फागुन २७ मा प्रधानमन्त्री ओलीले विश्वासको मत लिनुहुने

नारायण काफ्ले

K.Pकाठमाडौँ, फागुन २१ गते । प्रधानमन्त्री केपी शर्मा ओलीले फागुन २७ गते आइतबार विश्वासको मत लिनु हुने भएको छ । सङ्घीय संसद््मा प्रतिनिधित्व गर्ने राजनीतिक दलसँगको परामर्शपछि संसद्् सचिवालयले प्रधानमन्त्रीले विश्वासको मत लिने आन्तरिक कार्यतालिका तय गरेको हो ।
सचिवालयका अनुसार फागुन २६ गते प्रतिनिधिसभाका सभामुखको निर्वाचन हुनेछ । संसद््को सोमबारको बैठकले औपचारिक रूपमा कार्यतालिका सार्वजनिक गर्नेछ ।
आइतबार सचिवालयले प्रतिनिधिसभामा प्रतिनिधित्व गर्ने पाँच दलसँग परामर्श गरेको थियो । परामर्शपछि प्रधानमन्त्रीको विश्वासको मत तथा सङ्घीय संसद््का पदाधिकारी चयनको कार्यतालिका तय गरिएको हो । संवैधानिक प्रावधानअनुसार प्रधानमन्त्रीमा चयन भएको ३० दिनभित्र विश्वासको मत लिनुपर्छ । चैत ३ गतेसम्म प्रधानमन्त्रीले संसद््मा विश्वासको मत लिनुपर्नेछ ।
सङ्घीय संसद्् सचिवालयका प्रवक्ता डा. भरतराज गौतमले प्रधानमन्त्रीले फागुन २७ गते विश्वासको मत लिनेगरी आन्तरिम सहमति भएको बताउनुभयो । गौतमले भन्नुभयो ‘संवैधानिक सीमाअनुसार केही काम तत्काल गर्नुपर्ने छन् । जसमा पदाधिकारी चयनदेखि प्रधानमन्त्रीको विश्वासको मतसम्मका विषय छन् । सम्माननीय प्रधानमन्त्रीले फागुन २७ गते विश्वासको मत लिनेगरी आन्तरिक कार्यतालिका बनेको छ । ’
संविधानधो धारा ७६(२) को व्यवस्थाअनुसार गठित बहुमतीय सरकारका प्रधानमन्त्रीले प्रधानमन्त्री चयन भएको ३० दिनभित्र विश्वासको मत लिनुपर्ने व्यवस्था छ । धारा
७६(४) ले विश्वासको मतसम्बन्धी व्यवस्था गरेको छ । संवैधानिक व्यवस्थाअनुसार प्रधानमन्त्रीले संसद््मा कायम रहेको सदस्य सङ्ख्याको बहुमत सदस्य पु¥याउनु पर्नेछ । संसद््मा अहिले २७५ सदस्य हुनुहुन्छ । प्रधानमन्त्रीले विश्वासको मतका लागि १३८ सांसद आवश्यक पर्छ ।
प्रधानमन्त्रीको दल एमालेसँग १२१ सांसद हु्नुहुन्छ । यस्तै सत्ता साझेदार दल माओवादी केन्द्रका ५३ सदस्य छन् । एमाले र माओवादी गरेर सरकारलाई सुविधाजनक बहुमत छ । दुई दलका गरी १७४ सांसद छन् । सरकारमा सङ्घीय समाजवादी फोरमलाई समेत समेटेर दुई तिहाई पु¥याउने कसरत भइरहेको छ । यद्यपि दलबीच सहमति भने भइसकेको छैन । सहमति भई फोरम समेत सरकारमा सहभागी भएमा सरकारलाई दुई तिहाइ बहुमत प्ुग्नेछ । दुई तिहाइभन्दा वर्तमान सरकार १० सांसद सङ्ख्याले पछि छ । दुई तिहाइका लागि १८४ सांसद आवश्यक पर्छ ।
फागुन २६ मा सभामुख चयन
यसैबीच फागुन २६ गते प्रतिनिधिसभा सभामुख चयन हुने भएको छ । फागुन २५ गते मनोनयन हुनेछ । औपचारिक रूपमा कार्यतालिका सोमबारको संसद्् बैठकबाट सार्वजनिक हुनेछ । राष्ट्रपति चुनावलगत्तै राष्ट्रियसभा अध्यक्ष पनि चयन हुने कार्यतालिका छ ।
संसद्् सचिवालयका अनुसार फागुन ३० गते राष्ट्रियसभा अध्यक्ष चयन हुने कार्यतालिका छ । यस्तै, पदाधिकारीमध्ये प्रतिनिधिसभा उपसभामुख चैत २ गते तथा राष्ट्रियसभा उपाध्यक्ष चैत ४ गते चयन हुने आन्तरिक कार्यतालिका सङ्घीय संसद्् सचिवालयले तयार पारेको छ ।

थप समाचार
प्रतिकृया
नाम

ईमेल

ठेगना