द्विपक्षीय हित हुनेगरी प्रतिवेदन तयार पारिँदै

लक्की चौधरी

काठमाडौँ, फागुन १३ गते । नेपाल–भारत प्रबुद्ध समूह(इमिनेन्ट पर्सन्स ग्रुप–ईपीजी) ले अब प्रतिवेदन तयार पार्ने भएको छ । विभिन्न चरणको बैठकपछि प्रबुद्ध समूहले नेपाल र भारतबीचका विविध विषयबारे प्रतिवेदन तयार पार्न मस्यौदाको काम अगाडि बढाएको छ ।
शनिबारदेखि काठमाडौँमा सुरु भएको समूहको बैठकले छलफलबाट टुङ्गिएको विषयलाई लिपिबद्ध गर्न लागेको हो । आगामी जुलाई ५ सम्म समयावधि तोकिएको यस समूहका सदस्यले त्यसअघि नै नेपाल–भारतको समस्या र त्यसको समाधानार्थ सुझावसहितको प्रतिवेदन तयार गरिसक्ने बताएका छन् । यसअघि यसको छ वटा बैठक बसिसकेको छ । nepal india
समूहको बैठकमा सन् १९५० को द्विपक्षीय मैत्रीपूर्ण सन्धिको पुनरावलोकन, दुईपक्षीय पारवहन, खुला सिमाना, सुरक्षा, व्यापार, आर्थिक सामाजिक विषय, जलस्रोत र त्यसको उपयोग आदि विषयमा गम्भीर बौद्धिक छलफलपछि सोको समाधान गर्नेगरी सुझावसहितको प्रतिवेदन दुवै देशको सरकारलाई बुझाइने नेपालको तर्फबाट समूहको सदस्य रहनुभएका विज्ञ निलाम्बर आचार्यले बताउनुभयो ।
“दुवै देशको हित हुनेगरी विविध विषयमा बौद्धिक बहसपछि त्यसको समाधानको सुझावसहितको प्रतिवेदन बुझाउने जिम्मेवारीअनुसार काम भएको छ, आगामी जुलाईमा नेपाल र भारतका दुवै सरकारलाई सो प्रतिवेदन बुझाउँछौँ,” सदस्य आचार्यले भन्नुभयो । यसअघिको छवटा बैठकमा छलफल र संवादमात्र भएको र सातौँ बैठकबाट मस्यौदाको काम थालिएको उहाँले बताउनुभयो ।
दुईवर्षे समयावधि तोकिएको समूहको सन् २०१६ जुलाई ४ मा पहिलो बैठक काठमाडौंँमा बसेको थियो । समूहको समयावधि सन् २०१८ जुलाई ५ मा समाप्त हुँदैछ । त्यसअघि नै जिम्मेवारीको सबै काम सम्पन्न गर्ने तयारीअनुसार काम भइरहेको सदस्य आचार्यले बताउनुभयो । करिब पाँच महिना समयावधि बाँकी रहेको प्रबुद्ध समूहको कामको प्रकृतिअनुसार बैठकको आयोजना गर्ने सदस्यहरूले बताएका छन् । यसअघि प्रायः तीन महिनामा एक पटक बैठक बस्ने कार्यतालिका निर्माण गरी छलफल गरेका सदस्यहरूले तोकिएको समयावधिभित्र काम सक्न आवश्यकता परेमा महिना दिनमा पनि बैठक बस्न सक्ने बताएका छन् ।
बैठक बस्दा आलोपालो प्रणालीअनुसार एक पटक नेपाल र अर्को पटक भारतमा बस्ने कार्यतालिकाअनुसार बैठक सञ्चालन हुुँदैआएको छ । यसअघि छैटौँ बैठक भारतको नयाँ दिल्लीमा बसेको समूहले सातौँ बैठक नेपालमा आयोजना गरेका हो । यसपछि पुनः आठौँ बैठक भारतमा बस्ने तयारी समूहले गरेको छ ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds