बायाँ खुट्टामा समस्या दायाँ खुट्टाको शल्यक्रिया

काठमाडौँ, फागुन १३ गते । थापाथलीस्थित नर्भिक इन्टरनेसनल हस्पिटलका चिकित्सकले बायाँ खुट्टाको शल्यक्रिया गर्नुपर्नेमा दायाँ खुट्टाको गरिदिएका छन् । उपचारमा चरम लापरबाही भएको भन्दै बिरामी पक्षले विरोध जनाएपछि अस्पताल प्रशासनले यस घटनालाई मानवीय त्रुटि भन्दै बिरामीको उपचारमा लागेको सम्पूर्ण खर्चका साथै थप उपचार गर्नुपर्दा लाग्ने सबै खर्च व्यहोर्ने प्रतिबद्धता जनाएको छ । 

बायाँ खुट्टामा समस्या भएकी चितवनकी ३८ वर्षीया विन्दु पौडेल उपचारका लागि शुक्रबार नर्भिक अस्पताल पुग्नुभएको थियो । चितवनमा गरिएको परीक्षणमा चिकित्सकले बायाँ खुट्टाको लिगामेन्टमा समस्या भएकाले शल्यक्रिया गर्न सुझाव दिएका थिए । थापाथलीको नर्भिक अस्पतालमा शल्यक्रिया गर्ने क्रममा उक्त चरम लापरवाही भएपछि शनिबार बिरामीका आफन्त र अस्पतालबीच चारबँुदे सहमति भएको छ । नर्भिकले उक्त घटनाप्रति दुःख व्यक्त गर्दै भविष्यमा यस्ता घटना हुन नदिन सदैव सचेत रहने, बिरामी विन्दु पौडेलको दाहिने घुँडामा शल्यक्रिया गरिएको कारण भविष्यमा आइपर्ने स्वास्थ्य समस्या र देब्रे घुँडाको लिगामेन्ट च्यातिएको उपचार र त्यससँगै जोडिएर आउने नशालगायतका समस्याहरूको सम्र्पूण उपचार निःशुल्क गर्ने सहमति गरेको छ ।
बिरामीको घुँडाको उपचार नेपाल बाहिर लगेर गर्नुपरे पनि त्यसमा लाग्ने खर्च नर्भिक अस्पतालले व्यहोर्ने सहमतिपत्रमा उल्लेख छ । उक्त सहमतिपत्रमा बिरामी विन्दुकी पति किशोर पौडेल, अस्पतालका कार्यकारी निर्देशक राजेन्द्रबहादुर सिंह, उपचारमा संलग्न चिकित्सक डा. प्रवीण नेपाल र शैलेज रन्जितकारले हस्ताक्षर गर्नुभएको छ । यसबारेमा बुझ्न अस्पतालका कार्यकारी निर्देशक राजेन्द्रबहादुर सिंहसँग पटक–पटक सम्पर्क गर्दा उहाँ सम्पर्कमा आउन चाहनुभएन ।

 

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds