एमालेबाट भण्डारी पुनः राष्ट्रपति उम्मेदवार

लक्की चौधरी

काठमाडौँ, फागुन २३ गते । राष्ट्रपति निर्वाचनका लागि नेकपा (एमाले)ले विद्यादेवी भण्डारीलाई नै पुनः उम्मेदवार बनाउने सर्वसम्मत निर्णय गरेको छ । फागुन २९ गते हुने निर्वाचनका लागि बुधबार मनोनयन दर्ता गर्ने समयतालिका तय भएको छ ।
एमालेको मध्यरातिसम्म बसेको स्थायी कमिटीको बैठकले राष्ट्रपतिमा भण्डारीलाई दोहो¥याउने सहमति जुटाएको हो । एमालेले प्रस्ताव गरेको राष्ट्रपतिलाई वाम गठबन्धनका तर्फबाट माओवादीले समेत समर्थन गर्ने सहमति भएको छ । वाम गठबन्धनका दुई दल मिल्दा राष्ट्रपतिमा भण्डारीको सहज विजय हुनेछ ।
प्रधानमन्त्रीको सरकारी निवास बालुवाटारमा साँझ ६ बजेदेखि साढे १२ बजेसम्म बसेको बैठकमा नेताबीच लामो संवाद र छलफल चलेको थियो । पार्टीका स्थायी कमिटी सदस्य छविलाल विश्वकर्माका अनुसार लामो कसरतपछि भण्डारीलाई नै राष्ट्रपतिको उम्मेदवार बनाउने सहमति जुटेको हो । Bidya-Devi-Bhandari
राष्ट्रपतिका लागि वरिष्ठ नेता झलनाथ खनालले दाबी गर्नुभएपछि पार्टीका नेताहरू दुई खेमामा विभाजित हुनुभएको थियो । संस्थापन पक्षले भण्डारीलाई नै राष्ट्रपतिमा दोहो¥याउने प्रस्ताव गरेको थियो भने नेता माधवकुमार नेपाल पक्ष र खनाल पक्षका नेताले नयाँलाई अवसर दिनुपर्ने अडान राख्नुभएको थियो । पार्टीको निर्णयलाई एकताबद्ध बनाउन पनि सर्वसहमतिको निर्णय गर्नुपर्ने आवश्यकता भएकाले सहमति जुटेको नेता विश्वकर्माले जानकारी दिनुभयो ।
स्थायी कमिटी बैठकमा पूर्वसभामुख सुवासचन्द्र नेम्वाङको नाममा समेत चर्चा गरिएको एक नेताले बताउनुभयो । अध्यक्ष केपी शर्मा ओलीले राष्ट्रपतिमा भण्डारीलाई दोहो¥याउने प्रस्ताव गर्नुभएको थियो । तर, वरिष्ठ नेता खनालले इच्छा व्यक्त गर्दै अडान राख्नुभएपछि विकल्पमा नेम्वाङको नाममा समेत छलफल भएको थियो ।
राष्ट्रपतिको निर्वाचनका लागि बुधबार बिहान १० बजेदेखि अपराह्न २ बजेसम्म उम्मेदवारी दर्ता गर्ने समय तोकिएको छ । त्यस्तै, २९ गते बिहान १० देखि ३ बजेसम्म मतदानको समय तोकिएको छ । निर्वाचन आयोगले यसअघि नै सङ्घीय संसद् सचिवालयमा निर्वाचन अधिकृतको कार्यालय स्थापना गरेको छ । निर्वाचन अधिकृतको कार्यालयले मङ्गलबार मतदाता नामावलीको अन्तिम सूची प्रकाशन गरेको थियो । सङ्घीय संसद् भवन नयाँबानेश्वरमा राष्ट्रपतिको निर्वाचन हुनेछ । यसअघि काँग्रेसबाट डा. रामवरण यादव र एमालेबाट विद्यादेवी भण्डारीले राष्ट्रपतिको भूमिका निर्वाह गरिसक्नुभएको छ ।
सङ्घीय संसद्मा पहिलो पटक राष्ट्रपतिको निर्वाचन हुन लागेको हो । प्रमुख प्रतिपक्षी दल नेपाली काँग्रेसले राष्ट्रपतिमा कसलाई उम्मेदवार बनाउने भन्ने निर्णय गर्न बुधबार बिहान ९ बजे बैठक आह्वान गरेको छ ।

थप समाचार
प्रतिकृया
नाम

ईमेल

ठेगना