलोकन, दुई देशबीचको खुला सिमानाका समस्या तथा त्यसको समाधान, दुई देशबीचको व्यापार, सांस्कृतिक विकासका यावत् विषयमा दुवै देशका सरकारलाई प्रतिवेदन बुझाउने गरी गठन भएको दुवै देशका विज्ञ सम्मिलित समूहको बैठकले यसअघिसम्मको छलफलबाट प्रारम्भिक मस्यौदाको काम सुरु गर्ने समूहका सदस्य नीलाम्बर आचार्यले बताउनुभयो ।
नेपाल–भारत सम्बन्धलाई समग्रतामा अध्ययन गरी सुझावसहितको प्रतिवेदन पेस गर्ने जिम्मेवारी पाएको प्रबुद्ध समूहको बैठकमा दुवै देशबीचको सुरक्षा संवेदनशीलता, जलस्रोत, समग्र हितका विषयमा छलफल भइरहेको छ । छलफलको पहिलो चरण करिब सम्पन्न भएकाले मस्यौदाको काम सुरु हुने समूहका सदस्य आचार्यले बताउनुभयो ।
यसअघि दुई देशबीच भएको पारवहन सन्धि र सन् १९५० को मैत्री सन्धिको विषयलाई समयानुकूल परिमार्जन गर्न दुवै देशका विज्ञ समूह तयार भएका छन् । समूहले व्यापक छलफल गरी तयार गर्ने प्रतिवेदनलाई दुवै देशको सरकारले कार्यान्वयनमा लाने प्रतिबद्धता यसअघि नै जनाएका छन् । nepal india
प्रधानमन्त्री केपी शर्मा ओलीको अघिल्लो कार्यकालमा दुवै देशबीच विवादित विषयको समाधान गर्ने गरी विज्ञहरू सम्मिलित प्रबुद्ध समूह गठन गरिएको थियो । समूहको कार्यावधि दुई वर्ष तोकिएको छ । सन् २०१६ को जुलाईमा काठमाडौँमा आयोजित विदेशमन्त्रीस्तरीय संयुक्त बैठकबाट प्रबुद्ध समूह गठन गर्ने निर्णय भएको थियो ।
समूहमा नेपालका तर्फबाट कूटनीतिज्ञ तथा पूर्वपरराष्ट्रमन्त्री डा. भेषबहादुर थापा, परराष्ट्रविद् डा. राजन भट्टराई, संविधानविद् नीलाम्बर आचार्य र कानुनविद् सूर्यनाथ उपाध्याय सदस्य रहनुभएको छ । त्यस्तै भारतीय पक्षबाट भारतीय जनता पार्टीका नेता भगतसिंह कोसियारी, पूर्वराजदूत जयन्तप्रसाद, प्राध्यापक महेन्द्र पी. लामा र भुवनचन्द्र उप्रेती सदस्य रहनुभएको छ ।
बैठकका लागि भारतीय प्रबुद्ध समूहका सदस्यहरू काठमाडौँ आइसक्नुभएको छ । बैठक शनिबार १० बजेबाट होटल ¥याडिसनमा हुने समितिका सदस्य आचार्यले जानकारी दिनुभयो । उहाँका अनुसार यसअघिको बैठकमा विषयवस्तुबारे व्यापक छलफल भएकाले शनिबारबाट सुरु हुने दुईदिने बैठकले छलफलका विषयलाई मस्यौदा गर्ने कामको थालनी गर्नेछ ।

 

थप समाचार
प्रतिकृया
नाम

ईमेल

ठेगना