साझा एजेन्डा समृद्धि

Hari prashad bhattraiहरिप्रसाद भट्टराई

 


मुलुकको अस्थिर राजनीतिले कोल्टो फेरेर राजनीतिक स्थायित्व लिन थालेको अहिलेको अवस्थामा सुशासनसँगै द्रुत र गुणस्तरीय विकास निर्माण नै अबको मुलुकको समृद्धिको एकमात्र लक्ष्य बनेको छ । मुलुक तथा मुलुकवासीको अबको चाहना भन्ने नै समग्रमा समृद्धि नै हो । यसका लागि सुशासनको कडा पहलकदमीसँगै आर्थिक समृद्धिको पाटोलाई थप फराकिलो पार्ने गरी रणनीतिक कार्ययोजनाको पहल अपेक्षित हुन्छ । त्यही भएर होला वर्तमान सरकार तथा सोको नेतृत्व पनि यस अभियानका लागि प्रतिबद्ध रहेर सोअनुसार अगाडि बढ्न थालेको आभास मिल्दैछ । यस अभियानको छनकसँगै तत् सम्बन्धका विचार तथा भनाइ मुलुकमा यतिखेर यततत्र उद्घोष भइरहेका छन् ।
स्थानीय तह, प्रदेश र सङ्घीय संसद्को सफल निर्वाचनले अब मुलुकमा राजनीतिक स्थायित्व र नयाँ लोकतान्त्रिक संविधानको प्रभावकारी कार्यान्वयनको ढोका खोलेको छ । यसबाट मुलुकमा राजनीतिक स्थायित्व प्राप्तिसँगै आर्थिक समृद्धिका लागि मार्ग प्रशस्त हुन थालेकोमा अब कुनै सन्देह छैन । पछिल्लोपटक सम्पन्न भएको संसद्को निर्वाचनपछि नयाँ सरकार दुईतिहाइ बहुमतसहितको गठन भएको र उक्त संयुक्त बैठकमा राष्ट्रपतिद्वारा जनताका प्रतिनिधिसमक्ष मुलुकवासीका नाममा गत बिहीवार सम्बोधन गर्दै अब लोकतन्त्रको अनुभूति हुने गरी काम गर्ने बेला आएको उद्घोषसमेत गर्नुभएको छ । उहाँले जनताको जीवनशैलीमा आमूल परिवर्तन हुने गरी आर्थिक समृद्धितर्फ मुलुकलाई छिटोछरितो रूपमा डोहो¥याउनुपर्ने खाँचो औँल्याउनुभएको छ । जुन कुरामा जनप्रतिनिधिले अब मुलुक निर्माणको अभियानलाई अवसरका रूपमा लिनु सान्दर्भिक हुन्छ ।
विभिन्न आन्दोलन तथा राजनीतिक परिवर्तनको समय पूरा भएकाले अब राजनीतिक स्थायित्वको फाइदा उठाउँदै जनताको जीवनस्तर उकास्नेतर्फ विकास निर्माणमा नै सर्वथा जोड दिनुपर्ने खाँचोलाई सबै दलका नेता तथा कार्यकर्ताले मनन गर्नु जरुरी छ । यति मात्र होइन राज्यका विभिन्न संयन्त्रमा रहने तथा राज्यको स्थायी सरकारसमेत मानिने प्रशासनयन्त्रलगायतले नै मुलुकी समृद्धिको यस यात्रामा नवीन सोच र जाँगरका साथ लाग्नुपर्ने विषयमा अब नजरअन्दाज गर्न मिल्दैन ।
प्रधानमन्त्री केपी शर्मा ओलीले त सत्ता सम्हालेदेखि नै मुलुकको समृद्धिका लागि थेगो बनाउँदै यस अभियानमा सबै जुट्न विशेष जोड दिँदै आउनुभएको छ । भ्रष्टाचाररहित सुशासन र समृद्धिका लागि उहाँले शुरुदेखि नै विभिन्न समारोह तथा कार्यक्रममार्फत सार्वजनिक प्रतिबद्धता नै व्यक्त गर्दै आउनुभएको छ । यस प्रतिबद्धतामा राज्यका सम्पूर्ण संयन्त्र र सहयोगीको साथ सहयोग रह्यो भने त्यो समृद्धिको लक्ष्य अब टाढा छैन । यो परिस्थिति मुलुकवासीका निम्ति अत्यन्त सकारात्मक छ । मात्र अब के हो भने यी विचार र भनाइअनुसार मुलुक अर्थात् वर्तमान सरकार कडाइँका साथ व्यावहारिक रूपले नै अगाडि बढ्नु भने जरुरी छ ।
यस सन्दर्भमा अब भन्नैपर्ने हुन्छ कि सुशासनका लागि छिटोछरितो सेवा र भ्रष्टाचार नियन्त्रण एक भरपर्दो अचुक उपाय हो । राजनीतिक वृत्तमा होस् वा प्रशासनीकयन्त्र जुनसुकै क्षेत्रमा अझै पनि पुरानै हिसाबले काम गर्ने बानी र प्रवृत्ति अझै हटेको छैन । मुखले एउटा कुरा बोल्ने र काम आफ्नो फाइदाको हिसाबले गर्ने परिपाटी अझै जारी छ । २०४७ सालको राजनीतिक परिवर्तपछि पनि यो प्रवृत्ति हटेन । बरु प्रजातन्त्रका लागि आफ्नो जीवन आन्दोलनमा व्यतीत गरेका नेताबाटै सिष्टमलाई मिच्ने र भ्रष्टाचार गर्ने परिपाटी बस्यो । जनताले परिवर्तनपछि यस खालको अपेक्षा गरेका थिएनन् । यसो भन्दैमा सबैबाट त्यसो गरियो भन्ने होइन । तर, अधिकांशमा त्यो प्रवृत्ति हाबी हुँदै आयो । अब पनि त्यही परिपाटीले निरन्तरता पाउने हो कि भन्ने आशङ्का आमनागरिक वृत्तमा छ । यो आशङ्का मेटाउन सरकार तथा सम्बद्ध नेतृत्वबाट व्यावहारिक रूपमै पहलकदमी लिनु र साँच्च्किै लोकतन्त्रको अनुभूति हुने गरी काम गर्नु जरुरी छ ।
सुशासन र भ्रष्टाचार नियन्त्रणसँगै उपयुक्त व्यक्तित्व उपयुक्त ठाउँका हिसाबले जिम्मेवारी सुम्पिने गरी र हाम्रा मान्छे होइन कि राम्रा मान्छे भन्ने ध्ययेका साथ कामकारबाही अगाडि बढाइयो भने समृद्धिको लक्ष्य टाढा छैन । यसका लागि प्रधानमन्त्री आलीले विशेष जोड दिँदै आउनुभएको पनि आभास मिल्दैछ । तर, प्रधानमन्त्रीको एक्लो प्रयासले मात्र यो सबै सम्भव छैन ।
बोली र व्यवहार एउटै भयो भने सकारात्मक कुरा एवं उल्लेखनीय सन्दर्भ अहिले के छ भने उहाँले पछिल्ला दिनमा आफूले पनि कुनै किसिमको भ्रष्टाचार नगर्ने र आफ्ना सहयोगी एवं मन्त्रीलाई पनि कडाइँका साथ भ्रष्टाचार गर्न नदिने बताउँदै आउनुभएको छ । राज्यका सम्बद्ध निकाय एवं संयन्त्रमा रहने पदाधिकारी तथा राष्ट्रसेवकलाई पनि नयाँ अभियानको सोच र तदनुरूपको कार्यशैलीका साथ भ्रष्टाचाररहित छिटोछरितो सेवा गर्न आग्रह गर्दै उहाँले कडा निर्देशन दिँदै आउनुभएको छ । यो सोच र आग्रहअनुसार सम्बद्ध सबैले काम गर्ने हो भने मुलुकले सुशासनसँगै छिटै समृद्धि पक्रिनेमा कुनै द्विविधा छैन । राष्ट्र निर्माणको लागि सरकार एक्लै वा कुनै एक पक्षले मात्र त्यसअनुसार काम गरेर मात्र पुग्दैन । यसको लागि सम्बद्ध सबैको इमानदारिता र सतप्रयासको खाँचो जरुरी हुन्छ ।

 

थप समाचार
प्रतिकृया
नाम

ईमेल

ठेगना