काँग्रेसले संसदीय दलको विधान टुङ्ग्यायो

Nepali-congress-750काठमाडौँ, फागुन १३ गते । नेपाली काँग्रेसका प्रतिनिधिसभा र राष्ट्रियसभा सदस्यहरूको शनिबार बसेको संयुक्त बैठकले नेपाली काँग्रेसको संसदीय दलको विधान २०७४ सर्वसम्मतले पारित गरेको छ । 

पार्टी सभापति शेरबहादुर देउवाको सभापतित्वमा संसदीय दलको कार्यालय सिंहदरबारमा बसेको बैठकले संसदीय दलबाट पारित विधान अनुमोदनका लागि नेपाली काँग्रेस केन्द्रीय समितिमा पठाइएको प्रतिनिधिसभा सदस्य मीनबहादुर विश्वकर्माले बताउनुभयो । बैठकमा डा. मीनेन्द्र रिजालले विधान संशोधनको प्रस्ताव पेश गर्नुभएको थियो ।
त्यस्तै, बैठकले नेपालको संविधानले व्यवस्था गरेबमोजिम स्थानीय तह, प्रदेशसभा, प्रतिनिधिसभा र राष्ट्रियसभाको निर्वाचन एक अर्कामा अन्तरसम्बन्धित भएको वर्तमान परिस्थितिमा सबै निर्वाचन सम्पन्न गरी संविधानबमोजिमको तत्कालीन मन्त्रिपरिषद्ले सिफारिस गरी राष्ट्रपतिले अनुमोदन गर्ने तीन जनाबारे समीक्षा गरियो । त्यस सिफारिसलाई राष्ट्रपतिले अनुमोदन नगरी नयाँ सरकारको प्रस्ताव तत्कालै अनुमोदन गरेको प्रति विस्तृत समीक्षा गर्दै नेपाली काँग्रेस संसदीय दलको बैठकले गम्भीर आपत्ति व्यक्त गरेको छ ।
बैठकले राष्ट्रपतिको उक्त कदमलाई असंवैधानिक भएको निष्कर्ष निकाल्दै संविधानको रक्षक राष्ट्रपतिबाट संविधानको पूर्ण पालना गरी असंवैधानिक निर्णय तत्काल सच्याउन जोडदार माग गरेको पनि सदस्य विश्वकर्माले बताउनुभयो ।
त्यस्तै, राज्य पुनर्संरचनासहित जारी भएको सङ्घीय लोकतान्त्रिक गणतन्त्र नेपालको संविधानले व्यवस्था गरेको तीन तहको निर्वाचन नेपाली काँग्रेसका सभापति शेरबहादुर देउवा नेतृत्वको सरकारले सफलतापूर्वक सम्पन्न गराई संविधान कार्यान्वयन गराउने अभिभारा पूरा गर्नुभएकोमा सभापति देउवा नेतृत्वको तत्कालीन मन्त्रिपरिषद्लाई बैठकले धन्यवाद दिएको जनाएको छ ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds