मुख्यमन्त्रीहरूसँग आज छलफल गर्दै प्रधानमन्त्री

KP-Oliकाठमाडौं, चैत ७ गते । प्रधानमन्त्री केपी शर्मा ओलीले प्रदेश मुख्यमन्त्रीहरूसँग परामर्श गर्ने उद्देश्यसाथ आज बैठक आह्वान गर्नुभएको छ । प्रदेश मुख्यमन्त्रीका विविध टिप्पणी सार्वजनिक भइरहेका बेला प्रधानमन्त्री ओलीले त्यसको निराकरणका लागि मुख्यमन्त्रीसँग परामर्श गर्न लाग्नुभएको हो । 

प्रधानमन्त्री तथा मन्त्रिपरिषद् कार्यालय सिंहदरबारमा आज बिहान ११ बजेका लागि बैठक आह्वान गरिएको प्रधानमन्त्रीको कार्यालयले जनाएको छ । छलफलमा एक प्रदेशबाट तीन जना गरी २१ जनाको सहभागिता रहने प्रधानमन्त्रीका राजनीतिक सल्लाहकार विष्णु रिमालले जानकारी दिनुभयो । मुख्यमन्त्रीसँगै बैठकमा प्रदेश सचिव र मुख्य न्यायाधिवक्तालाई पनि आमन्त्रण गरिएको छ ।
प्रदेशको शासकीय तथा आर्थिक व्यवस्थापनका विषयमा काम गर्न अलमल भइरहेको गुनासो मुख्यमन्त्रीबाट आइरहेको छ । प्रधानमन्त्रीले एउटै किसिमको कार्यशैली र शासकीय व्यवस्था कायम गर्न मुख्यमन्त्रीसँग परामर्श गर्न बैठक बोलाउनुभएको सल्लाहकार रिमालले बताउनुभयो ।
प्रधानमन्त्रीले प्रदेशका मुख्यमन्त्रीहरूसँग परामर्श गर्ने संवैधानिक व्यवस्था छ, सोही व्यवस्थाअनुसार प्रधानमन्त्रीले छलफल गर्न लाग्नुभएको हो, तर यो पहिलो भेटमा प्रधानमन्त्रीको निर्देशनात्मक परामर्श हुनेछ, रिमालले भन्नुभयो । बैठकमा मुख्यमन्त्रीहरूले आफ्नो समस्या र कानुनी जटिलताका विषयमा समेत प्रधानमन्त्रीलाई अवगत गराउने अवसर पाउनुहुनेछ ।
संविधानको धारा २३२ (२) अनुसार नेपाल सरकारले राष्ट्रिय महत्वका विषयमा प्रदेशबीच समन्वय गर्नुपर्ने भए प्रदेश मन्त्रिपरिषदलाई संविधान र सङ्घीय कानून बमोजिम आवश्यक निर्देशन दिन सक्नेछ र त्यस्तो निर्देशनको पालना गर्नु सम्बन्धित प्रदेश मन्त्रीपरिषदको कर्तव्य हुने व्यवस्था गरिएको छ ।
प्रदेश ४ का मुख्यमन्त्री पृथ्वी सुब्बा गुरुङले प्रधानमन्त्रीले राजनीतिक परामर्शका लागि बैठक आह्वान गर्नुभएको खबर आएको बताउनुभयो । बैठकमा उहाँले आवश्यक निर्देशन र परामर्श गर्नुहुनेछ भन्ने हामीलाई लागेको छ, उहाँले भन्नुभयो ।

थप समाचार
प्रतिकृया
नाम

ईमेल

ठेगना