सार्वजनिक बिदामा सरकारी सवारी साधन सञ्चालनमा रोक

काठमाडौँ, चैत ६ गते । गृह मन्त्रालयले सार्वजनिक बिदाको दिन सरकारी स्वामित्वका सवारी साधन सञ्चालन गर्ने कार्यमा पूर्ण रोक लगाएको छ । सरकारी सवारी साधनको आफूखुसी नम्बर प्लेट परिवर्तन गरी रातो नम्बर प्लेट राख्नेलाई पनि कारबाही गर्ने जनाएको छ । 

गृह मन्त्रालयका प्रवक्ता सहसचिव रामकृष्ण सुवेदीले सोमबार एक विज्ञप्ति जारी गरी सार्वजनिक बिदाका दिन कार्यालयको कामबाहेक आफूखुसी अन्य प्रयोजनका लागि सवारी साधन दुरुपयोग गर्ने कार्यप्रति मन्त्रालयको गम्भीर ध्यानाकर्षण भएको उल्लेख गर्नुभएको छ । उहाँले सरकारी सवारी साधनको दुरुपयोग हुन नदिने कार्यप्रति मन्त्रालय प्रतिबद्ध रहेको बताउनुभएको छ । सरकारी नम्बर प्लेट हटाई रातो नम्बर प्लेट राखिएका सम्पूर्ण सवारी साधनको नम्बर प्लेट परिवर्तन गर्न निर्देशन दिएको छ ।
सार्वजनिक बिदाको दिन सरकारी नम्बर प्लेटको सवारी साधन सरकारी कामकाजका लागि सञ्चालन गर्न स्पष्ट प्रयोजन, प्रयोग गर्ने अधिकारीको नाम, पद र सम्पर्क नम्बर खुलाइएको सवारी पास राख्नुपर्ने व्यवस्था मन्त्रालयले गरेको छ ।
तर, सुरक्षाकर्मीको सवारी साधनमा भने यो व्यवस्था लागू हुने छैन । महानगरीय ट्राफिक प्रहरीका अनुसार मुलुकभर पाँच हजारभन्दा बढी सरकारी नम्बर प्लेटको सवारी साधन सञ्चालनमा रहेका छन् । ती सबै सवारी साधन सञ्चालन भने हुँदैनन् ।
त्यस्तै सार्वजनिक बिदाको दिन सरकारी संस्थान तथा विकास समितिका सवारी साधन सञ्चालनका लागि पनि सम्बन्धित अधिकारीहरूको स्वीकृति लिनुपर्नेछ । मन्त्रालय तथा विभागको हकमा सचिव तथा महानिर्देशक र संस्थान तथा समितिको हकमा महाप्रबन्धकबाट सवारी पास लिनुपर्नेछ । उपत्यकाबाहिर प्रमुख जिल्ला अधिकारीबाट जारी सवारी सञ्चालन पास लिनुपर्ने व्यवस्था रहेको छ । गृहमन्त्री रामबहादुर थापाको निर्देशनमा यही महिनाको ३ गते शनिबारबाट सो अभियान मुलुकभर लागू गरिएको छ ।
महानगरीय ट्राफिक प्रहरी महाशाखाले शनिबारको दिन सरकारी नम्बर प्लेटका सवारी साधनहरू आफूखुसी सञ्चालन गरिरहेको अवस्थामा ८६ जना चालकलाई नियन्त्रणमा लिएको थियो । बिदाको दिन सरकारी सवारी चलाउनेविरुद्ध कडा कानुन नभए पनि सवारी साधन नियन्त्रणमा लिई पछिल्लो दिन सम्बन्धित कार्यालयको जिम्मा लगाइदिने गरेको छ ।

थप समाचार
प्रतिकृया
नाम

ईमेल

ठेगना


Copyright © 2014, Gorkhapatraonline.com. All rights reserved. | Developed by: Young Minds